Read MUKANDA WANZAMBI 1 Makorinte 3 Bible Online

1 Makorinte 3 - MUKANDA WANZAMBI bible

1 Makorinte 3

¹Enu ana kwetu, ami nahosheli nenu chidi neyi nawantu achisemwa chaheseki, neyi anyikeki amudi Kristu; hinatwesheli kuhosha nenu neyi chahoshaŋawu nawantu awuspirituku.

²Nayinwishili mayeli, hinayidiishili mbŋuku, muloŋa himwayitwesheluku; hela nihanu saŋa mwabulila kuyitwesha;

³muloŋa muchidi antu achisemwa chaheseki. Neyi mukachi kenu mwekala ichima nikuzuŋa, himuchidi antu achisemwa chahesekuku? himwelaŋa mwelaŋawu antuku, tahindi?

⁴Chimudi nakwila iwu nindi, Ami nimuntu waPawulu; mukwawu nindi, Ami nimuntu waApolosi; himuyantu achisemwa chahesekuku?

⁵Apolosi diyinyi? hela Pawulu diyinyi? Wejima wetu tuyakwakukalakala kumwetiyilili, mwatukunji kililuwu kudi Mwanta.

⁶Ami natumbili, Apolosi watukumwinini; hakwila wakulishili diyi Nzambi.

⁷Ichi dinu, watumbaŋa hela watukumwinaŋa hiyalemaku; walema diyi Nzambi wakulishaŋa.

⁸Ichi dinu, watumbaŋa niwatukumwinaŋa anekali wowamu; ilaŋa wejima wawu akatambula wufwetu wawu weseka nanyidimu yawu aweni, muntu nawufwetu windi, muntu nawufwetu windi.

⁹Muloŋa tuyakwaku kalakala ambala aNzambi; enu mudi iha daNzambi, mudi itala daNzambi.

¹⁰Ami nimukwawu kalawenu wakutuŋa, mwaya luwi lwaNzambi lwanyinkeluwu; ami naalili chikuku, wacheŋi hakutuŋilahu. Ilaŋa ntu ejima adi kubabala mwakutuŋilawu hachikuku ichi.

¹¹Chikuku chatupawu dehi, diyi Yesu Kristu. Kwosi muntu wukutwesha kutuŋa chacheŋuku.

¹²Muntu wukutuŋila wuru hachikuku ichi, hela siliva, hela malola awuseya weneni, hela nyitondu, hela matahu, hela nswadi;

¹³akamwekesha nyidimu yawantu ejima. Akayimwekesha kudiifuku odu, muloŋa yakamwekana mukesi; kesi kakeni kakatompa nyidimu yawantu ejima, mwayili mudimu, mwayili mudimu.

¹⁴Neyi mudimu wamuntu watuŋiliyi hachikuku ichi wakashalahu, yena wakatambula wufwetu.

¹⁵Neyi mudimu wamuntu wakasukuma, yena hakatambula wufwetuku; hakwila yena yomweni wakahanda neyi chakuhita mukesi.

¹⁶Himuneluki nenu mudi tembeli yaNzambi, niSpiritu yaNzambi washakamaŋa mudenuku, tahindi?

¹⁷Muntu wukutamisha tembeli yaNzambi, akamutamisha kudi Nzambi; Muloŋa tembeli yaNzambi yajila, enu yenu tembeli oyu.

¹⁸Bayi muntu adidimbaku. Mwinenu wumu watoŋojokaŋa nindi nidi nama ana amakonu, ekali chisupi kulonda abalumuki kwikala mukwamaana.

¹⁹Muloŋa Nzambi wamonaŋa maana amakonu nindi hiwusupi. Muloŋa nasoneki nawu, Akwamaana wayikwatilaŋa kwoku kukubabala kwawu awenawu;

²⁰nicheŋi nawu, Yehova weluka yitoŋojoka yawakwamaana nindi yakuhemesha hohu.

²¹Dichi bayi muntu adisamba nawantuku, muloŋa yuma yejima yenwenu;

²²niPawulu, niApolosi, niPetulu, nimpata yamunu mwishina, niwumi, ni kufwa, niyuma yamafuku anu, niyuma yamba kenza; yejimiyi yenwenu hohu;

²³ninenu mudi ambala aKristu; niKristu nawa wambala waNzambi.