Read MUKANDA WANZAMBI 1 Makorinte 4 Bible Online

1 Makorinte 4 - MUKANDA WANZAMBI bible

1 Makorinte 4

¹Antu atwiluki nawu tuyakwakukalakela Kristu, tuyatulama ansaŋu jaNzambi jakujinda.

²Antu akuhwelelaŋa atulama nawu chiŋa ayimoni kushinshika.

³Kunsompesha kudenu hela kudi antu acheŋi, hichuma chakuhemesha hohu; eŋaŋi, hela ami aweni hinadisompeshaŋaku.

⁴Muloŋa ami hineluki chuma chakudinka nachu muloŋaku; hela chochu, hidichi chinayiŋiluku; Mwanta diyi wansompeshaŋa.

⁵Dichi bayi munyakala kusompeshaku, chiŋa Mwanta nenzi; yena diyi wakaleta yuma yakujinda yamumwidima kuchejeji, wakamwekesha niyitoŋojoka yamuchima. Henohu dihu hakamonawu antu ejima kuyihameka kudi Nzambi, hamuntu hamuntu.

⁶Enu ana kwetu, yumiyi nayibalumuni kufwikŋa nachu chituneli ninami niApolosi hansaŋu yenu, kulonda mwilukili kudetu mubuli kupandakana yuma yasonekawu dehi munyikanda yajila; kulonda mukachi kenu mubuli kwikala muntu wukulemesha wumu asekesha mukwawu.

⁷Hinyi nakwili nindi wunabadiki mukwenu? Chuma chiwukweti chiwunabuli kutambula chumanyi? Indi neyi wachitambwili wukudisambiladi, neyi hiwachitambwiluku?

⁸Munekuti dehi, muneli dehi akwakuheta, munadyi dehi wanta chakubula etu. Eŋaŋi, nakeŋi nami muyuli, kulonda ninetu tuyuli hamu nanenu.

⁹Muloŋa natoŋojoki nami Nzambi natumwekeshi etu apostolu hanu hakukuminina, neyi tuyantu atelela kufwa hohu. Muloŋa natubalumuni kwikala akwakutalilahu kudi akwampata yamunu mwishina, nikudi aŋelu, nikudi antu.

¹⁰Etu tudi ayisupi hansaŋu yaKristu, ilaŋa enu mudi akwamaana mudi Kristu. Etu twabula Ŋovu, ilaŋa enu mudi naŋovu. Enu mwalema, ilaŋa etu twaseka.

¹¹Nihanu tudi nanzala nimpwila, tudi nawuvu, atukofwolaŋa, hitukweti nimukala wakwiluka chikupuku;

¹²twakabakanaŋa nakukalakala nyidimu namakasetu. Chatutukaŋawu twayikiswilaŋa nkisu; chatukabishaŋawu twakuminaŋa dakwiteja;

¹³chatutuŋulaŋawu twakuminaŋa dakulemba; tunekali dehi neyi wuzondu wampata yamunu mwishina, hela neyi nswadi hohu, nihanu.

¹⁴Iyi yuma yinayisonekeli, hinayisonekeli nami niyitiyisha nachu nsonyuku, nalondi kuyikonkomwena, nanichi chimuneli muyanyanami nakeŋa.

¹⁵Hela mukweti ikumi damakombakaji dawankuluŋaŋa amudi Kristu, himukweti atata amavuluku; muloŋa ami nayivweleli mudi Kristu Yesu nansanu yayiwahi.

¹⁶Dichi nayilembeleli nami ikalenu akwakuŋi mbujola.

¹⁷Dihu hanafumi kuyitemeshela Timotewu, himwanami nakeŋa wamudi Mwanta, washinshika; diyi wakayanukisha munelaŋa mudi Kristu, mwomunalejelaŋa kwejima muyipompelu yejima.

¹⁸Ilaŋa enu amakwawu munadinki dehi wanta, nenu ami hinakenza kudenuku.

¹⁹Hakuleha chanti nakenza kudenu, neyi Nzambi neteji. Dihu hinakeluka Ŋovu jawenowu anadinki wanta, bayi mazu awu hohuku.

²⁰Muloŋa wanta waNzambi walemenaŋa kuŊovu, bayi kumazuku.

²¹Munakeŋidi? Ninzi kudenu nakabama, tahindi nakukeŋa naspiritu yakudizoza?