Read MUKANDA WANZAMBI 1 Makorinte 5 Bible Online

1 Makorinte 5 - MUKANDA WANZAMBI bible

1 Makorinte 5

¹Chalala, tunatiyi nawu mukachi kenu mudi wuvumbi, wakwilanawu mwinenu wumu natambuli iŋodatata yindi; wena wuvumbi owu hiwekala hela mukachi kawajentiluku.

²Ninenu himukudinka wanta! Mutenowu mwadi kuneŋa, kulonda owu mwinenu nakoŋi chumichi, amufumishi mukachi kenu.

³Chalala ami, hela mumujimba nidi kwacheŋi, nidi nenu muspiritu, nasompesha dehi muntu nakoŋi chumichi, neyi kafwampi nidi nenu.

⁴Chimukupompela hamu, mwijina daMwanta wetu Yesu, nispiritu yami, naŋovu yaMwanta wetu Yesu,

⁵nami, hanenu muntu wudi ochu kudi Satana kulonda akisaŋani mujimba windi, kulonda spiritu yindi yakahandi mwifuku daMwanta Yesu.

⁶Kudisamba kwenu hikunawahuku. Mweluka dehi chananishaŋa iluŋi dantesha chikanka chejima.

⁷Fumishenu iluŋi dadikulu, kulonda mwikali chikanka chachiha; muloŋa munekali dehi chakadi ilupi. Paseka yetu yanajahuwu dehi diyi Kristu.

⁸Dichi tuhembenu chawija nadinkendi dakadi iluŋi, damuchima wutooka, dalala; kuchidya neluŋi dadikulu, hela neluŋi dankunyi nikutama, chinjila.

⁹Nayisonekeleli dehi mumukanda wami nami, bayi mudibombaŋa nawayivumbuku.

¹⁰Hinateni ayivumbi, hela akwalwisu, hela akwanyilami, hela akwakupesha amunu mwishinaku. Neyi ochu mwadi kufuma chikupu mumpata yamunu mwishina.

¹¹Ilaŋa katataka nidi nakuyisonekela nami, neyi muntu anatenuwu nawu himana kwenu wukwi kala chivumbi, hela mukwalwisu, hela mukwakupesha, hela mukwakutukana, hela mukwakusheta walwa, hela mukwanyilami, nami muntu wudi ochu, bayi mudibomba ninduku, hela kudya nindi chinjila.

¹²Ami hinikweti nsaŋu yakusompesha antu abula kwikala muchipompeluku. Mudimu wenu wakusompesha antu adi muchipompelu;

¹³hakwila antu abula kwikala muchipompelu, ayisompeshaŋa kudi Nzambi. Fumishenu owu muntu watama mukachi kenu.