Read MUKANDA WANZAMBI 1 Makorinte 7 Bible Online

1 Makorinte 7 - MUKANDA WANZAMBI bible

1 Makorinte 7

¹Nsaŋu yimwasonekeli; chachiwahi iyala abuli kukwata hamumbanda.

²Hela chochu, amayala ejima adi kwikala nawaŋodi jawu, niambandaejima adi kwikala nanfumu jawu iwu nawindi, iwu nawindi, kuchina kwila wuvumbi.

³Iyala amwili Iŋodindi mwatela, nimumbanda nawa mwomumu.

⁴Mumbanda hakweti wanta wamujimba winduku, chiŋa nfumwindi; chochimu niiyala hakweti wanta wamujimba winduku, chiŋa Iŋodindi.

⁵Bayi mudibondaku, chiŋa mushamu mafuku akutoŋola, kulonda mudinki kukulomba, muhumaŋani cheŋi, kulonda Satana abuli kuyeseka hansaŋu yákubula kudi hemba.

⁶Chinahoshi mwenimu, nakumini dakuyiiteja, hinayileji nshimbuku.

⁷Ilaŋa natoŋojoki nami chachiwahi antu ejima adi kwikala neyi chinekalami. Antu ejima akweti mwayitoŋwelawu kudi Nzambi, iwu namwindi, iwu namwindi.

⁸Hinukuyileja ajiki nawanfwila, nami chachiwahi wena ekali neyi chinekalami.

⁹Neyi hiyakutwesha kudi hembaku, asumbuli tuhu. Chinawahi kusumbuka, hichinawahi kuha kesuku.

¹⁰Antu akusumbula nukuyileja; hiyami nukuyilejaku, anayileji kudi Mwanta; nindi mumbanda bayi aleka nfumwinduku.

¹¹Neyi wukumuleka, ashakami kwindi wujiki; mukunkulwayi akundami cheŋi kudi nfumwindi; niiyala bayi aseŋa iŋodinduku.

¹²Hakwinza akwenu anashali, yami nukuyila, hiMwantaku; nami neyi hadi mana kwetu wukweti Iŋodindi wabula kwitiya, niyena mumbanda natiyi kuwaha kushakama nindi, iyala bayi amuseŋaku.

¹³Nimumbanda wukweti nfumwindi wabula kwitiya, niyena iyala natiyi kuwaha kushakama nindi, bayi aleka nfumwinduku.

¹⁴Muloŋa iyala wabula kwitiya najilili mudi Iŋodindi; nimumbanda wabula kwitiya najilili mudi nfumwindi. Mukunkulwayi anyanenu adi kwikala akadi kujila; ilaŋa ichi dinu, anekali kwawu ajila.

¹⁵Ilaŋa neyi muntu wabula kwitiya nakeŋi kuya, muleki ayi. Mana kwetu weyala hela wamumbanda hiyanamukasi hansaŋu iyuku; Nzambi natutambikili kuwunda.

¹⁶Eyi mumbanda, wukwiluka ŋahi, hamwaha wukuhandisha nfumweyi? Hela eyi iyala, wukwiluka ŋahi, hamwaha wukuhandisha iŋodeyi?

¹⁷Antu ejima chiŋa ashakami mwomwanayitoŋweluwu dehi kudi Mwanta, mwomwanayitambikuwu kudi Nzambi. Dimu nayulaŋa muyipompelu yejima.

¹⁸Muntu atambikawu iku waalama dehi, bayi abalumuka kwikala neyi chidimaku. Muntu atambikawu iku kanda alami, bayi amwalamishaku.

¹⁹Kwalama hichumaku, nikubula kwalama hichumaku; chuma chalema yowu kuhemba mwayilejawu kudi Nzambi.

²⁰Antu ejima ekali mwomwadiŋililuwu hayitambikiluwu.

²¹Eyi hakutambikiluwu, wadiŋi nduŋu tahindi? Bayi wuwubaŋaku; ilaŋa neyi wukutwesha kufumamu, fumakumu tuhu.

²²Muloŋa muntu atambikiluwu mudi Mwanta hadiŋiyi nduŋu, nekali dehi mwana kambala kaMwanta. Nimuntu atambikiluwu hadiŋiyi mwana, nekali dehi nduŋu yaKristu.

²³Ayilandili dehi nawuseya; bayi mwikala anduŋu jawantuku.

²⁴Enu ana kwetu, antu ejima ashakami naNzambi mwomwayitambikililuwu.

²⁵Nsaŋu yakutena ambanda abula kusumbuka; hiyananleji kudi Mwantaku, ilaŋa nukuyileja muchima wami, neyi muntu natambuli dehi luwi kudi Mwanta kulonda nishinshiki.

²⁶Hansaŋu jakumona kukala kwamafuku anu, natoŋi nami chachiwahi muntu akumini dakwikala chekalayi.

²⁷Eyi wakasika kudi mumbanda, tahindi? Bayi wukeŋa kukasunukaku. Eyi wakasunuka kudi mumbanda, tahindi? Bayi wukeŋa kusumbula mumbandaku.

²⁸Hela wukusumbula hiwunavulumunuku; hela mumbanda wukusumbuka hanavulumunuku. Ilaŋa dinu, wenawa akamona yihuŋu mumujimba; nalondi nanu niyanakeni.

²⁹Enu ana kwetu, ami nami mpinji yinakehi dehi; dichi kufuma hanu akweti ambanda ekali neyi hiyakwetuku;

³⁰adilaŋa ekali neyi hiyadilaŋaku; azapalalaŋa ekali neyi hiyazaŋalalaŋaku; alandaŋa ekali neyi hiyakweti yumaku;

³¹akwataŋa kuyuma yamunu mwishina ekali neyi abulaŋa kukwataku chikupu. Muloŋa yuma yampata yinu chiyidichi, yahitaŋaa.

³²Nakeŋi enu mubuli kwakama. Muntu wabula kusumbula waakamaŋa yuma yaMwanta, kulonda amutiyishi Mwanta kuwaha.

³³Ilaŋa muntu wasumbula waakamaŋa yuma yamunu mwishina, kulonda amutiyishi Iŋodindi kuwaha.

³⁴Cheŋi nawa, mumbanda wasumbuka hesekana namumbanda wabula kusumbukaku. Mumbanda wabula kusumbuka waakamaŋa yuma yaMwanta, kulonda ajili nimumujimba nimuspiritu; hakwila wasumbuka waakamaŋa yuma yamunu mwishina, kulonda amutiyishi nfumwindi kuwaha.

³⁵Chinahoshi ichi nalondi nami niyikwashi; hinalondi kuyitila muhetuku, nalondi kuyileja yuma yayiwahi, kulonda mukalakelaŋa Mwanta chakadi kuyiluwaŋesha.

³⁶Neyi hadi iyala natoŋojoki nindi hadi nakumwila mujiki windi chachiwahuku, niyena hakusweja kukula, hela hanatweshi kudi hembaku, akumini dakwila mwakeŋa ayi, asumbuki tuhu; hanavulumunuku.

³⁷Hakwila iyala wadikaŋa mumuchima windi, hikudi nsaŋu jakumukanjikijaku, wukweti nawa Ŋovu yakudihemba, nakoleshi mumuchima windi nindi mujiki windi ashakami tuhu, diyi wukwila chachiwahi.

³⁸Nochu dinu, muntu wukusumbwisha wukwila chachiwahi; ilaŋa muntu wukubula kusumbwisha diyi nabadiki kwila chachiwahi.

³⁹Mumbanda wakasika nanfumwindi mafuku ejima hachidiyi iyala wamumi; ilaŋa neyi nfumwindi nafwi nakasunuki dehi, natweshi kusumbuka neyala anakeŋiyi; chiŋa dinu mudi Mwanta hohu.

⁴⁰Ilaŋa mi natoŋojoki nami wukusweja kutiya kuwaha neyi wukushakama choche nochu. Natoŋojoki nami ni kweti niSpiritu yaNzambi.