Read MUKANDA WANZAMBI 1 Makorinte 9 Bible Online

1 Makorinte 9 - MUKANDA WANZAMBI bible

1 Makorinte 9

¹Hinimwana wachisemwaku, tahindi? Hinikapostoluku, tahindi? Hinamumoni Mwanta wetu Yesu namesuku, tahindi? Enu himudimudimu wami wamudi Mwantaku, tahindi?

²Hela neyi nabuli kwikala kapostolu kumesu awantu acheŋi, hakwila kumesu enu nikapostolu chalala. Muloŋa enu yenu mufunda wawupostolu wami wamudi Mwanta.

³Dichi chinadihakwilaŋa kudi antu ansompeshaŋa,

⁴nami, nabuli Ŋovu yakudya hela yakunwa, tahindi?

⁵Nabuli Ŋovu yakusumbula mumbanda wetiya, niyaloŋa nindi mumajila, neyi chelaŋawu apostolu amakwawu, niana kwaMwanta, naPetulu, tahindi?

⁶Ami naBaranaba, yetu hohu tukubula kutwesha kuleka kukalakala nyidimu yakudikwasha nachu, tahindi?

⁷Mwamonahu dehi ishidika wakalakalaŋa, hakudifwetaŋa yomweni, tahindi? Hela muntu wakuminaŋa kwakudima itempa danyivinyu hohu, kudiilaku nyikabu nehi? Hela muntu wadiishaŋa nyikoku, abuli kunwinaku mayeli?

⁸Chinukuhosha mwenimu nahoshaŋa mwanlejaŋawu antu, tahindi? Hela nshimbi jahoshaŋa mwomumu;

⁹Muloŋa munshimbi jaMosi anasoneki nawu, Kukasa kukanwa kaŋombi hakuhulayi tidiku, chinjila.

¹⁰Nzambi waakamaŋa aŋombi, tahindi wahosheleli hansaŋu yetwetu? Eŋa, yetu asonekeleluwu, kulonda mukwakudima adimi nakuchiŋeja, nimukwakuhula achiŋeji kudi ilamu.

¹¹Etu twayikuwilili yuma yaSpiritu, komana chikukala neyi tukudya yuma yenu yakumujimba, tahindi?

¹²Chatweshaŋa antu amakwawu kutambula yuma yenu, etu tubuli kubadikamu, tahindi? Ilaŋa etu twabulili kutambula yuma yenu, twakumininaŋa dakwiteja yuma yejima, kulonda twakabuli kulabisha nsaŋu yaKristu yayiwahi.

¹³Mweluka dehi wena akalakalaŋa yuma yajila adyaloŋa yuma yakutembeli, niwena emanaŋa kukameŋa adyaloŋa hamu nakameŋa.

¹⁴Dimu nawa mwaloŋesheliyi Mwanta, nindi antu ashimunaŋa nsaŋu yayiwahi akadyi kunsaŋu yayiwahi.

¹⁵Ami kwami hinakwati kuyumiyuku, hela chinasoneki ichi hinasoneki nami akankwashuku. Ami nakeŋi nami chachiwahi nikumini dakufwa hohu, habuli kumwekana muntu wukunlekesha kudisamba kunadisambaŋa.

¹⁶Chinashimunaŋa nsaŋu yayiwahi, hichikweti hakudisambilaku; anankunjiki mudimu wakushimuna, chiŋa nishimuni hohu. O yihuŋu yinukumonami neyi nukubula kushimuna nsaŋu yayiwahi!

¹⁷Muloŋa neyi nachilaŋa chakufuma kumuchima wamami aweni, komana ni kweti wufwetu; ilaŋa neyi hichakumuchima wamami awenuku, anankunjiki mudimu wambala wakushimuna.

¹⁸Wufwetu wami wufwetwinyi? Wowu wakushimuna nsaŋu yayiwahi chakadi wuseya, kulonda nibuli kudya mwejima munatweshaŋa kudya kunsaŋu yayiwahi.

¹⁹Hela hininduŋu yawantuku, nadinki ami aweni wuduŋu wakushimwina antu ejima, kulonda nikokoli nachu amavulu.

²⁰Kudi aYudeya nelili neyi nikaYudeya, kulonda nakakokoli nachu aYudeya; kudi antu adi kunshimbi nelili neyi nidi kunshimbi, kutoŋa ami hinidi kunshimbuku, kulonda nakakokoli nachu antu adi kunshimbi.

²¹Kudi antu abula nshimbi nelili neyi nabula nshimbi, kulonda nakakokoli nachu antu abula nshimbi; hinabula nshimbi kudi Nzambuku, nekala munshimbi jaKristu.

²²Kudi antu azeya nelili muntu wazeya, kulonda nakakokoli nachu anlu azeya. Nekali dehi wesekana nawantu ejima muyuma yejima, kulonda mwejimimu nitweshi kuhandisha nachu amu.

²³Yuma yejima yinelaŋa, nelilaŋa nsaŋu yayiwahi kulonda nidiiluku hamu nayu.

²⁴Muneluki nenu antu adesekaŋa lufuchi lwawu atemukaŋa wejima wawu, kwinza kusomona, akusomona wumu hohu. Ninenu temukenu kulonda akayisomoni.

²⁵Antu ejima ahemaŋa nakudipaka adihembaŋa muyuma yejima. Wena alondaŋa kutambula chibaaba chatokaŋa, hakwila etu twalondaŋa kutambula chakatokaŋa.

²⁶Dichi ninami chinatemukaŋa mwenomu, hinatemukaŋa nakululutaku; chinalwaŋa hinetaŋa hampepelaku.

²⁷Ilaŋa nafumbaŋa mujimba wami hakuwukofwola, kuchina kunkinjika ami aweni nashimwinaŋa antu acheŋi.