Read MUKANDA WANZAMBI 2 Makorinte 1 Bible Online

2 Makorinte 1 - MUKANDA WANZAMBI bible

2 Makorinte 1

¹Ami Pawulu, kapostolu kaKristu Yesu mwaya muchima waNzambi, nimana kwetu Timotewu, tudi nakuyisonekela mukanda, enu akwachipompelu chaNzambi chekala kuKorinda, hamu nawakwakujila ejima ekala muAkaya mwejima.

²Luwi lwikali nanenu nikuwunda kwakufuma kudi Nzambi, Tata yetu, nikudi Mwanta wetu Yesu Kristu.

³Amukiswili Nzambi yaMwanta wetu Yesu Kristu, yowu Tata yindi, diyi Tata wavulishaŋa luwi, Nzambi wakukundeja kwejima,

⁴watukundejaŋa mulukadi lwetu Iwejima, kulonda tutweshi kukundeja akwetu adi mulukadi nakukundeja kwanatukundejuwu nachu kudi Nzambi.

⁵Muloŋa chatuswejelaŋa makabi aKristu, nikukundeja kwatukundejaŋawu mudi Kristu kwatuswejelaŋa nawa.

⁶Chakukabishawu etu, chikwikala chuma chakukundeja nachu enu nikuyihandisha. Chakukundejawu etu, chikwikala chuma chakuyikundeja enu nawa. Kukundejiku kwaletaŋa kutatakena mumakabi itwamonaŋetu nawa.

⁷Chikuhwelela chetu chitwayikuhwelelaŋa chakola, muloŋa tuneluki netu chimwatambwilaŋa makabi hamu, mwatambulaŋa nikukundeja hamu.

⁸Enu ana kwetu, hitunakeŋenu kuyamba nsaŋu yalukadi lwetu lutwaweni muAsiyaku; chitwatiyili kulema kwabadikili nankashi muŊovu jetu; lukadi lwasweja nankashi lwakwila netu hitukuhanda nawaku.

⁹Eŋaŋi, etu aweni twatiyili mumuchima wetu kafwampi neyi anatuhishi namuloŋa wakufwa hohu, kulonda tubuli kudikuhwelela etu aweni, tukuhweleli Nzambi wasaŋulaŋa afu.

¹⁰Diyi watupulwishili mukufwa oku kwasweja kutoha, ninodu saŋa atupulwishilayi ho-o; tunakuhweleli yena netu diyi wamba katupulwisha.

¹¹Ninenu nawa tukwashenuŋa nakulembelela, kulonda amavulu akasakilili hansaŋu yetu, nanochu chanatukwashuwu nakulomba kwawantu amavulu.

¹²Tukudisamba nanochu chitukweti chinleji chamuchima chatulejaŋa nindi twashakamaŋa mumpata yamunu mwishina mukujila na kashinshi kaNzambi, chasweja kudenu aweni; hinamaana achise mwaku, chiŋa naluwi lwaNzambi hohu.

¹³Muloŋa hitukuyisonekela yuma yacheŋuku, chiŋa yoyimunataŋi yimuneteji dehi, nakuhweleli nami mwakayiteja ndo nikunsa.

¹⁴Chimwatwitejeli dehi chanti nenu twadisambilaŋa hansaŋu yenu, dichi chimwakadisamba nawa ninenu hansaŋu yetwetu mwifuku daMwanta wetu Yesu.

¹⁵Chinelukili mwenimu, nakeŋeli nisambili kwinza kudenu nami nakayikwashi kamuchiyedi.

¹⁶Nami nakahitili kudenu munjila yami yakuya muMasidoniya; hakufunta kuMasidoniya kunakaya, nakahitili kudenu cheŋi nawa, kulonda mwakanshinjikŋuku munjila yami yakuya kuYudeya.

¹⁷Dichi chinafuukwili mwenomu chadiŋi chakuhemesha, tahindi? Chinatoŋojokaŋa natoŋojokaŋaa mwaya chisemwa chaheseki, mwaka nili nami aha eŋa, aha nehi, tahindi?

¹⁸Chochashinshikayi Nzambi, mazu etu itwayilejaŋa hiyakwila aha eŋa, aha neliuku.

¹⁹Mwana kaNzambi Yesu Kristu, ashimwinuwu mukachi kenu kudetu, kudami nawaSilasi naTimotewu, hadiŋi mukwantadi wakwila aha nindi eŋa, aha nindi neliuku, yena yowu eŋa chikupu.

²⁰Muloŋa hela yikaninu yaNzambi yasweja kuvula, mudi Yesu diyi eŋa, mudi yena dimu mwekala Amena, kulonda

²¹Nzambi ekali walema hansaŋu yetu. Ichi dinu, watukoleshaŋa nanenu mudi Kristu, watuwayishili, diyi Nzambi.

²²Diyi nawa watufundili mufunda, watwinkeli chikilu chaSpiritu munyichima yetu.

²³Nasanyiki Nzambi wamonaŋa muchima wami, nami chinalekeli kwinza kuKorinda nalondeli kuyanakena.

²⁴Hituyanyanta akukuhwelela kwenuku, tuyankwashi amuzaŋalu wenu; muloŋa mwakolelaŋa mukukuhwelela.