Read MUKANDA WANZAMBI 2 Makorinte 11 Bible Online

2 Makorinte 11 - MUKANDA WANZAMBI bible

2 Makorinte 11

¹Kuminenu dakuŋiteja kawusupi kanti; chalala, kuminenu dakuŋiteja.

²Muloŋa nayitiyila mukawu, mukawu waNzambi; muloŋanayotesheli kudi nfumwenu wumu, yowu Kristu, kulonda nakayitwali kudi yena neyi chaŋadima walumbuluka wabulahu dehi iyala.

³Ilaŋa natiyi woma, nami hamwaha yitoŋojoka yenu yakayiluwaŋesha, yifumi munsaŋu yalala nimukujila kwekala mudi Kristu, neyi chamudimbiluwu Evu kudi kapela namaanindi.

⁴Muloŋa neyi kukwinza muntu wakushimwina Yesu wacheŋi itwabulili kushimunetu, hela mukutambula spiritu yacheŋi yimwabulili kutambula, hela nsaŋu yayiwahi yacheŋi yimwabulili kutambula, chachiwahi chimukwitejamu.

⁵Natoŋojoki nami hinekala munyima yawapostolu asweja kulema, hela hantuku.

⁶Hela nabulaŋa kuhosha chachiwahi, hinabula maanaku; tunayimwekeshelichu chalala, mwahita yuma yejima, mukachi kawantu ejima.

⁷Komana chinadizozeli, hana hinadiŋi nakuyishimwina nsaŋu yaNzambi yayiwahi chakadi wufwetu nami enu mulemi, natamishili, tahindi?

⁸Neyili yuma yayipompelu yi kwawu, hinukutambula wufwetu kudi wena kulonda niyikalakelenu.

⁹Chinadiŋi nanenu chakadi yuma, hinadiili yuma yamuntuku; muloŋa chenjiluwu ana kwetu afumini kuMasidoniya, anyinkeli yuma yinabulili. Munsaŋu yejima nadilekesheli nami nibuli kudya yuma yenu, ninichi saŋa nadilekeshela.

¹⁰Chineli nsaŋu yaKristu yalala yidi mudami, kwosi muntu wukunlekesha kudisamba munu mumpata yaAkayaku.

¹¹Muloŋanyi? Muloŋa nabula kuyikeŋa, tahindi? Nzambi neluki.

¹²China chinelaŋa dikalu, dichi chinukwila nawa, kulonda owu akeŋa kunyinka muloŋa akaŋanyi, nalondi nimwekeshi nachu wena adisambaŋa nawu elaŋa neyi chitwelaŋa etu.

¹³Muloŋa wenowu hiyapostolu akutwamba, hiyakwakukalakala akudimbana, adifwikŋaŋa neyi hiyapostolu jaKristu.

¹⁴Hichakuhayamaku, muloŋa hela yomweni Satana wadifwikŋaŋa neyi kaŋelu kachejeji.

¹⁵Dichi neyi aŋamba jindi akudifwikŋa neyi akalakalaŋa nyidimu yaloŋa, hichuma chakalaku. Kukumisha kwawu kwakekala mwomwaya nyidimu yawu.

¹⁶Nahoshi cheŋi nami bayi antoŋojoka kudi muntu nindi nasupaku; hela chinekali chochu, antambuli tuhu chakusupa, kulonda ami nawa nidisambuhu chanti.

¹⁷Chinukuhoshichi hinidi nakuhosha chakunleja kudi Mwantaku, chidi neyi chawusupi nanichi chinukukolesha kudisamba.

¹⁸Chadisambanawu antu amavulu mwaya chisemwa chaheseki, ninami nawa nukudisamba.

¹⁹Muloŋa chineli enu aweni muyakwamaana, mwatiyana kuwaha nakwiteja ayisupi.

²⁰Muloŋa neyi muntu wukuyiŋa muwuduŋu, hela wukuyidiila yuma yenu, hela wukuyiya yuma yenu, hela wukudinka wanta, hela wukuyibafula mumesu, mwamwitejaŋa tuhu.

²¹Nahoshi chakudisekesha nachu, chidi neyi hitukweti Ŋovuku. Neyi kudi muntu wukudisamba, ninami nawa nukudisamba; nahoshi kwami chawusupi.

²²HiyaHeberu tahindi? Ninami nawa. HiyaIsarela tahindi? Ninami nawa. Hiyanyana kaAbarahama tahindi? Ninami nawa.

²³Akalakelaŋa Kristu tahindi? Ami nayibadiki. Nukuhosha chidi neyi muntu waandala. Yami muntu inakabakani chasweja, nituleya twasweja kuvula, ninyinkakambu yakaŋanya kuchinda, ni kufwa kwamapampa kakavulu.

²⁴Aŋeteli kudi aYudeya yikoti makumi awana kubula chimu mapampa katanu;

²⁵anhumpwili natubama kasatu; aŋasili malola kamu; nadiŋi mumaatu afwilili mumeji kasatu; ifuku dimu nadiŋi nimwaana niwufuku mumeji akunama.

²⁶Nimajila amavulu, niwoma wahatuloŋa, niwoma watupondu, niwoma wawakwamuza wami, niwoma wawajentili, niwoma wamumukala, niwoma wamwisaŋa, niwoma wahakalunalwŋi, niwoma wamukachi kawana kwetu akutwamba.

²⁷Ni kukabakana nakumona yihuŋu, nikukonkama mafuku amavulu, ninzala, nimpwila, nikubula kudya kakavulu, nimashika, niwuvu.

²⁸Chuma chakubombela kuniyi yuma yahanzi chanlemenenaŋa hefuku hefuku, chochakwakama yipompelu yejima.

²⁹Hinyi nazeyi chakadi kuzeyami? Hinyi anadimbwishuwu chakubula kutiya kutama ami?

³⁰Neyi chinawahi ami kudisamba, nukudisamba nansaŋu yakuzeya kwami.

³¹Nzambi yaMwanta Yesu, yowu Tata yindi, wakisulewaŋa haya nyaka, neluki nindi hinatwambuku.

³²MuDamakasa nguvulu yamwanta Aretasi, wahembeli ŋanda yaDamakasa, nindi ankwati;

³³ilaŋa hiyakunhanwishila munjanina nakunzelumuna hampwembu muchimpaya, nipuluka nikupuluka.