Read MUKANDA WANZAMBI 2 Makorinte 13 Bible Online

2 Makorinte 13 - MUKANDA WANZAMBI bible

2 Makorinte 13

¹Ichi chinukwinzichi kudenu hikapampa kamuchisatu. Kukanwa kawayinsahu ayedi hela asatu, mazu ejima akakoli chikupu.

²Chinayilejeli hinadiŋi nenu kapampa kamuchiyedi, hela hanu hinafumuhu ichi, hinukuleja nawa cheŋi wena anavulumuni ni akwawu ejima nami, neyi nakenza cheŋi hinakayanakenaku;

³neyi munakeŋi mwiluki chikupunenu Kristu wahoshaŋa mudami. Yena hazeya kudenuku, ilaŋa wekala naŋovu mudenu.

⁴Muloŋa yena amupopeleli kukulusu nakuzeya, hakwila kuhanda wahandaŋa naŋovu jaNzambi. Etu nawa twazeya mudi yena, ilaŋa twakahanda chimu nindi naŋovu jaNzambi hansaŋu yenu.

⁵Desekenu ntahi, mutali neyi mudi mukwitiya kwakukuhwelela; dishinshikenu. Muyambi chakwikala Kristu mudenu, tahindi? Indi kwiji mwakinjikewa dehi!

⁶Ilaŋa nakuhweleli nami mwakatwiluka tuhu kwenu nenu hitwakinjikewaku.

⁷Hela twamwekana neyi twakinjikewa, twalombaŋa kudi Nzambi netu mubuli kwila chatama. Hitunalondi kumwekana neyi anatwitejuku, tunalondi enu mwakeli chalumbwa.

⁸Hitunatweshi kwila chuma chakukaŋesha nsaŋu yalalaku, chiŋa kukwasha nsaŋu yalala.

⁹Muloŋa twatiyaloŋa kuwaha chakwila etu twi kali azeya, enu mwikali naŋovu. Twalombaŋa nawa netu enu mwikali alala chikupu.

¹⁰Nasambilaŋahu dehi kuyisonekela yumiyi hanu hinichidi kwacheŋi, kulonda chinakekala nanenu nakabuli kuyihoshola mwaya wanta wanyinkeluwu kudi Mwanta, wakuyikolesha, hiwakuyikisaŋanaku.

¹¹Nkumininaku enu ana kwetu, shakamenu chachiwahi. Ikalenu alala; dikundejenuŋa; ikalenu nayitoŋojoka yoyimu; shakamenu nakuwunda; niNzambi wela nikukeŋa nikuwunda wukwi kala nanenu.

¹²Dimwishenu nachikasa chajila.

¹³Akwakujila ejima anayimwishi.

¹⁴Luwi lwaMwanta Yesu Kristu, nikukeŋa kwaNzambi, nikukundaŋana kwaSpiritu Wajila, kwikali nanenu ejima.