Read MUKANDA WANZAMBI 2 Makorinte 2 Bible Online

2 Makorinte 2 - MUKANDA WANZAMBI bible

2 Makorinte 2

¹Nelili nami hinakenza cheŋi kudenu nakuneŋaku.

²Muloŋa neyi nukuyineŋesha, wukuntiyisha kuwaha nawa hinyi? Netu yowu muntu inaneŋeshi dehi.

³Chinasonekeli mwenomu, nalondeli hinakenza akabuli kunneŋesha kudi antu ateji kuntiyisha kuwaha; Muloŋa natoŋojoki chalala nami chinatiyaloŋa ami kuwaha, ninenu ejima nawa mwatiyaloŋa kuwaha.

⁴Nayisonekeleli namadilu amavulu nilukadi lwakutiya nikumuchima bwi; hinalondeli kuyineŋeshaku, nalondeli nami mwiluki kukeŋa kunaswejaŋa kuyikeŋa.

⁵Neyi hadi muntu naneŋeshi akwawu hiyami ananeŋeshiyuku, naneŋeshi ninenu ejima nawa; nateni tuhu kulonda nibuli kuyikalisha.

⁶Owu muntu chanamubabeshuwu dehi kudi amavulu, chinawani dehi.

⁷Ichi dinu, balumukenu mumwanakeni nikumukundeja, kuchina muntu wudi ochu kuchikika neliuŋu odu danamoniyi.

⁸Dichi nayilembeleli nami mukoleshelenu kukeŋa kwenu.

⁹Chinayisonekeleli nsaŋu oyu, nelili nami niyitompi nachu, nitali neyi mukwovwahila muyuma yejima.

¹⁰Muntu mukwanakenenu nsaŋu, ami nawa nukumwanakena. Nsaŋu yinamwanakeni, namwanakeni hanyijimba yenu kumesu aKristu,

¹¹kulonda Satana abuli kutukwata nansaŋu oyu, muloŋa hitunayambi maaninduku.

¹²Chinashikili kuTirowasi nakushimuna nsaŋu yaKristu yayiwahi, Mwanta waŋenzulwilili chenzelu.

¹³Ami kutwesha kudi wundisha mumuchima wami nehi, nansaŋu yákubula kuwana mana kwami Titusa; hinukuyishalika, hinukuya muMasidoniya.

¹⁴Tumusakililenu Nzambi, watulombolaŋa mafuku ejima muchendu chakutwimikila mushindu mudi Kristu, wcpukaŋa mudetu ivumba dakumwiluka kwonsu nakwonsu.

¹⁵Muloŋa etu tudi nakwipuka kudi Nzambi ivumba daKristu dadiwahi, nikudi antu akuhanda, nikudi antu akunoŋa.

¹⁶Kudi amu tudi nakwipuka ivumba dakufuma kukufwa nakuya kukufwa; kudi amakwawu tudi nakwipuka ivumba dakufuma kuwumi nakuya kuwumi. Yeniyi yuma yakutwesha anyi?

¹⁷Etu hitudi neyi antu amavulu adiheteshaŋa namazu aNzambuku; ilaŋa twahoshaŋa nanyichima yalala, chakudi Nzambi, kumesu aNzambi, mudi Kristu.