Read MUKANDA WANZAMBI 2 Makorinte 3 Bible Online

2 Makorinte 3 - MUKANDA WANZAMBI bible

2 Makorinte 3

¹Tutachiki cheŋi kudishimuna kudenu, tahindi? Hela tutambulaŋa nyikanda yakwinza nachu kudenu, hela yakufuma nachu kudenu, neyi chelaŋawu antu amakwawu, tahindi?

²Enu yenu mukanda wetu wakusoneka munyichima yetu, awiluka, awutaŋaŋa kudi antu ejima.

³Munamwekani neyi mumukanda waKristu wakukalakala kudetu, hiwakusoneka nawulombuku, wakusoneka kudi Spiritu yaNzambi wamumi munyichima yetu yamusunyi, hihamalola awubasaku.

⁴Dimu mutwakuhwelelaŋa Nzambi mudi Kristu.

⁵Hitunatweshi kuhosha netu tukwila chuma naŋovu jetwetu awenuku; Ŋovu jetu jafumaŋa kudi Nzambi hohu.

⁶Yena diyi watwinkeli Ŋovu yakwikala akwakukalakala nsaŋu yachitiyaŋenu chaSpiritu chachiha. Hichansonaku; nsona yajahaŋa, hakwila Spiritu wahandishaŋa.

⁷Mudimu wakufwa wakusoneka, wakubazila hamalola, wenjili nakulema, mwaka anyana kaIsarela hiyakukaŋanya nikushinshika kumesu aMosi, nalubanji lwakulema lwatoŋekeli kumesu indi, kutoŋa nilwena lubanji olu lwadiŋi nakuhita kwalu.

⁸Mudimu waSpiritu hiwukubadika kulemaku?

⁹Neyi mudimu wakuhisha antu wekala walema, komana mudimu wakuleta kuloŋa wukubadika nankashi kulema.

¹⁰Chalala chuma chalemesheluwu kunyaka, chinekali dehi onakadi kulema nanilu lubanji lwasweja kulema nankashi.

¹¹Neyi chuma chadiŋi nakuhita chadiŋi chalema, komana chuma chikushakama chikubadika kulema nankashi.

¹²Dichi chitwachiŋejaŋa kulemiku, twahoshaŋa chakadi woma.

¹³Hitudi neyi Mosi wabutili ihina kumesu indi, kulonda anyana kaIsarela akaŋanyi kushinshika hakuya nakukumina chuma chadiŋi nakuhitaku.

¹⁴Yitoŋojoka yawu yachinchikili; hela kwifuku dalelu kwaamu, hataŋaŋawu chitiyaŋenu chachikulu, ihinodu dichidi kuyibuta; katataka dinatwesheki kufuma mudi Kristu.

¹⁵Chataŋaŋawu Mosi, ihina dakubuta saŋa dekalila kunyichima yawu nikwifuku dalelu.

¹⁶Hamba kabalumukawu nakutala kudi Mwanta, dihu hakafumishawu ihinodu.

¹⁷Mwanta diyi Spiritu; kwekala Spiritu yaMwanta diku kwekala waana.

¹⁸Hakwinza etu ejima twamwekeshaŋa lubanji lwakulema kwaMwanta neyi chibanjilu, namesu akadi kubuta; twenda tubalumuka neyi chekalayi Mwanta, tufuma kulubanji lumu, tuya nikulubanji lukwawu, chakufuma kudi Mwanta diyi Spiritu.