Read MUKANDA WANZAMBI 2 Makorinte 5 Bible Online

2 Makorinte 5 - MUKANDA WANZAMBI bible

2 Makorinte 5

¹Tuneluki netu itala detu dahanu hamaseki detenti, neyi dikushiwuka, tukweti itala dakutuŋa kudi Nzambi, dakadi kutuŋa namakasa, dahayanyaka mumawulu.

²Muloŋa chalala mwitenti idi twaabaŋa, twakeŋa aŋa nankashi netu akatuvwiki itala detu dakwiwulu;

³kulonda chakatuvwikawu, akabuli kutuwana nzekesi.

⁴Muloŋa chalala etu tudi mwitenti idi twaabaŋa, twatiyaloŋa kulema; hitunakeŋi netu akatuvúuluku, ilaŋa netu akatuvwiki, kulonda ichi chanoŋaŋa akachiminyi kudi wumi.

⁵Iwu watwilili chumichi Nzambi, watwinkeli chikilu chaSpiritu.

⁶Dichi dinu, twadinkaŋaku mafuku ejima, muloŋa tuneluki netu, hituchidi kushakama mumujimba, hitwashakamaŋa naMwantaku;

⁷muloŋa twendaŋa kwanakukuhwelela hohu, hichakumona namesuku.

⁸Neli nami etu twadinkaŋaku, tunakeŋi netu chachiwahi tubuli kushakama mumujimba, tushakami kweetu naMwanta.

⁹Dichi hela tudi kweetu, hela tudi kwacheŋi, twashaŋa muchima netu tumutiyishaŋa yena kuwaha.

¹⁰Wejima wetu chiŋa twakamwekana kwitanda daKristu dakusompela; kulonda twakatambuli yuma yitwelili hitwadiŋi munyijimba hamuntu hamuntu, iwu mweliliyi, iwu mweliliyi, hela yayiwahi hela yatama.

¹¹Chitweluka kutiya Mwanta woma, dihu hanafumi kushinjila antu; ilaŋa tunamwekani kudi Nzambi, nakuhweleli nami tunamwekani nikuchinleji chamuchima wenu nawa.

¹²Hitukudishimuna cheŋi kudenu netu mutwitejuku, ilaŋa tukuyileja nsaŋu yakudisambila hadetu, kulonda mwakamoni chakuyakula nachu antu akudisamba chakumesu, bayi chakumuchimaku.

¹³Muloŋa hela twaandala, twamwandela Nzambi; hela twawundisha mumesu, tunalondi enu.

¹⁴Kukeŋa kwaKristu kwatukakejaŋa; muloŋa tuneluki chalala netu wumu chafwililiyi antu ejima, dichi niejima afwili.

¹⁵Wafwilili ejima kulonda antu akuhanda abuli kudi handila cheŋi awenawu, amuhandilaŋa yena wayifwilili, wasaŋukili mudi afu.

¹⁶Dichi kufumisha kulelu hituneluki muntu chadiyi mumujimbaku; hela twelukili Kristu chadiŋiyi mumujimba, katataka hitwamwiluka nawa cheŋi chochochuku.

¹⁷Dichi muntu wudi mudi Kristu, anamuleŋi dehi chachiha; yuma yayikulu yinahiti dehi, komana yuma yejima yinabalumuki dehi yayiha.

¹⁸Ilaŋa yuma yejima yakudi Nzambi, watukundamishili kudi yomweni mudi Kristu, watwinkeli mudimu wakushimuna nsaŋu yakukundamisha;

¹⁹yadiŋiyi Nzambi mudi Kristu nakukundamisha antu ampata yamunu mwishina kudi yomweni, nákubula kuyifuukwila nyiloŋa yawu; natukunjiki mazu akukundamisha.

²⁰Dichi etu tuyatuŋanda twaKristu; chidi neyi Nzambi hakuyilembelela mudetu. Hitukuyilembelela hamujimba waKristu netu, kundamenu kudi Nzambi.

²¹Iwu Yesu wabulili kwiluka nshidi, diyi elishiliyi ekali nshidi kukoola etu, kulonda etu twi kali kuloŋa kwaNzambi mudi yena.