Read MUKANDA WANZAMBI 2 Makorinte 6 Bible Online

2 Makorinte 6 - MUKANDA WANZAMBI bible

2 Makorinte 6

¹Chitukukalakala chimu nindi, hitukuyilembelela netu, bayi mutambula luwi lwaNzambi chamukunkulwayuku.

²Muloŋa yena neli nindi, Nakwakwili hampinji yayiwahi, nakukwashili mwifuku dawamwinu. Tiyenu, hanu dihu hampinji yayiwahi tiyenu, hanu hiifuku dawamwinu.

³Bayi mwila chuma chakudimbwisha nachu muntu hela chimuku, kulonda mudimu wetu abuli kuwumona kutama.

⁴Twadimwekeshaŋa mwakwila nawu tuyakwakukalakala mudimu waNzambi muyuma yejima; mukutatakena nankashi, nimuyihuŋu, nimukubula yuma, nimukukala,

⁵nimunyinkakambu, ninamutuleya, nimumapumba, nimukukabakana, nimukukonkama, nimukubula kudya;

⁶nansaŋu yakutooka muchima, nakwiluka, nakudiwunjika, nakukokweja, naSpiritu Wajila, nakukeŋa kwakadi kudimbana;

⁷nimumazu ansaŋu yalala, naŋovu jaNzambi; ninayitwa yakuloŋa yachikasa chachidiilu, niyachikasa chachimunswa.

⁸Aha kutulemesha, aha kutusawula, aha kututena chatama, aha kututena chachiwahi. Nawu twadimbanaŋa, komana tuyantu alala;

⁹nawu tuyantu abula kwilukewa, komana yetu elukawu dehi; nawu tuyantu akufwa, komana twahanda. Tudi neyi antu akubabeshewa, komana kutujaha nehi;

¹⁰tudi neyi antu aneŋaŋa, komana etu twazaŋalalaŋa mafuku ejima; tudi neyi atuzweŋi, komana yetu twaheteshaŋa antu amavulu; tudi neyi antu abula yuma, komana twaheta yuma yejima.

¹¹Enu akwetu aKorinda, hitukuyijinda chumaku, muchima wetu wunasweji kuvikeŋa.

¹²Himunakaŋenyi mudetuku, munakaŋenyi mukukeŋa kwenwenu aweni.

¹³Ninenu nawa swejeshenumu; nahoshi neyi chakuhosha nawanyana.

¹⁴Bayi mudibomba nawabula kwitiya mumpanda yoyimuku. Kuloŋa nakuluwa akutwesha kulondaŋana? Hela chejeji namwidima akutwesha kutiyaloŋana?

¹⁵Kristu nawantu atama akutwesha kutiyaloŋana? Mukwakwitiya wukutwesha kudibomba ŋahi namuntu wabula kwitiya?

¹⁶Hela tembeli yaNzambi yikutwesha kutiyaloŋana ŋahi nawakishi? Muloŋa etu yetu tembeli yaNzambi wamumi, mwomwahoshayi dehi Nzambi nindi, Nukushakama mukachi kawu, nukwenda mukachi kawu, nukwi kala Nzambi yawu, niwena akwikala antu ami.

¹⁷Dichi dinu Yehova nahoshi nindi, Fumenu mukachi kawu, ambukenumu, bayi mukunka kuchuma chatamaku, ninami nukuyitambula;

¹⁸nukwi kala Tata yenu, ninenu mukwi kala anyanami amayala nawambanda; dichi chanahoshiyi Yehova Watwesha yejima.