Read MUKANDA WANZAMBI 2 Makorinte 8 Bible Online

2 Makorinte 8 - MUKANDA WANZAMBI bible

2 Makorinte 8

¹Dichi dinu enu ana kwetu, hitukuyileja luwi lwaNzambi lwanenkuwu kuyipompelu yamuMasidoniya.

²Luwi lwakwila, iku adi nakuyitompa nankashi nalukadi, hela neyi aswejeli wuzweŋi, hiyakutiya muzaŋalu wakuhana mahetawu.

³Muloŋa ami nukutwesha kushimunamu nami ahanini chakunyichima yawu mwatwesheluwu, hela chakubadika mwatwesheleluwu.

⁴Hiyakutulembelela nakulembelela kwakweni nawu ayiteji kukundaŋana nawu nakukwasha akwakujila.

⁵Bayi mutwakuhweleleli etu hohuku, ásambilili dehi kudi hana kudi Mwanta awenawu, nikudetu nawa chakumuchima waNzambi.

⁶Dichi hitukumushinjila Titusa, netu amanishi mudenu iwu mudimu waluwi watachikiliyi dehi.

⁷Ichi chimuneli munabadiki dehi muyuma yejima, nimukukuhwelela, nimukuhosha, nimukwiluka, nimukusweja Ŋovu, nimukukeŋa kumwatukeŋaŋa, netu badikenu nimuluwi ilu nawa.

⁸Hitunayileji chalushimbuku, ilaŋa chinamoni Ŋovu jawantu amakwawu jinasweji, natoŋojoki nami nitompi nachu kukeŋa kwenu nawa, nimoni neyi kwalala.

⁹Muneluki luwi lwaMwanta wetu Yesu Kristu, lwakwila hela wadiŋi waheta, hakwikala kazweŋi kukoolenu, kulonda kuwuzweŋi windi enu mwakekali aheta.

¹⁰Nukuyileja munatoŋojokeli nsaŋu iyi, nami, chinawahi kumanisha chuma chimwatachikili kwila munahiti dehi mwaka, nikukeŋa kwilamu nawa;

¹¹kulonda muchima wakukeŋa kwila wesekani nakumanisha kwila, mwesekela yuma yimudi nayu.

¹²Muloŋa neyi kudi muchima wakuhana, akutambula mwahetelayi muntu, bayi mwabulilayuku.

¹³Hinalondi nami antu amakwawu atiyi kuwaha enu mutiyilumu kukalaku.

¹⁴Hinsaŋuyakwesekana. Yuma yenu yayivulu yakatataka, yikwashi akwenu mwonsu mwanabuluwu, kulonda yuma yawu yayivulu yakakwashi enu himwakabuli nawa, kulonda chakesekani.

¹⁵Anasoneki mumukanda wajila nawu, Muntu wakuŋwili yayivulu hiyamuswejeleluku; muntu wakuŋwili yantesha hiyamukeheleluku.

¹⁶Tumusakililenu Nzambi washili mumuchima waTitusa chakuyakama mwenimu.

¹⁷Muloŋa hakuminini dakwitiya mutwakeŋa eli etu hohuku, yomwenindi waswejeli kutiya kuwaha kwinza kudenu chakumuchima windi.

¹⁸Tunamutemeshi chimu namana kwetu watiyakana dehi muyipompelu yejima, nawu wasweja kushimuna osaŋu yayiwahi.

¹⁹Hidimu hohu bweŋuku, niakwayipompelu anamukunjiki kuya nanetu mumudimu iwu waluwi wutukwila, kulonda Mwanta alemi, kulonda kumwekesha nachu muchima wetu wakukeŋa kwila.

²⁰Tunachini kutwinka muloŋa wansaŋu jachenichi chamukunkulu chitukutwala.

²¹Twalondaŋa yuma yalumbuluka kumesu aMwanta ni kumesu awantu nawa.

²²Tunayitemeshi chimu namana kwetu itunatompi dehi kakavulu, netu washaŋa muchima kunsaŋu jajivulu, katataka nabadiki dehi, muloŋa nasweji dehi kuyikuhwelelenu.

²³Neyi akwihula nsaŋu yaTitusa, diyi mukwetu nadikwashaŋa nindi mudimu wakuyikalakelenu; ninowu ana kwetu nawa, hiyantemesha ayipompelu, dimu mwalemenayi Kristu.

²⁴Dichi mwckeshenu kukeŋa kwenu muyipompelu, nanichi chitwadisambaŋa hansaŋu yenu.