Read MUKANDA WANZAMBI Magalata 1 Bible Online

Magalata 1 - MUKANDA WANZAMBI bible

Magalata 1

¹Ami Pawulu kapostolu, hichakufuma kudi antuku, hela chakunleja kudi muntuku, ilaŋa chakunleja kudi Yesu Kristu, nikudi Nzambi, yowu Tata, wamusapwili mudi afu.

²Ami Pawulu, niana kwetu inidi nawu ejima, tudi nakuyisonekela mukanda, enu akwayipompelu yamuŊalija.

³Luwi lwikali nanenu nikuwunda kwakufuma kudi Nzambi, Tata, nikudi Mwanta wetu Yesu Kristu;

⁴wadiheni yomweni kukoola nyiloŋa yetu, kulonda atupulwishi kunyaka yamakonu yatama, mwaya muchima waNzambi yetu, yowu Tata.

⁵Kulema kwikali kwindi haya nyaka nanyaka. Amena.

⁶Nahayami chimunanyakali kuleka yena wayitambikili muluwi lwaKristu, mulondi nsaŋu yacheŋi.

⁷Hinsaŋu yayiwahi yikwawuku, adi nakuyikabisha kudi antu amakwawu nawu aheŋeshi nsaŋu yaKristu yayiwahi.

⁸Hakwila neyi etu, hela kapelu wukufuma mwiwulu, wukuyishimwina nsaŋu yayiwahi yacheŋi yitwabulili kuyishimwinetu, ekali washiŋewa.

⁹Mutunahoshi dehi nukuhoshamu nawa cheŋi nami, muntu wukuyishimwina nsaŋu yayiwahi yacheŋi yimwabulili kutambula, ekali washiŋewa.

¹⁰Nelaŋa nami anmonaŋa kuwaha kudi antu, tahindi kudi Nzambi? Nalondaŋa nami nitiyishi antu kuwaha, tahindi? Neyi nichidi saŋa natiyishila antu kuwaha, hinukwikala nduŋu yaKristuku.

¹¹Enu ana kwetu, nakeŋi kuyileja nami nsaŋu yayiwahi yinashimwinami, hiyafuma kumuchima wamuntuku.

¹²Hinayitambwili kudi muntuku, hela kunleja hiyanlejeli kudi muntuku; yakunmwekeshela kudi Yesu Kristu.

¹³Enu aweni mwatiya dehi munashakamini hamwaka nakulonda yijila yawaYudeya, ninichi chinaswejelaŋa nankashi kukabisha chipompelu chaNzambi nikuchikisaŋana.

¹⁴Muyijila yawaYudeya nabadikili akwamuza wami amavulu inabwambukili nawu; muloŋa mumuchima wami naswejeli iyena dakwila mwaya yaaku yawankakulula jami.

¹⁵Ilaŋa Nzambi, wanjilikili dehi kufumisha hinavwalikili, wantambikili mwaya luwi lwindi,

¹⁶hatiyiliyi kuwaha kumwekesha Mwanindi mudami, kulonda nimushimunaŋa mukachi kawajentili, hineliwili muntuku,

¹⁷hela tuhu kuya kuYerusalema kudi wena asambilila ŋahu dehi kwikala apostolu, ami kanda, hinayili kwoku; nafuminuku hinukuya muArabiya, hinukufunta cheŋi kuDamakasa.

¹⁸Chimunahiti nyaka yisatu, hinukukanduka kuYerusalema, nami nakahempuli Petulu, hinukushakama nindi mafuku ikumi natanu.

¹⁹Hakwinza apostolu amakwawu hinayimweni kwamuku, chiŋa yowu mana kwaMwanta, Yakoba.

²⁰Tiyenu, nsaŋu yinukuyisonekela hinatwambuku, Nzambi neluki.

²¹Nkumininaku nenjili kumutamba waSiriya niwaSilisiya.

²²Henohu akwayipompelu yamuYudeya adiŋi mudi Kristu achidi kanda aŋiluki.

²³Akuminini dakuntiya hohu, nawu iwu wadiŋi nakutukabisha hamwaka, katataka hakushimuna kwitiya kwakukuhwelela kwakisaŋenaŋayi.

²⁴Hiyakulemeshela Nzambi hamujimba wamami.