Read MUKANDA WANZAMBI Magalata 2 Bible Online

Magalata 2 - MUKANDA WANZAMBI bible

Magalata 2

¹Chimunahiti nyaka ikumi nayiwana, hinukukanduka cheŋi kuYerusalema naBaranaba, tusenda niTitusa.

²Nayili chakunleja nachimwekeshu; hinukuyilumbulwila nsaŋu yayiwahi yinashimunaŋa mukachi kawajentili, ilaŋa akwetu alema nalejeli kwakanka wetu, kuchina kutemuka tuhu chamukunkulwayi, indi kwiji natemuki dehi chamukunkulwayi diyi Kefwasi.

³Kaŋanyahu kaHeleni Titusa nadiŋilaŋa nindi, hiyamukakejeli nawu amwalamishuku.

⁴Nsaŋu oyu yasaŋumukili nawana kwetu akutwamba eŋŋiluwu kumbadi. Eŋilili kumbadi kulonda amoni waana wetu wamudi Kristu Yesu, nawu atwiŋiji muwuduŋu.

⁵Hitwayovwahilili hela mpinji yanteshaku, kulonda mukoleli munsaŋu yayiwahi yalala.

⁶Hakwila wenawa antu adiŋi atiyakana nawu alema; hela alema hinayishili kwami kumuchimaku, Nzambi haakamaŋa antu kumesuku; nami wenawa antu adiŋi atiyakana hiyanshililuku nsaŋu yikwawuku.

⁷Kwakulehi! Ilaŋa chamwenuwu nawu anankunjiki kushimuna nsaŋu yayiwahi kudi ayidima, mwomwamukunji kiluwu Petulu kushimuna nsaŋu yayiwahi kudi akwakwalama, hiyakutukiswila nkisu.

⁸Muloŋa iwu wakoŋeli mudi Petulu yakumutemesha kudi akwakwalama, diyi nawa wakoŋeli mudami yakuntemesha kudi ajentili.

⁹AYakoba naPetulu niYowanu, amwekeni neyi yishimi, chamwenuwu luwi lwanyinkeluwu, hiyakutwinka etu naBaranaba makasa achidiilu akukundaŋana, nawu enu muyi kudi ajentili, etu tuyi kudi akwakwalama.

¹⁰Akuminini dakutuleja izu dakwila nawu chiŋa twanukaŋa atuzweŋi; mwomu nawa nadiŋi nakukeŋa nankashi.

¹¹Ilaŋa chashikiliyi Petulu kuAntiyoki, nadikaŋili kumesu indi, muloŋa wadiŋi namuloŋa.

¹²Muloŋa heliluwu antu afumini kudi Yakoba achidi kanda enzi, wadiilaŋa nawajentili. Ilaŋa chanenzuwu wena, yena Petulu hakufumamu, hakwambuka kudi ajentili, muŋa natiyi dehi akwakwalama woma.

¹³NiaYudeya asheluku hiyakudimbana mwomumu nayena, kudimbana kwakwila niBaranaba nawa niyena hakuhuŋumuka chimu nawu.

¹⁴Dichi ami chinamweni adi nakwila mwabula kuya nsaŋu yayiwahi yalala, hinukumwila Petulu kumesu awakwawu ejima nami, Eyi kaYudeya hiwashakamaŋa mwaya wuYudeyaku, washakamaŋa neyi kaJentili, wakakejelaŋadi ajentili, neyi ashakami neyi chashakamaŋawu aYudeya?

¹⁵Etu twela kuchisemwa chetu tudi aYudeya, hitudi kwetu ajentili akwanshiduku,

¹⁶yetu tuneluki netu muntu hakutwesha kubalumuka kwikala waloŋa nanyidimu yanshimbuku, chiŋa nakumukuhwelela Yesu Kristu hohu; ninetu aweni tunamwitiyili Kristu Yesu kulonda tuloŋa nakukuhwelela Kristu, bayi nanyidimu yanshimbuku. Muloŋa hikudi muntu wukuloŋa nanyidimu yanshimbuku.

¹⁷Etu twakeŋa eli kwikala aloŋa mudi Kristu, neyi akutumona nawu tudi akwanshidi, komana Kristu diyi wakoŋeshaŋa antu nshidi, tahindi? Chinjila!

¹⁸Neyi nukutuŋiulula cheŋi yuma yinakisaŋeni, nadi mwekeshi dehi kwikala mukwakuvulumuna.

¹⁹Muloŋa ami kunshimbi nimufu hamudimu wanshimbi, kulonda nimuhandili Nzambi.

²⁰Ampopela dehi kukulusu hamu naKristu, ilaŋa nahanda; hiyami nawaku, Kristu diyi wahandilaŋa mudami. Chinahandaŋa mumujimba nahandaŋa mukwitiya kwakukuhwelela Mwana kaNzambi, wankeŋeli, wadiheni kunkoolami.

²¹Hinadiwulaŋa luwi lwaNzambuku; Muloŋa neyi kuloŋa kwenzaŋa kunshimbi, komana Kristu wafwili tuhu kwindi.