Read MUKANDA WANZAMBI Magalata 3 Bible Online

Magalata 3 - MUKANDA WANZAMBI bible

Magalata 3

¹Enu aŋaŋa, o chimwabula maana! Wayiloweli hinyi, enu antu amwekesheleluwu dehi Yesu Kristu hatooka, saŋa amupopelawu kukulusu?

²Nakeŋi kuyihula chuma chimu hohu nami, Spiritu mwatambwili nanyidimu yanshimbi, tahindi nakutiya nsaŋu yakukuhwelela himukwitiya?

³Munabulilidi maana? Kutachika mutachiki mudi Spiritu, mukunrishi kwenu nachisemwa chaheseki?

⁴Yina yuma yayivulu yimwadiŋi nakukabakana, komana mwayi kabakenaŋa tuhu kwenu, tahindi? Neyi dimu, komana chadiŋi chamukunkulwayi.

⁵Dichi yena wayinkaŋa a Spiritu, wakoŋaŋa nyidimu yaŋovu mukachi kenu, wachilaŋa nanyidimu yanshimbi, tahindi nakutiya nsaŋu yakukuhwelela himukwitiya?

⁶Abarahama chamwitiyiliyi Nzambi, Nzambi hakumufuukwilachu nindi hikuloŋa.

⁷Dichi ilukenu nenu antu akukuhwelela diwu anyana kaAbarahama.

⁸Mukanda wajila, chiwatenenaŋahu dehi nawu Nzambi wakabalumuna ajentili kwikala aloŋa nakukuhwelela, hakushimuna ŋahu dehi kudi Abarahama nsaŋu yayiwahi, nindi, Nyuza yejima yakakoolekela mudeyi.

⁹Nochu antu akukuhwelela, anakooleki dehi hamu naAbarahama wakuhweleleli.

¹⁰Ejima akuhwelelaŋa nyidimu yanshimbi, anekali dehi akwakushiŋewa; muloŋa anasoneki nawu, Muntu wukubula kukakela nikwila yuma yejima yanasonekuwu mumukanda wanshimbi, amushiŋi.

¹¹Dichi dinu chinalumbuluki chakwila nawu, hikwekala muntu wukubalumuka kwikala waloŋa nanshimbi kumesu aNzambuku. Muloŋa nawu, Mukwakuloŋa wakahanda nakwitiya kwakukuhwelela.

¹²Nshimbi hikukuhwelelaku; ilaŋa nawu, muntu welaŋa nshimbi diyi wakahandilamu.

¹³Kristu watukúulili kukushiŋa kwanshimbi kwatushiŋiluwu, nanochu chamubalumwinuwu kwikala washiŋewa hansaŋu yetwetu. Muloŋa anasoneki nawu, muntu akukudikawu kumutondu washiŋewa.

¹⁴Kulonda kukooleka kwakoolekeliyi Abarahama kwakenzi hadi ajentili mudi Kristu Yesu; kulonda tutambuli Spiritu akaniniyi nakukuhwelela.

¹⁵Enu ana kwetu, hinukuhosha mwahoshaŋawu antu. Hela chitiyaŋenu chamuntu, neyi anachikoleshi dehi hiyachidiwulaŋa kudi muntu, hela kusha kwokuku.

¹⁶Yikaninu akanini Abarahama namwanindi. Hiyateneni anyana neyi kwiji amavuluku; ateneni kwawumu hohu nawu, Mwaneyi; diyi Kristu.

¹⁷Dichi chinukwila nami nshimbi jenjili munahiti dehi nyaka makulakaji awana namakumi asatu nahatiyaŋeniyi Nzambi naAbarahama, hijikutwesha kujaha chitiyaŋenu chakolesheliyi Nzambuku, mwaka azeyeshi chikaninu chili chamukunkulwayi.

¹⁸Muloŋa neyi wuswana wekala kwawu kunshimbi, komana hiwakukana nawaku; ilaŋa Nzambi wamwinkeluwu Abarahama chakukana.

¹⁹Nshimbi hichumanyi? Ajishililuku nsaŋu janyiloŋa nichamba kenza Mwana akaninuwu dehi kudi Nzambi. Nshimbi jenjili nawaŋelu kuchikasa chehaku.

²⁰Ichi dinu ihaku hiihaku wawumuku; ilaŋa Nzambi diyi wumu.

²¹Nshimbi jalekeshaŋa yikaninu yaNzambi, tahindi? Chinjila! Neyi aheni lushimbi lwatwesheli kuhandisha, mutenowu chalala kuloŋa kwenjili kwokunshimbi.

²²Ilaŋa mukanda wajila wunakasi yuma yejima muŊovu yanshidi, kulonda chikaninu chakukuhwelela Yesu Kristu chiikali chambala chanawa akwitiya.

²³Ilaŋa hadiŋi kukuhwelela kanda kwinzi, atukasili naŋovu yanshimbi, atupatili kushika nihamba kamwekeshawu kukuhwelela.

²⁴Dichi nshimbi diyi nkuluŋaŋa yetu ndo nichenjiliyi Kristu, kulonda tubalumuki kwikala aloŋa nakukuhwelela.

²⁵Ilaŋa ichi chinenzi dehi kukuhwelela, hitwekala nawa cheŋi nankuluŋaŋaku.

²⁶Muloŋa mudi Kristu Yesu enu ejima mwela dehi anyana kaNzambi nakukuhwelela.

²⁷Muloŋa wejima wenu ayipapatishili mwiŋili mudi Kristu, munadivwiki Kristu.

²⁸Hikukutwesha kwikala cheŋi kaYudeya hela kaHelenuku; hikukutwesha kwikala cheŋi nduŋu hela wabula wuduŋuku; hikukutwesha kwikala cheŋi iyala hela mumbandaku; wejima wenu munekali wumu mudi Kristu Yesu.

²⁹Neyi munekali ambala aKristu, komana munekali dehi anyana kaAbarahama, muyanswana achikaninu.