Read MUKANDA WANZAMBI Magalata 4 Bible Online

Magalata 4 - MUKANDA WANZAMBI bible

Magalata 4

¹Ilaŋa mi nami, helaŋa nswana wuchidi kansi, hashiyaloŋanaŋa nandunuku, kutoŋa diyi mwanta wayuma yejima;

²ilaŋa wakuminaŋa dakwovwahila amuhembaŋa niatulama, nihakashika mwaka watoŋolayi tata yindi.

³Ninetu nawa, chitwadiŋi atwansi, twadiŋi muwuduŋu wayuma yampata yamunu mwishina yakuhemesha;

⁴ilaŋa mwaka chiwashikili chikupu, Nzambi hakutemesha Mwanindi, amuvweli kudi mumbanda, amuvweli kunshimbi;

⁵kulonda akakúuli antu adiŋi kunshimbi, kulonda twakatambuli waana wakwikala anyana kambala.

⁶Chimunekali dehi anyana kambala, Nzambi atemesha niSpiritu yaMwanindi munyichima yetu nindi, Aba, Tata.

⁷Dichi hiwudi nawa cheŋi nduŋuku, wumwana; neyi wumwana komana wunswana wakuswanisha kudi Nzambi.

⁸Hamwaka chimwabulili kumwiluka Nzambi, mwadiŋi anduŋu jawabula kwikala Nzambi.

⁹Hakwila ichi chimunamwiluki dehi Nzambi, wata Nzambi diyi wayilukenu, muloŋanyi mukufuntila nawa cheŋi kuyuma yakuhemesha yazeya yawuzweŋi, mwaka mukeŋi kwijila cheŋi muwuduŋu wayu?

¹⁰Mwajilikaŋa mafuku, nitukweji, niyilaaka, ninyaka.

¹¹Natiyi woma nami hadaha nayikabakeneni tuhu chamukunkulwayi.

¹²Enu ana kwetu, nayilembeleli nami ikalenu neyi ami, muloŋa ami nidi neyi enu. Himwaŋilili chatamaku.

¹³Enu aweni mweluka dehi chuma chaletesheli kuyishimwina nsaŋu yayiwahi hakusambila, chochayikatu yami.

¹⁴China chuma chamumujimba wami chimwamweni kutama, himwachisekesheli, hela kuchisawulaku; mwakuminini dakuntambula neyi chakutambula kapelu kaNzambi, neyi yomweni Kristu Yesu.

¹⁵Kukooleka kumwateneni kunayi dehi mudihi? Tiyenu niyileji chuma chinayimweni, nami neyi chatweshekeli, mutenowu mwantubwilili mesu enu himukunyinkawu ami.

¹⁶Ami nabalumuki dehi kwikala mukwankunyi nenu nanichi chinayilejaŋa mwalala, tahindi?

¹⁷Kulemesha kwaswejaŋawu kuyilemesha hikwayaloŋa mwamuwahuku; analondi kuyambula nachu kulonda kuyilemeshaŋa wena.

¹⁸Chachiwahi kulemesha muchawahila mafuku ejima, bayi chinukwikala nenu hohuku.

¹⁹Enu anyanami anyanya, inukumwena cheŋi nyisoŋu yakuvwala nichimwamba kabalumuka nakufwana neyi Kristu!

²⁰Eŋa, neyi nadiŋi nenu katataka mutenowu nabalumuni dehi niizu dami, muloŋa nidi nakuyijinoka.

²¹Enu mwakeŋa a kwikala kunshimbi, nlejenu; nshimbi jajeni himwajitiyaloŋaku, tahindi?

²²Muloŋa nasoneki nawu, Abarahama wadiŋi nawanyanindi amayala ayedi, iwu wakudi mumbanda wanduŋu, mukwawu wakudi mumbanda wesumbu.

²³Iwu wakudi mumbanda wanduŋu wavwalikili chakumujimba; hakwinza owu wavwalikili kudi mumbanda wesumbu wadiŋi wakukana.

²⁴Yena yumiyi hichishimu; muloŋa wenawa ambanda hiyitiyaŋenu yiyedi; chimu chakufuma kumpidi yaSinayi, diyi Haga wavwalaŋa anyana awuduŋu.

²⁵Iwu Haga diyi mpidi yaSinayi yamuArabiya, kafwampi diyi Yerusalema yamakonu, muloŋa yena wudi muwuduŋu nawanyanindi.

²⁶Hakwila Yerusalema yakwiwulu hiyekala muwuduŋuku, diyi mama yetwetu.

²⁷Muloŋa nasoneki nawu, Eyi nshinta, wabulilaŋa kuvwala anyana, zapalalaku. Eyi wabulilaŋa kutiya nyisoŋu yakuvwala, bulaku nyipula nikwimba tumina; muloŋa anyana kamumbanda analekuwu anabadiki anyana kamumbanda wesumbu kuvula.

²⁸Enu ana kwetu tudi anyana achikaninu neyi chadiŋiyi Isaka.

²⁹Chelili owu wavwalikili chakumujimba hakukabisha owu wakudi Spiritu, dichi chelaŋawu nilelu.

³⁰Mumukanda wajila nawudi? Nawu, Mutemuni iwu nduŋu nimwanindi hamu; Muloŋa mwana kayeniwu nduŋu hakutwesha kuswanina hamu namwana kamumbanda wesumbuku.

³¹Dichi enu ana kwetu, etu hituyanyana kamumbanda wanduŋuku, tuyanyana kamumbanda wesumbu.