Read MUKANDA WANZAMBI Magalata 5 Bible Online

Magalata 5 - MUKANDA WANZAMBI bible

Magalata 5

¹Kristu watufumisha dehi muwuduŋu; dichi shimatenu chakola, bayi mudikasila cheŋi mumpanda yawuduŋuku.

²Tiyenu, ami Pawulu nukuyila nami, Neyi akuyalamisha himwakamwena chuma mudi Kristuku.

³Mwamweni, nikushimwina nawa cheŋi amayala ejima akwalamishawu, nami anekali dehi nachidika chakwila nshimbi jejima.

⁴Enu mukukeŋa kwikala aloŋa nanshimbi, munaketuki dehi kudi Kristu, munasenuki dehi nawa munjila yaluwi.

⁵Muloŋa etu kwetu twachiŋililaŋa kuloŋa kutwachiŋejaŋa, kutunatambwili kudi Spiritu nakukuhwelela.

⁶Muloŋa mudi Kristu Yesu, kwalama hela kubula kwalama hikwakwashapaku, chiŋa yowu kukuhwelela kwakalakalaŋa nakukeŋa hohu.

⁷Mwadiŋi nakutemuka chachiwahi, ayilekesheluku kudinyi, mwaka muleki kwovwahila nsaŋu yalala?

⁸Kukanjikŋa kwanayikanji kŋuwu, hikunafumi kudi yena wayitambikaku.

⁹Iluŋi dantesha dananishaŋa chikanka chejima.

¹⁰Nayikuhweleleli mudi Mwanta, nami himukutoŋojoka mwacheŋuku; hakwila muntu wayikabishaŋa ochu wakawana muloŋa, yonsu akawanawu yowu.

¹¹Ilaŋa enu ana kwetu, neyi ami nichidi kushimuna kwalama, adi nakunkabishiladi nihanu? Neyi chadiŋi ochu, komana ninsonyi yakulusu yinahiti dehi.

¹²Mutenowu ayiluwaŋeshaŋa adi kudiketula awenawu!

¹³Muloŋa enu ana kwetu, ayitambikilili kwenu waana. Ichi chimunabuli wuduŋu, bayi muchibalumuna chiikali chakukwasha nachu chisemwa chahesekuku; ikalenu kwenu akwakudikalakela wumu namukwawu mukukeŋa.

¹⁴Muloŋa nshimbi jejima jahwilaŋa mulushimbi lumu lwakwila nawu, Keŋaku mukwenu neyi chiwadikeŋa eyi aweni.

¹⁵Kwinza neyi mukudisumona nakudidya wumu namukwawu, babalenu kuchina kudijilisha wumu namukwawu.

¹⁶Ami nami endenuŋa chakuyendesha kudi Spiritu, kulonda mubuli kwila yafwilaŋa chisemwa chaheseki.

¹⁷Muloŋa chisemwa chaheseki chafwilaŋa yabula kukeŋayi Spiritu, niSpiritu nawa wafwilaŋa yabula kukeŋa chisemwa chaheseki; Muloŋa wena, chabula kutiyaloŋanawu wumu namukwawu, alonda kuyikaŋesha kwila yuma yimwakeŋa aŋa kwila.

¹⁸Ilaŋa neyi ayilombolaŋa kudi Spiritu, himudi nawa kunshimbuku.

¹⁹Nyidimu yachisemwa chaheseki hiyakuyambaku. Diyeniyi; wuvumbi, wuzondu wamumuchima, kufwila yatama,

²⁰kupesha, kupanda, kuhelaŋana, kuzuŋa, ichima, madombu, kukokwela kwenu, kudambola, kwitiya nsaŋu yaheŋa,

²¹lwisu, kusheta, yisela, niyuma yidi neyi iyi. Yeniyi nuleuyileja munayilejeli dehi, nami antu akwila mwenimu hiyamba kaswana wanta waNzambi uku.

²²Hakwila nyikabu yaSpiritu yowu kukeŋa, muzaŋalu, kuwunda, kukaba kabe-e, luwi, kuwaha, kushinshika,

²³kwovwaha, kudi hemba. Hikwekala lushimbi lwalekeshaŋa yumiyuku.

²⁴Antu ambala aKristu Yesu apopela dehi chisemwa chaheseki kukulusu, niyuma yatiyaloŋa chisemwa kuwaha, niyafwilaŋayi.

²⁵Neyi tukuhanda chakutuhandisha kudi Spiritu, twendenuŋa nawa chakutwendesha kudi Spiritu.

²⁶Bayi tukeŋa kudilemesha chamukunkulwayuku, tubuli kudivuloka, nikuditiyila ichima.