Read MUKANDA WANZAMBI Maefese 2 Bible Online

Maefese 2 - MUKANDA WANZAMBI bible

Maefese 2

¹Ninenu ayihandishili chimwadiŋi afwa nanyiloŋa yenu nanshidi,

²mumwadiŋi nakwenda nakuhuŋumuka mwaya nyaka yamakonu, mwakeŋa a mwanta wamuluzwizu waŋovu, yowu diyabolu, wakoŋeshaŋa katataka mudi akwakujikwa.

³Ninetu ejima nawa mwomutwashakamini nakwila mwafwila chisemwa chetu chaheseki, nakukoŋa mwakeŋa a mujimba nimuchima. Kuchisemwa chaheseki twadiŋi antu atela kuzuwilewa, neyi antu amakwawu.

⁴Ilaŋa Nzambi wasweja kuheta luwi, nakukeŋa kwindi kwabadika kwatukeŋeliyi nachu,

⁵hitwachidiŋi twafwa nanyiloŋa yetu, watuhandishili chimu naKristu. Kuhandoku ayihandisha naluwi hohu.

⁶Watusaŋwili chimu nindi, watushakamishili chimu nindi mumawulu, mudi Kristu Yesu;

⁷kulonda akamwekeshi hanyaka yakenza mahetindi asweja aluwi lwakutukokweja mudi Kristu Yesu.

⁸Muloŋanayihandishi naluwi kwokukukuhwelela; hiyenu awenuku, hichamukunkulu chambala chaNzambi;

⁹hichakunyidimuku, kulonda kubuli muntu wukudisamba.

¹⁰Muloŋa etu tudi wukalawenu windi, atuleŋeleli mudi Kristu Yesu nyidimu yayiwahi yatuloŋeshelelaŋahu dehi kudi Nzambi nindi twendelaŋamu.

¹¹Dichi anukenu chimwadiŋi ajentili hamwaka kuchisemwa, ayitenenaŋa kudi akwachisemwa chakwalama namakasa nawu ayidima.

¹²Mwadiŋi aambuka naKristu; mwadiŋi aambuka nawenimbu wawaIsarela; mwadiŋi enyi akadi kwiluka yitiyaŋenu yayikaninuwu; mwadiŋi akadi ninaha hakuchiŋejela; mwadini antu akadi Nzambi munu mwishina.

¹³Hakwinzichi dinu, enu mwadiŋi kwakulehi anayikundamishi dehi mudi Kristu Yesu namashi aKristu.

¹⁴Muloŋa yena diyi kumwena kwetu, nahumaŋeshi adiŋi ayedi ekali wumu; nahumuni mbaŋu yakwambula yadiŋi hakachi;

¹⁵hakufumisha nkunyi yakwata Ŋovu kunshimbi nikuyijila, mumujimba windi; kulonda hadiŋi antu ayedi, aleŋuhu muntu wamwiha wumu mudi yomweni, kulonda hekali kuwunda;

¹⁶ayikundamishi kudi Nzambi ejima ayedi mumujimba wumu nakulusu, hakujahila nkunyi kwenoku.

¹⁷Wenjili nakushimuna kuwunda kudenu mwadiŋi kwakulehi, niltudi wena adiŋi kwakwihi.

¹⁸Muloŋa mudi yena dimu namutunamweni hawiŋililu wamwaTata, etu ejima ayedi naSpiritu yowumu.

¹⁹Dichi dinu, himudi nawa enyi hela akwetuŋa dacheŋuku; munekali dehi enimbu hamu nawakwakujila, munekali dehi akwetala daNzambi.

²⁰Anayituŋa dehi hachikuku chawapostolu nawatuprofwetu, yomweni Kristu Yesu diyi ilola dakwiwombu.

²¹Kutuŋa kwejima kwatuŋaŋawu, kwenda kunuŋaŋana chachiwahi mudi yena, kwenda kukula kulonda kwikali tembeli yamudi Mwanta yajila.

²²Mudi yena nawa dimu mwanayituŋaluwu dehi ninenu hamu, mwikali itala dakushakama Nzambi mudi Spiritu.