Read MUKANDA WANZAMBI Maefese 3 Bible Online

Maefese 3 - MUKANDA WANZAMBI bible

Maefese 3

¹Yena nsaŋu iyi diyi yashilawu ami Pawulu, aŋusha dehi mukaleya hansaŋu yaKristu Yesu, kukoolenu ajentili;

²ŋeyi munatiyi chanankunjikuwu kumudimu wakuyishimwina luwi lwaNzambi;

³chanmwekesheleluwu nsaŋu yajindiluwu yinayisonekeli dehi mazu antesha.

⁴Chimukutaŋa, mukutwesha kwiluka kushinshika kwami kunashinshika munsaŋu yaKristu yajindiluwu,

⁵yabulili kutiyakeshawu kudi antu ahanyaka yacheŋi, neyi chanayimwekeshuwu makonu kudi apostolu jindi ajila niatuprofwetu twindi mudi Spiritu.

⁶Chakwila nawu ajentili anekali dehi akwakuswanina hamu nawu, anekali dehi nawa yidi yamujimbowu, akwakutambwila hamu chikaninu chamudi Kristu Yesu kwokunsaŋu yayiwahi.

⁷Yena nsaŋu yayiwahi iyi, diyi yankunjikiluwu kwikala mukwakukalakala, mwaya chamukunkulu chaluwi lwaNzambi lwanyinkeluwu, lunatambwili kuŊovu jindi.

⁸Ami nabadika kukeha mukachi kawakwakujila ejima asweja kukeha, yami enkawu luwi ilu lwakushimwina ajentili maheta aKristu akaŋanya kwilukewa.

⁹Kulonda nakamwekeshi kudi antu ejima mwekalila nsaŋu yakujinda yajindiluwu nyaka yejima mudi Nzambi waleŋeli yuma yejima.

¹⁰Kulonda amwekesheli akwakuyula niakwaŋovu ekala mumawulu, maana aNzambi eŋi na eŋi, katataka nachipompelu;

¹¹mwomwatoŋweliyi dehi kunyaka yahaya nyaka mudi Mwanta wetu Kristu Yesu.

¹²Mudi yena dimu namutunabulili woma, tunamoni dehi hawiŋililu wakadi kwakama, nakukuhwelela kutwamukuhwelelaŋa.

¹³Dichi nalembi nami bayi muzeya nayihuŋu yami yinamonaŋa hansaŋu yenuku; hichuma chenu chakudisamba nachu.

¹⁴Hayena nsaŋu iyi nafukami kudi Tata,

¹⁵kwatambwila yisaka yejima ijina daTata niyamwiwulu niyahamaseki,

¹⁶nami, eteji muntu wenu wamukachi kukola naŋovu yaSpiritu yindi, mwaya mahetindi akulema.

¹⁷Kulonda Kristu ashakami munyichima yenu kukukuhwelela; kulonda enu, munashimati dehi kunyiji, munakoli dehi mukukeŋa,

¹⁸mukwati Ŋovu yakushinshika mwaya kutoha, nikuleha, nikuleha kwiwulu, nikukunama; hamu nawakwakujila ejima.

¹⁹Mwiluki kukeŋa kwaKristu kwakaŋanya kwilukewa, kulonda mwinzali nihashika kwinzala kwaNzambi kwejima.

²⁰Yena natweshi kwila chakubadika nankashi namutukulomba hela namutukutoŋojoka mwejima, mwesekela Ŋovu yakoŋaŋa mudetu;

²¹kudi yena kwikali kulema muchipompelu, nimudi Kristu Yesu, mukuhita yisaka yejima haya nyaka nanyaka. Amena.