Read MUKANDA WANZAMBI Maefese 4 Bible Online

Maefese 4 - MUKANDA WANZAMBI bible

Maefese 4

¹Dichi ami akasilawu mukaleya mudi Mwanta, nayilembeleli nami endenuŋa mwatelela kutambika kwayitambikiluwu,

²nakudizozakwejima nakwovwaha, nakudiwunjika, nakuditiyilila wumu namukwawu nakukeŋa,

³nakusha muchima hakuhemba kunuŋaŋana kwaSpiritu, nakudikasa mwonji wakuwunda.

⁴Kwekala mujimba wumu niSpiritu wumu, neyi chayitambikiluwu enu mukuchiŋeja kumu kwanayitambikuwu.

⁵Kwekala Mwanta wumu, nikukuhwelela kumu, nichipapatishu chimu,

⁶niNzambi wumu, yowu Tata yawejima, wekala hewulu dayuma yejima; yuma yejima yekalila mudi yena; diyi wekala muyuma yejima.

⁷Ilaŋa natwinki wejima wetu luwi lwamwesekela chamukunkulu chaKristu.

⁸Chochanahoshiyi nindi, Chakandaminiyi kwiwulu watweli ankoli muwukoli, wayinkeli antu yamukunkulu.

⁹Chenichi chanatenuwu nawu, Wakandamini; chaya mudihi? Chaya mukwila nawu wakunkumukili mumatuŋa amwishina damaseki.

¹⁰Iwu wakunkumukili, diyi nawa wakandamini nakupandakana nankashi mawulu ejima, kulonda yuma yejima yiinzali yena hohu.

¹¹Washilumu amakwawu ekali apostolu, amakwawu atuprofwetu, amakwawu akwakushimuna nsaŋu yayiwahi, amakwawu atubiŋa, amakwawu akwakuleja antu;

¹²kulonda kukolesha akwakujila ekali alala, akalakeli akwawu, atuŋi chachiwahi mujimba waKristu;

¹³nichitwakashika wejima wetu mukunuŋaŋana kwakwitiya kwakukuhwelela, nimukumwiluka Mwana kaNzambi; twakashiki mwiyala walala chikupu, mwashika chiminu chakwinzala kwaKristu;

¹⁴kulonda tubuli kwikala cheŋi atwansi akubankaŋila niniku niniku, nakulelujoka nampepela jakuleja kwawantu jejima, namaleŋu nimakasu awantu akudimba nachu antu.

¹⁵Ilaŋa tuhoshenu mwalala nakukeŋa; tukulenu mudi yena muyuma yejima, diyi namutu, diyi Kristu.

¹⁶Kunamutu owu diku kwadinuŋila chachiwahi mujimba wejima, hiwukudikwata namanuŋi akukwashaŋana, yidi yejima hiyikwila nyidimu yawu, iwu nawindi, iwu nawindi, kulonda mujimba wukulaŋa nakudituŋa mukukea.

¹⁷Dichi dinu, nukuhosha chakola nakushimuna mudi Mwanta, nami, bayi mwenda cheŋi chendaŋawu ajentili, nayitoŋojoka yawu yakuhemeshaku.

¹⁸Maanawu eyila dehi kwawu, aambuka dehi nawumi waNzambi, nansaŋu yakuyamba kwanyichima yawu yachinchika.

¹⁹Wena hiyatweshaŋa kutiya nsonyi nawa cheŋuku; adumbila dehi mukufwila kwatama, nakwila yuma yawuzondu yejima nalwisu.

²⁰Enu kwenu hidimu mumwadizilili Kristuku;

²¹neyi munamutiyi chalala, neyi anayileji mudi yena mwaya nsaŋu yalala yekala mudi Yesu.

²²Vúulenu muntu wenu wamukulu wachisemwa chachikulu, waditamishaŋa mwaya kufwila kwatama kwayidimbilaŋa.

²³Mwikali antu amaha muyitoŋojoka yaspiritu yenu.

²⁴Mudivwiki muntu wamwiha aleŋeluwu mwekalilayi Nzambi mukuloŋa nakujila kwansaŋu yalala.

²⁵Dichi lekenu kutwamba, hoshenuŋa nsaŋu yalala nawakwenu; Muloŋa tunekali dehi yidi yimu nawakwetu.

²⁶Zuwenu kuzuwa kwakadi kuvulumuna, bayi muhumisha itaŋwa iku saŋa mwahililaku.

²⁷Bayi mumushila diyabolu hakushakamaku.

²⁸Muntu wadiŋi ikombi, kwiya nawa cheŋi chinjila; akalakali mudimu wawuwahi namakasindi, kulonda aheti yuma yakuyinka akwawu anabuli.

²⁹Kuhosha mazu atama chinjila, chiŋa mazu amawahi anatweshi kukolesha antu hakumonawu kukala, kulonda akwashi naluwi awa akuyitiya.

³⁰Bayi muneŋesha Spiritu yaNzambi Wajilaku, mudi yena dimu mwayifundawu kushika nikwifuku dakukuula.

³¹Lekenu ndulu yejima, nindombu, nikuzuwa, nimapumba, nikutukana, ninkunyi yejima.

³²Dikokwejenu muntu namukwawu; ikalenu namuchima wawushona; danakenenu muntu namukwawu neyi chayanakenenuwu kudi Nzambi mudi Kristu nawa.