Read MUKANDA WANZAMBI Maefese 6 Bible Online

Maefese 6 - MUKANDA WANZAMBI bible

Maefese 6

¹Enu anyana, ovwahilenuŋa anvwali jenu mudi Mwanta, dichichumachachiwahi.

²Lemeshaku tata yeyi nimama yeyi; dilu lushimbi lukweti chikaninu lwakusambila;

³kulonda wumoni kuwaha, wuhandinyaka yayivulu hanu hamaseki.

⁴Ninenu atata jawantu, bayi muvulokaŋa anyanenu azuwuku; yilelenuŋa nakuyibabesha nikuyikonkomwena mudi Mwanta.

⁵Enu aŋamba, ovwahilenuŋa anyanta jenu ahanu hamaseki nawoma nikuzaala, namuchima wumu, neyi chimwamwovwahilaŋa Kristu;

⁶bayi chakukalakala kumesu kulonda kutiyisha antu kuwaha hohuku; kalakalenu chidi neyi anduŋu jaKristu, nakwila mwakeŋa ayi Nzambi chakufuma kumuchima.

⁷Mukalakalaŋa nakutiya kuwaha, neyi chakukalakela Mwanta, bayi antuku.

⁸Mwiluki nenu muntu wukwila chachiwahi, hela hinduŋu hela himwana, wakatambwilamu kudi Mwanta.

⁹Ninenu anyanta nawa, yilenuŋa yuma yoyimu; lekenu kuyifunyina, muloŋa muneluki dehi nenu Mwanta wawu, yowu Mwanta wenu nawa, wudi mwiwulu, yena kwindi haakamaŋa antu kumesuku.

¹⁰Nkumininaku, ikalenu akwaŋovu mudi Mwanta, nimuŊovu jindi jasweja nankashi.

¹¹Manyekenu yitwa yaNzambi yejima, kulonda mutweshaŋa kudikaŋa nama ana adiyabolu akudimbana.

¹²Muloŋa hitwalwishaŋa nawantu akweti nyijimba namashuku, twalwishaŋa namawanta, nawakwaŋovu, nawakwakuyula mwidima wamakonu, nawaspiritu atama amumawulu.

¹³Dichi kwatenu kuyitwa yaNzambi yejima, kulonda mutweshi kwimana mwifuku datama, kulonda chimukukumisha kulwisha chochimwemana.

¹⁴Dichi imanenu, nakupimpila mahina ansaŋu yalala; vwalenu hebwambu chikuŋu chakujika chakuloŋa;

¹⁵vwalenu kunyendu yenu nkwabilu jakwenda nansaŋu yakuwunda yayiwahi.

¹⁶Chuma chinabadiki chochakukwata nkebu yakukuhwelela, yimukutwesha kujima nachu nyivu yakesi yamukwakutama yejima.

¹⁷Tambulenu itepa dachikuŋu dawamwinu, nimpoku yaSpiritu yakabali, wowu mazu aNzambi.

¹⁸Lombenuŋa mudi Spiritu mafuku ejima, nikulomba nikulembelela kwejima, nikutonenamu mwahita kukakela kwejima nakulembelela akwakujila ejima.

¹⁹Munlombeli ninami nawa, kulonda ankwashaŋa kushimuna nsaŋu yayiwahi yajindiluwu, chakadi woma.

²⁰Diyi nsaŋu yinekalili kaŋanda wakukasa mumaleŋi; kulonda nihoshi chakadi woma, ney chinateli kuhosha.

²¹Mana kwetu Tikikusa twakeŋa a, muntu wakalakelaŋa Mwanta nakashinshi, wukuyileja nsaŋu jejima, ninichi chinekala.

²²Diyi nsaŋu yinamu-temesheli kudenu, kulonda mwiluki namutunashakamini, kulonda yena ayikundeji munyichima yenu.

²³Kuwunda kwikali nawana kwetu, nikukeŋa nikukuhwelela kwakufuma kudi Nzambi, yowu Tata, nikudi Mwanta Yesu Kristu.

²⁴Luwi lwikali nawantu ejima akeŋa Mwanta wetu Yesu Kristu chakadi kudimbana.