Read MUKANDA WANZAMBI Mafilipi 1 Bible Online

Mafilipi 1 - MUKANDA WANZAMBI bible

Mafilipi 1

¹Etu aPawulu naTimotewu, anduŋu jaKristu Yesu, tudi nakuyisonekela mukanda, enu akwakujila ejima amudi Kristu Yesu ekala kuFwilipi, niatubiŋa nawankoŋi.

²Luwi lwikali nanenu nikuwunda kwakufuma kudi Nzambi Tata yetu nikudi Mwanta Yesu Kristu.

³Chinaanukaŋa nsaŋu jenu jejima nasakililaŋa Nzambi yami.

⁴Mafuku ejima chinayilembelelaŋa wejima wenu, nayilembelelaŋa namuzaŋalu,

⁵nanochu chimwankwashaŋa kutwala nsaŋu yayiwahi kumbidi, kufumisha kwifuku datachi nilelu.

⁶Neluki chikupu chuma chochenichi, nami yena watachikili mudimu wawuwahi mudenu wakawukumisha nikwifuku daYesu Kristu.

⁷Chachiwahi ami kutoŋojoka mwenimu hansaŋu yenu wejima wenu, nanochu chinekala nenu mumuchima wami, muloŋa mwatambwilaŋa luwi hamu nanami munyonji yami, nimukuhakwila nakukolesha nsaŋu yayiwahi.

⁸Muloŋa Nzambi diyi chinsahu chami chinafwilaŋa kuyimona mukukeŋa kwaKristu Yesu.

⁹Dichi nalombaŋa nami, kukeŋa kwenu kusweji kuvula muma ana nakashinshi kejima;

¹⁰kulonda mushinshiki yuma yabadika kuwaha; kulonda mwikali alala, akadi nyiloŋa ndo nikwifuku daKristu;

¹¹Musweji kusoŋa nyikabu yakuloŋa yafumaŋa kudi Yesu Kristu; kulonda kulemesha nikuhameka Nzambi.

¹²Enu ana kwetu, nakeŋi nami mwiluki nenu yuma yinamonami yinabalumuki kwikala yakutwala nsaŋu yayiwahi kumbidi;

¹³chakwila chinidi munyonji hansaŋu yaKristu chinatiyakani kudi mashidika ejima ekala mwibulu dawakwakuhemba antu, nikudi antu acheŋi.

¹⁴Ana kwetu amudi Mwanta amavulu anakwati Ŋovu nanichi chinidi munyonji, hiyakusweja nankashi wulobu wakuhosha mazu aNzambi chakadi woma.

¹⁵Amu chalala ashimunaŋa Kristu chechima nantadi; amu nawa amushimunaŋa namuchima wawuwahi.

¹⁶Awa elaŋa chakukeŋa, nanochu chanelukuwu nawu anankunjiki mudimu wakuhakwila nsaŋu yayiwahi.

¹⁷Hakwinza amakwawu ashimunaŋa Kristu chantadi hohu, himwalalaku; anatoŋojoki nawu asaŋumuni kunkabisha nanichi chinidi munyonji.

¹⁸Nochu dinu chakala Kristu akumutiyakesha mwejima, hela mwakudimbana hela mwalala; mwenimu nazaŋalelaŋa, dimu nakazaŋalela nawa.

¹⁹Muloŋa neluki nami chenichi chikumbalumukila chuma chakumpulwisha, nanochu chimukunlembelela, nichakunyinkaŋawu Spiritu yaYesu Kristu.

²⁰Natalilaŋa nankashi mwenimu nakuchiŋeja, nami kubuli chuma chakuntiyisha nsonyi; nikwati Ŋovu, neyi chinelaŋa dikalu nikatataka nawa, kulonda amulemesheli Kristu mumujimba wami, hela nukuhanda hela nukufwa.

²¹Muloŋa ami kwami kuhanda yowu Kristu, kufwa yowu kuheta.

²²Ilaŋa neyi nukuhanda mumujimba, nukumwenamu nyikabu. Hineluki chuma chinukutondaku.

²³Muloŋa nidi nanyichima yiyedi; aha nakeŋi kufumahu niyi nakashakami naKristu, dichi chasweja nankashi kuwaha;

²⁴kwinza kushakama mumujimba nakuyikwashaŋa enu chabadikakulema.

²⁵Neluki chikupu nami nukushakamaŋa, eŋa, nukwi kala nenuwejima wenu, kulonda muyaloŋa kumbidi namuzaŋalu wamukukuhwelela;

²⁶kulonda chimwakanmona hinakenza cheŋi kudenu, mwakasweji kudisamba mudi Kristu Yesu.

²⁷Chiŋa mushakamaŋa mwatelela nsaŋu yaKristu yayiwahi; kulonda hela neyi nakenza nakuyimona, hela neyi nakashakama kwacheŋi, nakatiyi ko? chimwashakamaŋa, chimunemani mbe namuchima wenu wumu, nakutoŋojoka mwomumu, nakusweja kukalakala mudimu wakwitiya kwakukuhwelela nsaŋu yayiwahi;

²⁸nákubula kutiya woma wawantu akuyilekesha. Kudi wenawa hichuma chakwiluka nachu chamba kajilu mukawu; ilaŋa kudenu hichuma chakwiluka nachu chimunahandi chakuyihandisha kudi Nzambi.

²⁹Muloŋa nayiteji hansaŋu yaKristu, bayi kukumina dakumukuhwelela hohuku, chiŋa nikumumwena ihuŋu nawa.

³⁰Muloŋa mwalwishaŋa kulwisha kumwamweni mudami, nihanu mwatiyaloŋa nawu kudi kwoku.