Read MUKANDA WANZAMBI Mafilipi 2 Bible Online

Mafilipi 2 - MUKANDA WANZAMBI bible

Mafilipi 2

¹Dichi neyi mudi Kristu mudi kukundeja, neyi mudi kudikwasha kwakukeŋa, neyi mudi kukundaŋana kwaSpiritu, neyi mudi kudikunda niwushona,

²wanishenu muzaŋalu wami; mutoŋojokaŋa mwomumu, mwikali nakukeŋa kwokumu, mwikali namuchima wowumu niyitoŋojoka yoyimu.

³Bayi mwila chuma chakuzuŋa hela chakudinka wantaku; chiŋa mutoŋojokaŋa yakudizoza, iwu atoŋojoki mukwawu, nindi wambadikami kuwaha.

⁴Bayi muntu atoŋojokaŋaa nsaŋu yindi hohuku, chiŋa nsaŋu jawakwawu nawa.

⁵Yitoŋojoka yadiŋi mudi Kristu Yesu yiikali nimudenu nawa.

⁶Yena wekala mwomwekalilayi Nzambi, watoŋojokeli nindi kubwambuka naNzambi hichuma chakuhukulaku,

⁷ilaŋa wadibalumwini kwikala wakadi kulema, hakwikala mwekalila nduŋu, hakwikala chaduwu antu.

⁸Chamumwenuwu himuntu, hakudizoza, hakwovwa hilana ho-o, ndo nikukufwa, ena kwokufwa kwakukulusu.

⁹Dichi Nzambi nawa namutuumbakeshi chakubadika, namwinki ijina dabadika majina ejima;

¹⁰kulonda mwijina daYesu manunu ejima akafukami, niamwiwulu, niahamaseki, niamwishina damaseki;

¹¹nimadimi ejima aketeji nawu Yesu Kristu diyi Mwanta, kulonda kulemesha Nzambi Tata.

¹²Dichi enu akwetu nakena, chimwovwahilana mafuku ejima, kalakalenu wamwinu wenu aweni nawoma nakuzaala, bayi hinashakamana nanenu hohuku, china musweji nihanu hinidi kwacheni.

¹³Muloŋa Nzambi diyi wakonana mudenu nimuchima wakukena kwila, nikwila kwakweni, mwakutiyayi yena kuwaha.

¹⁴Ilenuŋa yuma yejima chakadi kutoba hela kufwila ntadi;

¹⁵kulonda mwikali akadi hakuyinkela Muloŋa, alala, anyana kaNzambi akadi hatama, mukachi kawantu amakonu áheŋa achinchika. Mukachi kawu mwatoŋekaŋa neyi manoŋu mumpata yamunu mwishina,

¹⁶nakukwata mazu awumi kwiwulu; kulonda nakadisambi mwifuku daKristu nami hinatemukili chamukunkuluku, hela kukabakana hinakabakeni chamukunkuluku.

¹⁷Ena, hela akunhununwina hachimuna chakukuhwelela kwenu chimwamuketwilana Nzambi, neyi hihimulambu wakuhunununa, nukutiya kuwaha nakuzanalala hamu nanenu ejima.

¹⁸Mwomumu ninenu mukutiya kuwaha nakuzanalala hamu nanami nawa.

¹⁹Nakuhweleli mudi Mwanta Yesu nami niyitemesheli Timotewu mafuku anu, kulonda nitiyi kuwaha chinukwiluka chimwashakama.

²⁰Muloŋa nabuli mukwawu wudi neyi yena wukwakama chalala chimwashakama.

²¹Muloŋa ejima adikeŋelana yawu hohu, hiyakena nsanu yaYesu Kristuku.

²²Mweluka dehi chanadimwekeshiyi yena, chanakalakaliyi hamu nanami neyi mwana natata yindi, nakutwala nsaŋu yayiwahi kumbidi.

²³Dichi nukukeŋa kumutemesha hohinakeluka chakaŋilawu.

²⁴Ilaŋa nakuhweleli mudi Mwanta, nami ami aweni nakenza mafuku anu.

²⁵Natoŋojoki nami chachiwahi niyifuntishili mana kwami Epafwaditu, mukwetu nakalakalaŋa nindi, ishidika nami, ntemesha yenu, waleteli yuma yakunkwasha hinabulili.

²⁶Muloŋa yena wafwilaŋa kuyimona wejima wenu, watiyili kumuchima bwi nansaŋu yimwatiyili nawu wakata.

²⁷Chalala yena wadiŋi wakata, kwasheli hanti nakufwa; ilaŋa Nzambi wamutiyilili luwi; hatiyilili luwi yena hohuku, ilaŋa ninami nawa, kulonda kubuli kulunjika kuneŋa hakuneŋa kwakusambila.

²⁸Dichi nadi hindi kumufuntisha, kulonda chimwakamumona cheŋi mwakatiyi kuwaha nankashi, kuneŋa kwami kwakakehi.

²⁹Dichi mutambulenu mudi Mwanta nakuzaŋalala kwakweni; yilemeshenu antu adochu;

³⁰Muloŋa wakeŋa eli kufwa kukoola mudimu waKristu; haakamini kufwaku, kulonda awanishi nyidimu yimwakaŋenyi kuŋilila.