Read MUKANDA WANZAMBI Mafilipi 3 Bible Online

Mafilipi 3 - MUKANDA WANZAMBI bible

Mafilipi 3

¹Nkumininaku, enu ana kwami, zaŋalalenu mudi Mwanta. Kuhitamu nawa cheŋi ami hinamoni kukalaku, hakwila enu chakuyihemba nachu.

²Babelenu atuwa, babelenu niakwakukoŋa chatama, babelenu niakwakudiketula.

³Muloŋa etu yetu akwakwalama twadifukulaŋa naSpiritu yaNzambi, twadisambaŋa mudi Kristu Yesu; hitwakuhwelelaŋa chisemwa chahesekuku.

⁴Kutoŋa ami aweni ni kweti hakukuhwelela chisemwa. Neyi kudi muntu mukwawu natoŋojoki nindi natweshi kukuhwelela chisemwa, ami namubadiki.

⁵Aŋalamishili ifuku damu chitanu nachisatu; nikaIsarela wakumuchidi waBenjamini; nikaHeberu kakeni chikupu.

⁶Hansaŋu yanshimbi nikaFwarisi; hansaŋu yeyena damuchima nakabishili chipompelu; hansaŋu yakuloŋa kwekala munshimbi nabulili hakunyinkela muloŋa.

⁷Ilaŋa yumoyu yadiŋi yakunhetesha, nayifuukuli nami yakujimbaŋesha hohu hadi Kristu.

⁸Mwamweni chi, nafuukulaŋa yuma yejima nami yakujimbaŋesha hohu, nanochu chasweja kuwaha kumwiluka Kristu Yesu, Mwanta wami. Hadi yena najimbaŋeshi yuma yejima, ninochu nayifuukulaŋa nami hiwuzondu hohu, kulonda niheti Kristu,

⁹akanwani nidi mudi yena, bayi nakuloŋa kwamami aweni kwakunshimbuku, ilaŋa nakuloŋa kwenzaŋa kukukuhwelela kwakumukuhwelela Kristu, kuloŋa kwaNzambi kwenzaŋa kukukuhwelela.

¹⁰Nakeŋi kumwiluka yena, niŋovu yakusaŋuka kwindi kwamudi afu, nikukundaŋana nindi mumakabi indi, nifwi chafwiliyi yena;

¹¹hadaha nakatwesha kushika kukusaŋuka kwamudi afu.

¹²Hineli nami natambuli dehi, hela nami neli dehi muntu walala chikupuku; ilaŋa nadikwatishaŋa nami hadaha nakakwata hachumochu chankwatililuwu kudi Kristu Yesu.

¹³Enu ana kwetu, hinatoŋojoki nami nakwatuhu dehuku; ilaŋa nelaŋa chuma chimu hohu, navulamenaŋa yuma yamunyima, nafwilaŋa nami nakashiki kuyuma yakumbidi.

¹⁴Nadi kwatishaŋa nankashi, nakukabila nami nakashiki kumufunda, akansomoni kutambika kwaNzambi kwamudi Kristu Yesu kwamwiwulu.

¹⁵Dichi dinu, etu twakula dehi, tutoŋojokenu mwenimu. Neyi hansaŋu yimu mukutoŋojoka mwacheŋi, hela nsaŋu oyu Nzambi wukuyilejamu.

¹⁶Ilaŋa tukakelenu kwenda namutunashiki dehi.

¹⁷Enu ana kwetu dibombenu wejima wenu nakuŋimbujola; shinshikenu antu akwenda neyi etu, nanichi chitudi chifwikija chakutalilahu enu.

¹⁸Muloŋa nayileja kakavulu, nukuyilejamu cheŋi namadilu, nami antu amavulu endaŋa neyi ayilumbu jakulusu yaKristu.

¹⁹Kukuminina kwawu yowu kujilumuka; Nzambi yawu dodivumu dawu; adisambaŋa nayuma vansonyi hohu, atoŋojokaŋaa yuma yahanu hamaseki.

²⁰Kwinza etu wenimbu wetu wudi mwiwulu, mwomutwatalilaŋa Chamwinu, yowu Mwanta Yesu Kristu;

²¹wakabalumuna nyijimbiyi yakusawuka kwetu yakesekani namujimba windi walubanji lwakulema, mwomwakoŋaŋa Ŋovu jindi jakudovwahishila yuma yejima.