Read MUKANDA WANZAMBI Mafilipi 4 Bible Online

Mafilipi 4 - MUKANDA WANZAMBI bible

Mafilipi 4

¹Dichi enu ana kwami nokeŋa, nafwila kuyimona, yenu muzaŋalu wami, yenu chibaaba chami, imanenu chakola mbe mudi Mwanta, enu akwetu nakeŋa.

²Nalembeleli Eyodiya, nalembeleli niSintiki, nami ekali nayitoŋojoka yimu mudi Mwanta.

³Eyi nawa nkwashi yami, twekala neyi mumpanda yimu, nami yikwashuku owu ambanda muloŋa akabakeni nanami munsaŋu yayiwahi; niKelementa nawa, niakwetu amakwawu akwakukalakala nanami, majinawu adi mumukanda wawumi.

⁴Zaŋalalenu mudi Mwanta mafuku ejima. Nukwila cheŋi nami zaŋalalenu.

⁵Mwekeshenu kwovwaha kwenu kudi antu ejima. Mwanta wudi hahehi.

⁶Bayi mwakama chumaku; ilaŋa mulejenu Nzambi yuma yejima yimunakeŋi nakulomba, nakulembelela, nakusakilila.

⁷Kuwunda kwaNzambi kwabadika maana ejima kwakahemba nyichima yenu niyitoŋojoka yenu mudi Kristu Yesu.

⁸Nkumininaku, enu ana kwetu, toŋojokenu yuma yalala yejima, yalumbwa yejima, yaloŋa yejima, yitooka yejima, yasweja kuwaha yejima, yampuhu yayiwahi yejima. Neyi kudi kashinshi kakeni, neyi kudi yahamekaŋawu, toŋojokenuŋa yumoyu.

⁹Yuma yimwadizili, yimwatambwili, yimwatiyili, yimwamweni mudami, ilenuŋa yumoyu, niNzambi wakuwunda wukwi kala nanenu.

¹⁰Ilaŋa nazaŋalali nankashi mudi Mwanta, nanochu chimunatachiki cheŋi kuntoŋa hanahiti dehi mpinji; chalala mwantoŋeluhu, ilaŋa himwamweni hakwililaku.

¹¹Hinateni nsaŋu yákubula yumaku; Muloŋa nadizi dehi kutiya kuwaha munekalila mwejima.

¹²Neluki kusawuka hela kwikala nayuma yayivulu. Munsaŋu jejima anleja dehi maana akwikuta hela akwikala nanzala; nadizi kwikala nayuma yayivulu hela kuyibula.

¹³Natweshi kwila yuma yejima mudi Kristu wankoleshaŋa.

¹⁴Hela chochu, muneli chachiwahi chimunankwashi mulukadi lwami.

¹⁵Chinafumini kuMasidoniya, hatachikili nsaŋu yayiwahi, enu akwaFwilipi mweluka nawa nenu hikwadiŋi chipompelu chikwawu chatiyaŋeni nanami munsaŋu yakuhana nakutambulaku, Chiŋa yenu hohu.

¹⁶Muloŋa hela chinadiŋi muTesalonika, mwatemesheli nakunkwasha hinabulili, hikamu hohuku.

¹⁷Hinashi muchima hakunyinka chumaku, ilaŋa nakeŋi nyikabu yenu yiyivulilaŋa.

¹⁸Nekala nayuma yejima, yanvulila dehi; natiyi dehi kuwaha chinatambuli kudi Epafwaditu yuma yimwantemesheleli, hiivumba dadiwahi, chidi neyi chimuna chakuketula, chatela kutambula, chakumutiyisha Nzambi kuwaha.

¹⁹Ilaŋa Nzambi yami wakayinka yuma yimunabuli yejima, mwashikila mahetindi akulema ekala mudi Kristu Yesu.

²⁰Kulema kwikali kudi Nzambi yetu, yowu Tata, haya nyaka nanyaka. Amena.

²¹Ŋimwishili akwakujila ejima ekala mudi Kristu Yesu. Ana kwetu inidi nawu anayimwishi.

²²Akwakujila ejima anayimwishi, anabadiki kuyimwisha akwetala daKesari.

²³Luwi lwaMwanta Yesu Kristu lwikali naspiritu yenu hela, yimunakaankili.