Read MUKANDA WANZAMBI Makolose 1 Bible Online

Makolose 1 - MUKANDA WANZAMBI bible

Makolose 1

¹Ami Pawulu, kapostolu kaKristu Yesu mwaya muchima waNzambi, nimana kwetu Timotewu,

²tudi nakuyisonekela mukanda, enu akwakujila, niana kwetu ashinshika amudi Kristu, ekala kuKolose. Luwi lwikali nanenu nikuwunda kwakufuma kudi Nzambi Tata yetu.

³Chitwayilombelaŋa mafuku ejima, twamusakililaŋa Nzambi, Tata yaMwanta wetu Yesu Kristu,

⁴nanochu chitwatiyili nsaŋu yakukuhwelela kwenu kumwamukuhwelela Kristu Yesu, nikukeŋa kwenu kumwakeŋa aŋa nachu akwakujila ejima;

⁵Nanochu chimukweti kuchiŋeja kwanayiswekeluwu mumawulu. Kuchiŋejoku mwachitiyili dehi kumazu ansaŋu yayiwahi yalala;

⁶yinashi ki kudenu neyi chiyinashiki mumpata yamunu mwishina mwejima, hiyikusoŋa nyikabu yakuya nakuvula. Dichi chineli nimudenu nawa, kufumisha kwifuku dimwatiyili himukwiluka nsaŋu yaluwi lwaNzambi chalala;

⁷mwomwayilejeluwu kudi mukwetu nduŋu netu Epafwarasa twakeŋa a, yena himukwakukalakela Kristu washinshika, watukalakelaŋa etu.

⁸Yena watulejeli nsaŋu yakukeŋa kwenu kwamudi Spiritu Wajila.

⁹Dichi dinu ninetu nawa, kufumisha kwifuku ditwachitiyili hitwalekaŋa kuyilombelaku. Tunakeŋi netu musweji kwiluka mwakeŋa ayi Nzambi nama ana aspiritu ejima nakashinshi;

¹⁰kulonda mwendi nakumutelela Mwanta, nakumutiyisha kuwaha kwakweni, nakusoŋa nyikabu munyidimu yayiwahi yejima, nakukula mukwiluka Nzambi.

¹¹Ayikoleshi naŋovu jejima mwaya Ŋovu jakulema kwindi, kulonda musweji kutatakena nakudiwunjika namuzapalu;

¹²nakumusakilila Tata natubalumuni tutweshi kwikala atela kutambula iseka detu kuwuswana wawakwakujila muchejeji.

¹³Yena natupulwishi muŊovu jamwidima, natututulwili twiŋili muwanta waMwanindi akeŋayi.

¹⁴Mudi yena tukweti kutukúula, yowu kutwanakena nyiloŋa yetu.

¹⁵Diyi wamufwana chikupu Nzambi wakiimonewaŋa; diyi wedi wayuma yaleŋeluwu yejima.

¹⁶Muloŋa mudi yena dimu mwaleŋeleluwu yuma yejima, niyamumawulu niyahamaseki; niyuma yamonewaŋa, niyuma yakamonewaŋa; hela matanda awanta, hela mawanta antúumba, hela akwakuyula, hela akwaŋovu. Yuma yejima ayileŋeleli mudi yena; diyi aleŋeleleluwu yuma yejima.

¹⁷Yena diyi wakusambila, hadiŋi yuma yejima yichidi kanda; mudi yena dimu mwakolela yuma yejima.

¹⁸Yena diyi namutu wamujimba yowu chipompelu; diyi tachi, diyi wedi wamudi afu, kulonda akekali wabadika, yuma yejima yikuminumu.

¹⁹Mwashikila wuNzambi mwejima mwetiyili kushakama mudi yena;

²⁰kulonda akakundamishi yuma yejima kudi yomweni nayena; eŋa, akakundamishi hela yuma yahamaseki, hela yuma yamumawulu, nanichi chaneliyi mudimu wakuwundisha namashi akukulusu yindi.

²¹Ninenu hamwaka mwadiŋi aambuka naNzambi, mwadiŋi ayilumbu munyichima yenu, munyidimu yenu yatama;

²²ilaŋa katataka nayikundamishi dehi mumujimba windi waheseki nakufwa kwindi, kulonda akayimiki kumesu indi nakujila, nákubula himwatamina, hela hakuyinkela nyiloŋa;

²³neyi mukushakama mukwitiya kwakukuhwelela nakushimata, nakukakela mbe, nákubula kufuma mukuchiŋeja kwekala munsaŋu yayiwahi yimwatiyili, yanashimunuwu mwahita kuleŋa kwejima kwekala mwishina dewulu. Ankunjikili ami Pawulu kwikala mukwakukalakela nsaŋu iyi.

²⁴Hinukuzaŋalala dinu namakabi inakabaŋa hansaŋu yenu; nawanishaŋa mumujimba wami lukadi lwaKristu lwasheli hansaŋu yamujimba windi, yowu chipompelu.

²⁵Chochipompelu chananyinkuwu mudimu wakuchikalakela, mwomwankunjikililuwu enu kudi Nzambi, kulonda niwanishi izu daNzambi.

²⁶Nimwekeshi nsaŋu yakujinda yajindiluwu yisaka yejima mwahita nyaka yejima, hakwinza katataka anayimwekesheli antu indi ajila,

²⁷duyiliyi Nzambi kuwaha kuyileja chekala maheta akulema kwansaŋu iyi yakujinda mukachi kawaJentili, yowu Kristu wudi mudenu, diyi lubanji lwakulema kwachiŋejaŋawu.

²⁸Diyi twashimunaŋa etu, nakukonkomwena antu ejima, nikuleja antu ejima nama ana ejima, kulonda twakashikiji antu ejima ela dehi alala chikupu mudi Kristu.

²⁹Diyi nsaŋu yinakabakanaŋa nikulwisha mwomwaya kukoŋa kwindi kwakoŋaŋa mudami naŋovu yayeni.