Read MUKANDA WANZAMBI Makolose 2 Bible Online

Makolose 2 - MUKANDA WANZAMBI bible

Makolose 2

¹Muloŋa nakeŋi nami mwiluki chinaswejaŋa kuyilwishila enu ninawa adi kuLayodikeya, niakwetu ejima anabuli kunmona kumesu;

²kulonda ayikundeji munyichima yawu, anuŋaŋani mukukeŋa, amoni maheta ejima akwiluka chalala chikupu mwalumbulukila nsaŋu yaNzambi yakujinda, yowu Kristu.

³Mudi yena dimu mwanajindiluwu maheta ejima amaana nakashinshi.

⁴Chinukuhosha mwenimu nalondaŋa abuli kuyidimbeka namazu akulambisha.

⁵Hela nabuli kwikala nenu mumujimba, nidi nenu muspiritu, nakuzaŋalala chinatalaŋa kwoloka kwenu, nichakola kukuhwelela kwenu kwamudi Kristu.

⁶Dichi dinu mwomumwatambwilili Kristu Yesu, Mwanta, endelenuŋa mudi yena,

⁷nakushimata nakutuŋewa mudi yena, nakukola mukukuhwelela kwenu mwayilejeluwu, nakusweja kusakilila.

⁸Babalenu hakenda kamwekana muntu wukuyipupa namaanindi namakasu amukunkulwayi, mwaya yaaku yawantu, mwaya yuma yampata yamunu mwishina yakuhemesha, himwaya Kristuku.

⁹Muloŋa mumujimba windi yena dimu mwashakama wuNzambi wejima muwushika.

¹⁰Mudi yena dimu mwanayiwanishuwu, diyi wekala wahewulu dawakwakuyula nawakwaŋovu ejima.

¹¹Mudi yena nawa ayalamishili nakwalama kwákubula kwila namakasa, hakuvúula mujimba wachisemwa nakwalama kwaKristu.

¹²Ayijiikili chimu nindi muchipapatishu, ayisaŋwili chimu nindi nakukuhwelela mudimu wakoŋeliyi Nzambi chamusaŋwiliyi Kristu mudi afu.

¹³Ninenu mwadiŋi afwa nanyiloŋa yenu nákubula kwalama kunyijimba yenu, enu ayihandishili chimu naKristu, hakutwanakena nyiloŋa yetu yejima.

¹⁴Wajimaŋesheli mukanda wayijila watusonekeleluwu, wadiŋi wakutwinka nachu nyiloŋa; hakuwufumisha nakuwupopela kukulusu yindi.

¹⁵Wafuŋunwini akwakuyula niyuma yaŋovu jawanta wakumaleli, hakuyitiyisha nsonyi hatooka, hakuyimika mushindu nakulusu yindi.

¹⁶Neyi kudi muntu wukukeŋa kuyisompesha hansaŋu yakudya hela yakunwa, hela yefuku dachawija hela yakwaluka kakweji, hela yasabata, bayi mumwitejaku.

¹⁷Yumoyu himwevulu wayuma yakenza, ilaŋa yuma yayeni yambala yaKristu.

¹⁸Neyi kudi muntu wukukeŋa kuyiya yuma yakukeŋa kuyisomonawu, nanochu chadizozaŋayi, chadifukulaŋayi kudi aŋelu, bayi mumwitejaku. Himuntu nakuhweleli yuma yanamoniyi, nadinki tuhu wanta wayitoŋojoka yindi yachisemwa chaheseki.

¹⁹Wadambulaŋa naMutu kwanuŋaŋena mujimba wejima, awudiishaŋa nakuwunuŋisha namanuŋi nanyijila, nakuwukulisha kudi Nzambi.

²⁰Neyi mwafwili chimu naKristu, nakwambuka kuyuma yakuhemesha yamunu mwishina, muloŋanyi mukwovwahila yirila neyi kwiri muyantu ampata yamunu mwishina?

²¹Himukwovwahila yirila yakwila nawu, Chinjila kukwata; chinjila kutompa; chinjila kukunka;

²²mwaya yijila nakuleja kwawantu. Yuma yejimiyi chakuyilawu keŋa yinoŋi kwayu.

²³Yumiyi yamwekanaŋa neyi yikweti maana akulemesha muchima, nakudizoza nakukabisha mujimba; hiyikweti Ŋovu yakulekesha yafwila mujimbaku.