Read MUKANDA WANZAMBI Makolose 3 Bible Online

Makolose 3 - MUKANDA WANZAMBI bible

Makolose 3

¹Neyi ayisaŋwili chimu naKristu, keŋenu yuma yekala mwiwulu, mwekalayi Kristu nashakami kuchikasa chaNzambi chachidiilu.

²Toŋojokenu yuma yamwiwulu, bayi yahamasekuku.

³Muloŋa mwafwa dehi, niwumi wenu anawusweki naKristu mudi Nzambi.

⁴Chakamwekeshawu wumi wetu, diyi Kristu, enu nawa akayimwekesha chimu nindi mulubanji lwakulema.

⁵Dichi jahenu yidi yenu yidi hamaseki, wuvumbi, wuzondu wamumuchima, kufwila kwila yuma yatama, kusweja kukeŋa yatama, nilwisu himana kwawu nakupesha.

⁶Hansaŋu iyi dihu henjilaŋa kuzuwa kwaNzambi kwakuzuwila akwakujikwa.

⁷Enu nawa dimu mumwendeleli hamwaka, chimwashakamini nakwila yumiyi.

⁸Ilaŋichi fumishenu yuma yejimiyi; kuzuwa, nindombu, ninkunyi, nikutukana; lekenu kuhosha yuma yikweti nsonyi.

⁹Bayi muhosha yakutwamba muntu namukwawuku, muloŋa munavúuli dehi muntu wamukulu nimwelaŋayi;

¹⁰munavwali dehi muntu wamwiha, wayaloŋa nakubalumuka wamwiha nakwiluka chalala, kulonda afwani neyi wamuleŋeli.

¹¹Mwenomu himwekala kaHeleni nakaYudeya, hela kwalama nákubula kwalamaku. Himwekala hela mukwetuŋa dacheŋi, hela kaSikita, hela nduŋu hela mwanaku; ilaŋa Kristu diyi hohu kanka windi chikupu mwejima.

¹²Ochu chimudi antu aNzambi atondewa, ajila, akeŋewa, vwalenu muchima wawushona, niluwi, nikudizoza, nikwovwaha, nikudiwunjika;

¹³nakudovwahila nikudanakena muntu namukwawu. Neyi kudi muntu wukweti muloŋa namukwawu amwanakeni; chayanakenenuwu enu kudi Mwanta, ninenu nawa ilenu chochimu.

¹⁴Hayuma yejimiyi alunjikuhu kukeŋa, diyi mpanda yasweja kunuŋa antu hamu.

¹⁵Itejenu kuwunda kwaKristu kuyuli munyichima yenu, dichi chayitambikiluwu mumujimba wumu; ikalenu akwakusakilila nawa.

¹⁶Itejenu mazu aKristu alumbami mudenu nama ana ejima; mudilejaŋa, mudikonkomwenaŋa muntu namukwawu namasamu, natumina, nitumina twawuspiritu, nakumwimbila Nzambi naluwi munyichima yenu.

¹⁷Hela mukuhosha hela mukukalakala, ilenu yuma yejima mwijina daMwanta Yesu, nakusakilila Nzambi Tata mwijina dindi.

¹⁸Enu ambanda, ovwahilenu anfumu jenu, dichi chinateli mudi Mwanta.

¹⁹Enu amayala, keŋenu aŋodi jenu, bayi muyitalumokelaku.

²⁰Enu anyana, oywahilenu anvwali jenu muyuma yejima, muloŋa dichichuma chamutiyishaŋa Mwanta kuwaha.

²¹Enu atata, bayi muvuloka anyanenuku, akenda kamona kukala.

²²Enu aŋamba, ovwahilenu anyanta jenu ahanu hamaseki muyuma yejima; bayi chakumesu hohu neyi chakutiyisha antu kuwahaku, chiŋa namuchima wumu hohu, nanochu chimwatiyaloŋa Mwanta woma.

²³Yuma yejima yimukwila yilenu namuchima wakukalakela Mwanta, bayi chakukalakela antu hohuku;

²⁴nakwiluka nenu wakatambula wuswana wakuyisomona kudi Mwanta, muloŋa mwakalakelaŋa Mwanta Kristu.

²⁵Muloŋa muntu wukwila chatama wakatambwilamu cheŋi chatama cheliliyi; hikwekala kwakama antu kumesuku.