Read MUKANDA WANZAMBI Makolose 4 Bible Online

Makolose 4 - MUKANDA WANZAMBI bible

Makolose 4

¹Enu anyanta, inkenu aŋamba jenu yaloŋa yesekana, nanichi chimuneluki nenu enu nawa mukweti Mwanta mwiwulu.

²Kakelenu mbe nakulomba, mutonenumu nakusakilila.

³Chimukulomba namutulombelaŋaku ninetu nawa, kulonda Nzambi atwenzulwili chenzelu chakwijila nansaŋu, tushimuni nsaŋu yaKristu yajindiluwu, yankasilawu munyonji;

⁴niyimwekeshi mwatelela.

⁵Endenu nama ana kumesu awantu adi hanzi, nakukwatila mafuku maana.

⁶Kuhosha kwenu kwikali naluwi lwakutoweja namuŋwa mafuku ejima, kulonda mwiluki mwakwakwila antu ejima.

⁷Mana kwetu Tikikusa twakeŋa a mukwakukalakala washinshika, mukwetu nduŋu netu mudi Mwanta, wakayileja nsaŋu jami jejima.

⁸Ami namutemeshi kudenu hansaŋu yoyeniyi, kulonda mwakeluki chitwashakama, akakundeji nyichima yenu.

⁹Namutemeshi hamu namwinenu Onesimusa, mana kwetu washinshika twakeŋa a. Wena akayileja nsaŋu jakunu jejima.

¹⁰Arisitaka twekala nindi mukaleya, nayimwishi; niMaku musonyaBaranaba; anayileji chimwakamwila, neyi wakashika kudenu mwakamutambuli niYesu atenaŋawu ijina di kwawu nawu Yusitu nayimwishi.

¹¹Diwu akwakwalama akalakalaŋa hamu nanami mudimu wawanta waNzambi wowenawa hohu, diwu amayala ankundejaŋa.

¹²Mwinenu Epafwarasa, nduŋu yaKristu Yesu, nayimwishi; wayilwishilaŋa mukulomba kwindi mafuku ejima, nindi mwimani ngu mwikali antu alala chikupu, mwiluki chikupu mwanakeŋiyi Nzambi mwejima.

¹³Muloŋa ami namushimuni wunsahu nami wayikabakenaŋa ninenu niwena adi kuLayodikeya nikuHerapoli.

¹⁴Iŋaŋa Luka twakeŋa a, niDemasi, anayimwishi.

¹⁵Ŋimwishili ana kwetu adi muLayodikeya; ŋimwishili niNyamfwasa nichipompelu chekala mwitala dawu.

¹⁶Neyi iwu mukanda munawutaŋi dehi, wutumenu kuchipompelu chawaLayodikeya akawutaŋi nawa; ninenu nawa mwakataŋi mukanda wakafuma kuLayodikeya.

¹⁷Mwakamwili Akipusa nenu, Shaku muchima kumudimu wunatambuli mudi Mwanta, wuwukalakali chalala.

¹⁸Ami Pawulu nasoneki kwimwishiku nachikasa chamami aweni. Anukenu nyonji yami. Luwi lwikali nanenu.