Read MUKANDA WANZAMBI 1 Matesalinika 2 Bible Online

1 Matesalinika 2 - MUKANDA WANZAMBI bible

1 Matesalinika 2

¹Enu ana kwetu, enu muneluki chitwashikili kudenu hichadiŋi chamukunkulwayuku.

²Ilaŋa muneluki dehi nenu helili twakaba dehi nakutwila chatama kuFwilipi, hitukuumika mudi Nzambi yetu nakuyishimwinenu nsaŋu yaNzambi yayiwahi, iku nikumona makabi amavulu.

³Muloŋa kukonkomwena kwetu hikunafumi kukuluwa, hela kukuzonda mumuchima, hela kumakasuku.

⁴Ilaŋa chanatwitejuwu kudi Nzambi, watukunjikili mudimu wakushimuna nsaŋu yayiwahi, dichi chitwahoshelaŋa; hitwahoshaŋa chakutiyisha antu kuwahaku, chiŋa kutiyisha kuwaha Nzambi washinshikaŋa nyichima yetu.

⁵Muloŋa enu muneluki nenu hiyatutiyili kuhosha mazu akulambishaku; hitwavweli chi kovwelu chakubuta lwisuku; Nzambi diyi chinsahu.

⁶Hitwakeŋa eli kutulemesha kudi antu, hela kudenu hela kudi antu acheŋuku; neyi twakeŋa eli ochu, mutenowu twatwesheli kutambula yuma kudenu, nanichi chitudi apostolu aKristu.

⁷Ilaŋa twadiŋi amwovu mukachi kenu, neyi chalelaŋayi nleli anyanindi yomweni.

⁸Chitwaswejeli kuyikunda, hitwakuminini dakutiya kuwaha kuyishimwina nsaŋu yayiwahi hohuku, ilaŋa twatiyili kuwaha kuyinka niwumi wetwetu aweni nawa, muloŋa twaswejeli kuyikeŋa.

⁹Enu ana kwetu, munaanuki chitwakabakeni nakukalakala niwufuku nimwaana kulonda tubuli kutambula yuma kudenu, iku tudi nakuyishimwina nsaŋu yaNzambi yayiwahi.

¹⁰Enu aweni mudi ayinsahu, niNzambi nawa hichinsahu, chitwayililaŋa enu akwetu mwetiya, chitwadiŋi ajila, aloŋa, akadi hakutwinkela muloŋa.

¹¹Muneluki wejima wenu chitwayikonkomweneni, nakuyikundeja, nakuyileja, neyi chelaŋayi tata anyanindi;

¹²kulonda mwendi nakumutelela Nzambi, wayitambikili kwijila muwanta windi yomweni nimukulema kwindi.

¹³Twamusakililaŋa Nzambi nawa chakadi kuleka, nanochu chimwatambwili kudetu izu dansaŋu yaNzambi, himwaditambwili neyi nsaŋu yawantuku, ilaŋa chochidekala izu daNzambi chalala, dodizu dakoŋaŋa mudenu mwetiya.

¹⁴Muloŋa enu ana kwetu, mwadiŋi neyi yipompelu yaNzambi yamudi Kristu Yesu yekala muYudeya; muloŋa ninenu nawa mwamweni yuma yakala kudi akwenu amwituŋa denu, neyi chamwenuwu wena kudi aYudeya,

¹⁵ajahili Mwanta Yesu niatuprofwetu, ahaŋili ninetu nawa. Hiyamutiyishaŋa Nzambi kuwahaku, aletaŋa ntadi nawantu ejima.

¹⁶Atulekeshaŋa kuhosha nawaJentili kulonda ahandi; analondi kuwanisha nshidi jawu. Ilaŋa kuzuwa kunayiwani dehi chikupu.

¹⁷Enu ana kwetu, etu twelili anshona hampinji yanti, chitwaambukili nenu mumujimba bayi mumuchimaku; twaswejeli nankashi kuta muchima hakuyimona mesu namesu.

¹⁸Muloŋa ami Pawulu, twakeŋa eli kwinza kudenu nikamu nikayedi, ilaŋa Satana watufuntishilumu.

¹⁹Indi kuchiŋeja kwetu, hela muzaŋalu wetu, hela chibaaba chetu chitukudisamba nachu, hichika? Netu yenu, kumesu aMwanta wetu Yesu hakenzayi.

²⁰Muloŋa enu yenu kulema kwetu nimuzaŋalu wetu.