Read MUKANDA WANZAMBI 1 Matesalinika 3 Bible Online

1 Matesalinika 3 - MUKANDA WANZAMBI bible

1 Matesalinika 3

¹Dichi chitwakaŋenyi kuditulisha mumuchima, twatoŋojokeli netuchachiwahi kushala kanka wetu kuAtenisi;

²hitukutemesha mana kwetu Timotewu, himukwakukalakela Nzambi munsaŋu yaKristu yayiwahi, netu ayikoleshi nakuyikundeja munsaŋu jakukuhwelela kwenu;

³kulonda kubuli muntu wukutiya kutama nanochu chakumukabishawu. Muneluki mwenomu dimu mwatufuukwililuwu.

⁴Muloŋa chalala chitwadiŋi nenu, twayilejelaŋahu dehi netu akutukabishaŋa; dichi chinamwekani dehi, ninenu munelukumu.

⁵Dichi ami, chinakaŋenyi kuditulisha mumuchima, hinukutemesha Timotewu, kulonda nakeluki munekali kukuhwelela kwenu; nami hadaha anayeseki dehi kudi mukwakweseka, ni kukabakana kwetu kuneli dehi kwamukunkulwayi.

⁶Ilaŋa chanafumiyi Timotewu kudenu, ashiki kudetu nakutuletela nsaŋu jakuluŋa jakukuhwelela kwenu nakukeŋa kwenu, nindi mwatwanukaŋa chachiwahi mafuku ejima, nindi mwakeŋa a nankashi kutumona neyi chitunakeŋi etu nawa kuyimonenu, tutiya nimumuchima hi-i.

⁷Dichi dinu enu ana kwetu, chitwadiŋi nakumona kukala nalukadi, tunadikundeji dehi hansaŋu yenu nakukuhwelela kwenu.

⁸Muloŋa tunahandi neyi enu mukwimana mudi Mwanta ngu.

⁹Tukutwesha ŋahi kumusakilila Nzambi namuzaŋalu wejima wutwayizaŋalelaŋa kumesu aNzambi?

¹⁰Wufuku namwa ana twalombaŋa nankashi netu tuyimoni kumesu, netu twakawanishi chashala kukukuhwelela kwenu.

¹¹Yomweni Nzambi yetu, yowu Tata, niMwanta wetu Yesu, atulomboli munjila yetu yakuya kudenu.

¹²Mwanta ayivulishili kukeŋaŋana kwasweja, nikukeŋa antu ejima, neyi chitwelaŋa etu nawa nanenu;

¹³kulonda akoleshi nyichima yenu yibuli hakuyinkela muloŋa mukujila kumesu aNzambi yetu, yowu Tata, hakenzayi Mwanta wetu Yesu nawantu indi ajila ejima.