Read MUKANDA WANZAMBI 1 Matesalinika 5 Bible Online

1 Matesalinika 5 - MUKANDA WANZAMBI bible

1 Matesalinika 5

¹Enu ana kwetu, nsaŋu yanyaka nayilaaka hichikweti kuyisonekelachumaku.

²Muloŋa enu aweni muneluki chakashinshi, nenu ifuku daMwanta dikwinza neyi chenzaŋayi ikombi nawufuku.

³Chakwilawu nawu, Kwamwena, kwazo-o; hohenohu kujilumuka hikwakayikasumwisha, neyi chakasumwishaŋawu mumbanda wudi nevumu kudi nyisoŋu yakuvwala; hiyakapuluka nihantuku.

⁴Ilaŋa enu ana kwetu, himwekala mumwidima, mwaka ifuku odu dakayishintakeshi neyi ikombuku.

⁵Muloŋa wejima wenu mudi akwachejeji, mudi akwakwenda namwa ana; hitudi akwawufuku hela akwamwidi maku.

⁶Dichi dinu, bayi tukamaŋa tulu neyi chelaŋawu antu acheŋuku, chiŋa tutonenu nakubabala.

⁷Muloŋa antu akamaŋa tulu akamaŋa nawufuku, niantu ashetaŋa walwa ashetaŋa nawufuku.

⁸Ilaŋa etu antu amwaana tubabalenu, tuvwalenu chikuŋu chakujika hantulu chakukuhwelela nakukeŋa; niitepa dachikuŋu dakuchiŋeja wamwinu.

⁹Muloŋa Nzambi hatutondeleli kuzuwaku, ilaŋa nindi twakahandi mudi Mwanta Yesu Kristu,

¹⁰watufwilili kulonda hela tukutona hela tukukama tulu, twakahandi chimu nindi.

¹¹Dichi dikundejenu wejima wenu nakudikolesha wumu namukwawu, mwomumwelaŋa.

¹²Enu ana kwetu, tunayilembeleli netu yilukenu akalakalaŋa mukachi kenu, ayilombolaŋa mudi Mwanta nakuyifumba.

¹³Yifuukulenu kulema nankashi mukukeŋa, hansaŋu yanyidimu yawu. Shakamenu chawunda mukachi kenu.

¹⁴Enu ana kwetu, tunayilembeleli netu, konkomwenenu aluwalala, kundejenu akweti woma, koleshenu akwakuzeya, ilukenu dakudiwunjika nawantu ejima.

¹⁵Bayi hamwekana muntu wukumwila mukwawu chatama nakatama kanamwiliyuku. Londelenu kwila akwenu chachiwahi, niantu ejima mafuku ejima.

¹⁶Zaŋalalenu mafuku ejima.

¹⁷Bayi muleka kulombaku.

¹⁸Sakililenu mwahita yuma yejima, dichichuma chanakeŋiyi Nzambi mudi Kristu Yesu nindi mwilaŋa.

¹⁹Bayi mujima Spirituku.

²⁰Bayi mudiwula wuprofwetuku.

²¹Shinshikenu yuma yejima chiyidi, mukakeli yayiwahi.

²²Ambukenu kuyuma yatama yeŋi nayeŋi yejima.

²³Yomweni Nzambi wakuwunda ayijilikaŋa chikupu; nispiritu yenu, niwumi wenu, nimujimba wenu ayihembi yamukuma, yiikali yakadi hakuyinkela muloŋa hakenzayi Mwanta wetu Yesu Kristu.

²⁴Yena wayitambika washinshika, diyi wakelamu nawa.

²⁵Enu ana kwetu tulombelenu.

²⁶Ŋimwishili ana kwetu ejima nachikasa chajila.

²⁷Nayileji mudi Mwanta chakola, nami ataŋili ana kwetu ejima mukandiwu.

²⁸Luwi lwaMwanta wetu Yesu Kristu Iwikali nanenu.