Read MUKANDA WANZAMBI Joshua 10 Bible Online

Joshua 10 - MUKANDA WANZAMBI bible

Joshua 10

¹Chatiyiliyi Adoni Zedeki mwanta wakuYerusalema, nawu Yoshuwa nalukuki dehi Ayi, nawujilishi dehi chikupu, nawu mwomweliliyi Yeriku nimwanta wawu, dimu mwaneliyi niAyi nimwanta wawu, nawu nieniGibeyoni atiyaŋana dehi nawaIsarela, anashakami dehi nawu,

²atiya niwoma nankashi, muloŋa Gibeyoni wadiŋi mukala weneni, neyi kwiji mukala waŋanda, mukala waAyi wakeheluku, nimayala ejima adiŋumu adiŋi ayilobu.

³Dichi Adoni Zedeki, mwanta wakuYerusalema watumesheli nikudi Hohama mwanta wakuHeberoni, nikudi Pirama mwanta wakuYaramuti, nikudi Yafwiya mwanta wakuLakishi, nikudi Debiri mwanta wakuEgeloni, nindi,

⁴Inzenu kunu kunidami munkwashuku, tutapenu Gibeyoni; muloŋa jatiyaŋana dehi naYoshuwa nawanyana kaIsarela.

⁵Nochu anyanta awaAmori atanu, iwu mwanta wakuYerusalema, iwu mwanta wakuHeberoni, iwu mwanta wakuYaramuti, iwu mwanta wakuLakishi, iwu mwanta wakuEgeloni, apompeli hamu, akandukili, niwena ninjita jawu jejima, akaminini Gibeyoni hakatanda kalufu alwi nawu.

⁶Amayala akuGibeyoni atumesheli kudi Yoshuwa kwaaiŋiyi kuchilombu chakuGiligali, nawu, Bayi wulaba kutukwashaku, etu ambugeyuku, tunyakeli swayi swayi, wutwamwini, wutukwashuku, muloŋa anyanta ejima awaAmori ashakama kumapidi anatupompeli.

⁷Nochu Yoshuwa wafumini kuGiligali, wakandukiluku niyena niakwanjita ejima, niyilobu akwaŋovu ejima.

⁸Yehova wamwilili Yoshuwa nindi, Bayi wuyitiya womaku, muloŋa ami nakwinkuwu; kwosi iyala niwumu wakataŋika naneyuku.

⁹Yoshuwa wayikasumwishili, wafumini kuGiligali nakukanduka wufuku wejima.

¹⁰Yehova wayimwaŋili kumesu awaIsarela, wayijaholeli kwanyilaŋalaŋa kuGibeyoni, wayikupishili njila yakukandama kuBetihoroni, wayitapili tape-e ndo nikuAzeka nikuMakeda.

¹¹Chayitemukiluwu aIsarela, hiyakuya nakukunkumuka mukandu wakuBetihoroni, Yehova wayasili malola amaneni kwiwulu, ase-e ndo nikuAzeka, afwili; niatapiluwu anyana kaIsarela nampoku yakabali akeheli, avulili afwili nanvula yamalola.

¹²Ifuku dayinkeliyi Yehova anyana kaIsarela aAmori, Yoshuwa wahosheli naYehova kumesu awaIsarela, welili nindi, Eyi itagwa, imanaku haGibeyoni, nineyi kakweji, imanaku muchinekineki chaAyijaloni.

¹³Niitagwa demeni nikakweji kemeni kuyadiŋi, nichaditendeli muza waIsarela hadi ayilumbu jawu. Chenichi hiyanachisoneki mumukanda waYasharaku? Itagwa demeni mukachi kewulu, hidanyakeli kuhumaku neyi ifuku dejima.

¹⁴Hela kunyaka yakusambila hela kunyaka yakukuminina, dena ifuku dafwana neyi odu kanda adimonuhu dehi kudi antuku, datiyilahu dehi Yehova mwizu damuntu, muloŋa Yehova wayilwilili aIsarela.

¹⁵Yoshuwa wafuntili, niaIsarela ejima kuchilombu chakuGiligali.

¹⁶Wenawa anyanta atanu atemukili, abatamini mwiyegu dakuMakeda.

¹⁷Amulejeli Yoshuwa nawu, Anyanta atanu anayiwani, abatama mwiyegu dakuMakeda.

¹⁸Yoshuwa welili nindi, Kunkumwinenuku malola amaneni kukanwa keyegu, shenuku amayala ayihembi;

¹⁹hakwila enu bayi mwimajalaku, hagenu ayilumbu jenu, mwakatapuhu anakumi munyima; bayi mwakayileka eŋila munyikala yawu yampwembuku, muloŋa Yehova Nzambi yenu nayinkuwu dehi.

²⁰Cheliluwu niYoshuwa nianyana kaIsarela anakumishi dehi kuyitapa kwanyilaŋalaŋa hohu nichajililuwu to-o, ninawa amakwawu anashaluhu aneŋili dehi munyikala yawu yayipaka,

²¹antu ejima hiyakufunta kuchilombu chakuMakeda kudi Yoshuwa kwamwena zo-o; kwosi wayiliosheli hoku anyana kaIsarela chatamaku.

²²Henahana Yoshuwa welili nindi, Jikulenu kukanwa keyegu muyiidishi wenawa anyanta atanu mwiyegu, muyileti kudami.

²³Dichi cheliluwu, amwidishililuwu mwiyegu wenana anyanta atanu, iwu mwanta wakuYerusalema, iwu mwanta wakuHeberoni, iwu mwanta wakuYaramuti, iwu mwanta wakuLakishi, iwu mwanta wakuEgeloni.

²⁴Cheliluwu anamwidishililuwu dehi Yoshuwa wenana anyanta, Yoshuwa hakutambika amayala aIsarela ejima, hakuyila awakulumpi akwanjita ayiliyi nawu, nindi, Twayenu kwakwihi muyidati wenawa anyanta hanshiŋu. Ayili kwakwihi, ayidatili hanshiŋu.

²⁵Yoshuwa hakuyila nindi, Bayi mutiya woma, hela kwakamaku; dikwatishenu, múumiki chacheni, muloŋa dichi chakayilayi Yehova ayilumbu jenu ejima imukulwa nawu.

²⁶Nochu cheliliyi Yoshuwa nakumishi dehi kuhosha, hakuyitapa, hakuyijaha, hakuyikudika kunyitondu yitanu; ayilekeleluku chochayikudikawu nichikwela melela.

²⁷Chelili itagwa hidikuya nakuhuma, Yoshuwa wayilejeli antu, ayikulula nikuyikulula kunyitondu, ayumbila mwomwenomu mwiyegu mwabataminuwu, asha nimalola kukanwa keyegu, nilelu kwaduwu.

²⁸Dena ifuku odu Yoshuwa walukukili Makeda, wawutapili nampoku yakabali, nimwanta wawu; wayijilumwini ji-i niantu ejima adiŋumu; hashiyili hoku niwumuku mwomwamwililiyi mwanta wakuYeriku dimu mwamwililiyi nimwanta wakuMakeda.

²⁹Yoshuwa wafumini kuMakeda niaIsarela ejima, ayili kuLibina, alwili naLibina.

³⁰Yehova wayinkeluwu Isarela niwena nimwanta wawu, hakuwutapa nampoku yakabali, niantu ejima adiŋumu; hashiyili hoku niwumuku; mwomwamwililiyi mwanta wakuYeriku, dimu mwamwililiyi nimwanta wawu.

³¹Yoshuwa wafumini kuLibina hamu nawaIsarela ejima, ayili kuLakishi, atuŋililuku chilombu, alwili nawu.

³²Yehova wayinkeli aIsarela mukala waLakishi, awulukukili ifuku damuchiyedi, awutapili nampoku yakabali niantu ejima adiŋumu, mwejima mweliliyi Libina.

³³Horama mwanta wakuGezeri wenjili nakukwashaku aLakishi. Yoshuwa wamutapili niyena niantu indi, hamushiyilili hoku niwumuku.

³⁴Yoshuwa wafumini kuLakishi hamu nawaIsarela ejima, ayili kuEgeloni, atuŋililuku chilombu, alwili nawu.

³⁵Awulukukili ifuku denodu, awutapili nampoku yakabali, niantu ejima adiŋumu wayijilumwini ji-i ifuku dodenodu, mwomwejima mweliliyi Lakishi.

³⁶Yoshuwa wafumini kuEgeloni hamu nawaIsarela ejima, akandukili nakuya kuHeberoni. Alwili nawu;

³⁷Awulukukili, awutapili nampoku yakabali nimwanta wawu ninyikala yawu yejima, niantu ejima adiŋumu. Hashiyili hoku niwumuku, mwomwejima mweliliyi Egeloni, wawujilumwini ji-i niantu ejima adiŋumu.

³⁸Yoshuwa wafuntili, hamu nawaIsarela ejima kuDebiri, alwili nawu.

³⁹Wawulukukili ninyikala yawu yejima, wakwatili nimwanta wawu; ayitapili nampoku yakabali, ayijilumwini ji-i antu ejima adiŋumu; hashiyili hoku niwumuku; mwomweliliyi Heberoni dimu mweliliyi niDebiri nimwanta wawu; mwomweliliyi niLibina nimwanta wawu.

⁴⁰Nochu Yoshuwa watapili ituŋa dejima, nikumapidi, nikukabeta kakuchidiilu, nidakunkumuka nidanyikandu, nianyanta jawu ejima; hashiyili niwumuku, wayijilumwini ejima onenaŋa ji-i, mwomwalejeliyi Yehova Nzambi yaIsarela.

⁴¹Yoshuwa wafumishili kuKadeshi Baraneya nakuyitapa hohu, ndo nikuGaza, niituŋa daGosheni dejima, ndo nikuGibeyoni.

⁴²Ninawa anyanta ejima niituŋa dawu Yoshuwa wayikwatili njita yawu yimu hohu, muloŋa Yehova Nzambi yawaIsarela wayilwilili aIsarela.

⁴³Yoshuwa wafuntili hamu nawaIsarela ejima kuGiligali kuchilombu.