Read MUKANDA WANZAMBI Joshua 11 Bible Online

Joshua 11 - MUKANDA WANZAMBI bible

Joshua 11

¹Chachitiyiliyi Yabini mwanta wakuHazori, hakutemesha nikudi Yobabi mwanta wakuMadoni, nikudi mwanta wakuShimironi, nikudi mwanta wakuAkishapa,

²nikudi anyanta akukabeta kakuchimunswa, mwituŋa damapidi, niakuyana yaKineroti yakuma iku kukabeta kaku-chidiilu, niadiŋi kwakunkumuka, niakunyitumba yakuDori kumujika,

³nikudi aKenani, niakumusela niakumujika, nikudi aAmori, nikudi aHiti, nikudi aPerizi, nikudi aYebusi amwituŋa damapidi, nikudi aHivi adi mwishina daHerimoni mwituŋa daMizipa.

⁴Anyamukili niwena ninjita jawu jejima, antu amavulu nankashi neyi wusekulula wahachikumu chakaluŋalwiji kuvula, niatuwalu nimakálu amavulu nankashi.

⁵Awa anyanta ejima adipompesheli hamu, adibombeli chilombu chawu chimu kumeji aMeromi, nawu alwi nawaIsarela.

⁶Yehova wamwilili Yoshuwa, nindi, Bayi wuyitiya womaku; muloŋa kumadiki, neyi itaŋwa dinashiki aha hididi, nakayinkawu aIsarela wejima wawu afwa dehi; wakaketula tuwalu twawu nyijila yawimenu, wakocha makálu awu nakesi.

⁷Nochu Yoshuwa hamu nawakwanjita ejima, ayili nakudasa nawu, ayikasumwishili kumeji aMeromi, ayilotokeleli.

⁸Yehova wayinkeluwu aIsarela, ayitapili, ayikupishili nikuZidoni weneni, nikuMiserefwoti Mayimi nikuchinekineki chaMizipa kumusela; ayitapili, hiyashiyili hoku niwumuku.

⁹Yoshuwa wayilili mwomwamulejeliyi Yehova, waketwili tuwalu twawu nyijila yawimenu, wocheli makálu awu nakesi.

¹⁰Wena mafuku owu Yoshuwa wafuntili hanyima, walukukili mukala waHazori, nimwanta wawu wamutapili nampoku yakabali, muloŋa Hazori hakusambila diyi wadiŋi mwanta wamatuŋa ana ejima.

¹¹Antu ejima adiŋumu ayitapili nampoku yakabali, ayijilumwini ji-i nampoku yakabali, himwasheli hoku niwumu nakwonaku, wocheli Hazori nakesi.

¹²Ninyikala yejima yawanyanta ana Yoshuwa wayilukukili, nianyanta jawu wayikwatili, wayitapili ejima nampoku yakabali, wayijilumwini ji-i mwomwalejeliyi kambuŋa Yehova Mosi.

¹³Kwinza nyikala yadiŋi hanyitumba yawu, aIsarela hiyocheli niwumuku, ocheli kwaHazori hohu; wenowu diwu wocheliyi Yoshuwa.

¹⁴Yuma yejima yamunyikala iyi, niyimuna, anyana kaIsarela atambwili yawu awenawu, hakwila antu ejima ayitapili nampoku yakabali, nichayijilumwinuwu, hiyashiyili niwumu wadiŋi nakwonaku.

¹⁵Mwalejeliyi Yehova kambuŋindi Mosi, dimu mwalejeliyi Mosi Yoshuwa, dimu mweliliyi Yoshuwa; mwejima mwamulejeluwu Mosi kudi Yehova welilumu, hashiyili kwindi chuma chimu chakadi kwilaku.

¹⁶Nochu Yoshuwa wakwatili ituŋa dina dejima, nidamapidi, nidakukabeta kakuchidiilu, niituŋa daGosheni dejima, nidakunkumuka, nidayana, niituŋa daIsarela damapidi, nidawu dakunkumuka;

¹⁷kufumisha kumpidi yaHalaka, yaya kuSeyiri ndo nikuBayali Gadi muchinekineki chaLebanoni mwishina dampidi yaHerimoni, anyanta jawu ejima wayikwatili, wayitapili, wayijahili.

¹⁸Wenana anyanta Yoshuwa waasili nawu njita haleheli.

¹⁹Kwosi mukala niwumu watiyageni nawanyana kaIsarelaku chakulembaku, chiŋa wowu aHivi eniGibeyoni hohu; ejimawu ayikwatili akukwata kunjita.

²⁰Chakuchinchikisha nyichima yawu chafumini kudi Yehova, kulonda enzi nakudasa njita ayijilumuni ji-i, mwomwalejeliyi Yehova Mosi.

²¹Hamafuku ana Yoshuwa wayili nakuyijahamu aAnaki nimwituŋa damapidi, nikuHeberoni, nikuDebiri, nikuAnabi, nikwituŋa daYuda damapidi dejima, nikwituŋa daIsarela damapidi dejima, Yoshuwa wayijilumwini ji-i ninyikala yawu.

²²Himwasheli kaAnaki niwumu mwituŋa dawanyana kaIsarelaku. MuGaza namuGati namuAshidodi hohu dimu mwasheluwu amakwawu.

²³Nochu Yoshuwa wakwatili ituŋa dejima, mwejima mwahosheliyi Yehova naMosi; Yoshuwa wadinkeli aIsarela dawu dakuswana mwomwadambwililuwu, mwomwahita nyichidi yawu. Mwituŋa mwamwena ninjita.