Read MUKANDA WANZAMBI Joshua 13 Bible Online

Joshua 13 - MUKANDA WANZAMBI bible

Joshua 13

¹Yoshuwa wakulili, nyaka yindi yavulili. Yehova wamwilili nindi, Eyi wakula dehi, nyaka yeyi yinavuli, ituŋa dichidi kwoku deneni nankashi muchidi kanda muditambuli.

²Tiyenu mpata yinashaluku, mutamba wejima wawaFwilistinu niaGeshuri ejima;

³Kufumisha kuShihori yekala kwafuma Ejipitu nakutwala kuŋinza yaEkeroni kukabeta kakuchimunswa, kwelaŋawu nawu kwambala kwawaKenani; anyanta awaFwilistinu atanu, nieniGaza, nieniAshidodi, nieniAshekeloni, nieniGati, nieniEkeroni; kwinkaku niaAvi niwena.

⁴Mbadi yakabeta kakuchidiilu, ituŋa dejima dawaKenani, niMeyara ambala awaZidoni, anamutuukishi kuAfweki, kuŋinza yawaAmori;

⁵Niituŋa dawaGebali niLebanoni yejima, nakutwala kwatuntukilaŋa itaŋwa, kufumisha kuBayali Gadi mwishina dampidi yaHerimoni, nakutwala kuwiŋililu wakuHamata;

⁶antu ejima ashakama mwituŋa damapidi kufumisha kuLebanoni nakutwala kuMiserefwoti Mayimi, wowu aZidoni ejima, wenana ami nakayitemuna kumesu awanyana kaIsarela. Kumina dakuyambwila aIsarela dawu dawuswana mwomunakuleji.

⁷Dichi dinu ituŋidi yibaloleli nyichidi yitanu nayiwana, nimuchidi waManase wachibalu, dawu dawuswana.

⁸Yena Manase diyi atambwiluwu nindi niaRubeni niaGadi wuswana, wawu wayinkeliyi Mosi ishinadi daYodana damusela, mwomwayinkeliyi kambuŋa Yehova Mosi,

⁹kufumisha kuArowenai hansa yachinekineki chaArinoni, nimukala wekala mukachi kachinekineki, nichana chejima chaMedeba nakushika kuDiboni;

¹⁰ninyikala yejima yaSihoni mwanta waAmori, wadiŋi mwanta muHeshiboni, nakutwala nikuŋinza yawanyana kawaAmoni;

¹¹niGileyadi, niŋinza yawaGeshuri niyawaMayakati, nimpidi yejima yaHerimoni, niBashani yejima nakushika kuSaleka:

¹²ituŋa dejima damuBashani daOgi wadiŋi mwanta nimuAshataroti nimuEdereyi, yenowu washeluhu hadiŋi aRefwa; muloŋa wenawa wowu atapiliyi Mosi, wowu atemwiniyi.

¹³Ilaŋa nyana kaIsarela hiyayitemwini hela aGeshuri hela aMayakatuku; nilelu aGeshuri nawaMayakati ashakama nawaIsarela.

¹⁴Muchidi waLevi hohu kanka wawu diwu wabuliliyi kwinkayi wuswana; nyilambu yaYehova Nzambi yaIsarela, yakwila nakesi diwu wuswana windi, mwomwahosheliyi nindi.

¹⁵Mosi wenkeli muchidi wawanyana kaRubeni wuswana wawu mwomwahita yisaka yawu.

¹⁶Fjinza yawu yafumini kuArowenai kunsa yachinekineki chaArinoni, nimukala wekala mukachi kachinekineki, nichana chejima chaMedeba.

¹⁷Heshiboni, nanyikala yayu yejima yekala muchana; Diboni, niBamoti Bayali, niBetibayali Meyoni,

¹⁸niYahazi, niKedemoti, niMefwata,

¹⁹niKiriyatami, niSibima, niZerete Shahara kumpidi yakuchinekineki,

²⁰niBetipeyori, ninyikandu yaPisiga, niBetiyeshimoti,

²¹ninyikala yejima yamuchana, niitupa dejima daSihoni mwanta wawaAmori wadipi mwanta muHeshiboni, atapiliyi Mosi kumu nawanyanta akuMidiyani, wowu aEvwi, naRekemi, naZuri, naHuri, naReba, wowu ayilolu aSihoni, ashakamini mwituŋa.

²²NiBalami mwana kaBeyori, yowu mukwakuhopa, anyana kaIsarela amujahili nampoku yakabali kumu nawamakwawu ajahiluwu.

²³Ŋinza yawanyana kaRubeni, yowu Yodana nimukulishu windi. Weniwu diwu wuswana wawanyana kaRubeni mwahita yisaka yawu, ninyikala yamaneni niyanyanya yawuswana owu.

²⁴Mosi wenkeli muchidi waGadi, wowu anyana kaGadi, wuswana wawu mwahita yisaka yawu.

²⁵Ŋinza yawu yowu Yazeri, ninyikala yejima yakuGileyadi, nichibalu chetuŋa dawanyana kawaAmoni, nakushika kuArowenai watala mesu kuRaba;

²⁶nakufumisha nikuHeshiboni nakutwala nikuRamati Mizepe, nakuBetonimi; nakufumisha nikuMahanayimi nakutwala nikupinza yaDebiri;

²⁷muchinekineki, niBetiharama niBetinimira niSukoti, niZafwoni, ituŋa dasheluku daSihoni mwanta wakuHeshiboni, niYodana nimukulishu windi nakutwala kwakumina ŋiya daKineroti ishinadi daYodana damusela.

²⁸Weniwu diwu wuswana wawanyana kaGadi mwahita yisaka yawu, ninyikala yamaneni ninyikala yanyanya yawuswana owu.

²⁹Mosi wenkeli muchidi waManase wachibalu wuswana wawu. Wadipi wambala wamuchidi wawanyana kaManase wachibalu mwahita yisaka yawu.

³⁰Ŋinza yawu yafumini kuMahanayimi yadiŋi niBashani yejima, ituŋa dejima daOgi mwanta wakuBashani, ninyikala yejima yaYayiri yekala muBashani, nyikala makumi atanu nekumi dimu;

³¹nichibalu chaGileyadi niAshatarotl niEdereyi, yoyi nyikala yamwituŋa daOgi yamuBashani, yambala yawanyana kaMakiri mwana kaManase, yambala yachibalu chimu chawanyana kaMakiri, mwahita yisaka yawu.

³²Wenawa diwu mawuswana amboleleliyi Mosi muyana yaMowabi, ishinadi daYodana kuYeriku kumusela.

³³Hakwila muchidi waLevi Mosi hayinkeli wuswanaku. Yehova Nzambi yaIsarela diwu wuswana wawu mwomwahosheliyi nawu.