Read MUKANDA WANZAMBI Joshua 14 Bible Online

Joshua 14 - MUKANDA WANZAMBI bible

Joshua 14

¹Awa diwu mawuswana atambwiluwu anyana kaIsarela mwituŋa daKenani, ayibalwililuwu kudi kapristu Eleyazari, nimwana kaNuni Yoshuwa, niakulumpi jawatata janyichidi yawanyana kaIsarela,

²mwomwasakwililuwu wuswana wawu nachinjikijilu chakusakula nachu, mwomwashimwiniyi Yehova kukanwa kaMosi, wanyichidi yitanu nayiwana, namuchidi wachibalu.

³Mulopa wuswana wanyichidi yiyedi namuchidi wachibalu Mosi wayinkeluwu dehi mwishinadi daYodana. Ilaŋa aLevi hayinkeli wuswana mukachi kawuku.

⁴Mulopa anyana kaYosefu adiŋi nyichidi yiyedi, iwu Manase, iwu Efweremi. ALevi hiyayinkeli iseka dawu mwituŋaku, wayinkeli kwanyikala yakushakama hohu, nimpata janyepumukaku jakudiishila yimuna yawu nŋayuma yawu.

⁵Mwalejeluwu Mosi kudi Yehova dimu mweliluwu anyana kaIsarela, abalwili ituŋa.

⁶Henahana anyana kaYuda aswilili kwakwihi naYoshuwa hadipiyi kuGiligali. Mwana kaYefune Kalebi kaKenizi hakumwila nindi, Eyi weluka chuma chamwililuwu muntu waNzambi Mosi kudi Yehova, chakutena ninami nineyi muKadeshi Baraneya.

⁷Hana hantemesheliyi kambuŋaYehova Mosi, nifumi muKadeshi Baraneya niyi nakwendesha ituŋa; nadipi kwami wanyaka makumi awana. Namuleteleli cheŋi izu dadipi mumuchima wami.

⁸Hakwila ana kwami nayili nawu anowesheli nyichima yawantu, ilaŋa ami kwami namulondeli Yehova Nzambi yami hachikupu.

⁹Mosi wasanyikili ifuku odu nindi, Chalala, ituŋa diwadatili mwendu weyi deyeyi nawanyaneyi aawuswana haya nyaka, nanichi chiwunalondi Yehova Nzambi yami hachikupu.

¹⁰Dichi dinu tala, Yehova nanhandishi wumi wami iyi nyaka makumi awana nanyaka yitanu mwomwahosheliyi, kufumisha hana hahosheliyi Yehova naMosi izu idi, hendeluwu aIsarela mwisaŋa; ichi dinu tala, lelu nashiki munyaka makumi atanu nasatu nanyaka yitanu.

¹¹Lelu saŋa nakolela neyi chinadiŋilaŋa ifuku dantemesheliyi Mosi; mwashikili Ŋovu yami henahana dimu munashiki Ŋovu yami nikatataka, hela yakwasa nachu njita, hela yakwenda nachu, hela yakukoŋa nachu nyidimu.

¹²Dichi dinu nyinki mpidi iyi yateneniyi Yehova denodu ifuku, muloŋa ichi dena ifuku dina eyi aweni watiyili nawu kudi aAnaki, nawu kudi ninyikalayamaneni yakujika mpwembu; wamba kela Yehova nukwikala nindi, hinakayitemunamu, mwahosheliyi Yehova.

¹³Yoshuwa wamukiswilili nkisu, wamwinkeli mwana kaYefune Kalebi kaKenizi, Heberoni, nindi yiikali wuswana windi.

¹⁴Dichi Heberoni yelili wuswana wambala wamwana kaYefune Kalebi kaKenizi nilelu yindi, nanochu chalondeliyi Yehova Nzambi yaIsarela hachikupu.

¹⁵Nochu ijina daHeberoni hakusambila dadiŋi Kiriyati Araba; yenowu Araba wadiŋi wabadika akwawu aAnaki kutoha. Mwituŋa mumwena ninjita.