Read MUKANDA WANZAMBI Joshua 17 Bible Online

Joshua 17 - MUKANDA WANZAMBI bible

Joshua 17

¹Imudimu mwasakwililuwu muchidi waManase nachinjikijilu; muloŋa yena hiwedi waYosefu. Hakwila Makiri wedi waManase, tata yaGileyadi, nanochu chadiŋiyi mukwanjita, hakutambula niGileyadi niBashani.

²Mwasakwililuwu mwadiŋi mwambala mwawanyana kaManase asheluku, mwahita yisaka yawu; mwawanyana kaAbiyezeri, mwawanyana kaHeleki, mwawanyana kaAsiriyeli, mwawanyana kaShekemi, mwawanyana kaHefwenai, mwawanyana kaShemida, wenawa diwu adiŋi anyana kaManase mwana kaYosefu amayala, mwahita yisaka yawu.

³Ilaŋa Zelofwehadi mwana kaHefwenai, Hefwenai mwana kaGileyadi, Gileyadi mwana kaMakiri, Makiri mwana kaManase, hadiŋi nawanyana amayalaku, wadiŋi nawanyana awambanda hohu; majina awanyanindi wowenawa; iwu Mahala, iwu Nowa, iwu Hoŋala, iwu Milika, iwu Tiriza.

⁴Aswilili kwakwihi kumesu akapristu Eleyazari nikumesu amwana kaNuni Yoshuwa, nikumesu awatulamba, nawu, Yehova wamulejeli Mosi kutwinka wuswana wetu mukachi kawana kwetu amayala. Dichi mwomwalejeliyi Yehova wayinkeli wuswana mukachi kawana kwatata yawu.

⁵Kwaholokeleli Manase maseka ikumi, kubombelaku niituŋa daGileyadi naBashani, dekala kwishinadi daYodana;

⁶muloŋa anyana kaManase awambanda adiŋi nawuswana wawu mukachi kawanyanindi amayala, niituŋa daGileyadi dadiŋi dawanyana kaManase amayala asheluku.

⁷Ŋinza yaManase yafumini kuAsheri nakutwala kuMikimetata womba mesu kuShekemi; ŋinza yahitili kuchikasa chachidiilu, yashikili nikudi eniEntapuwa.

⁸Ituŋa daTapuwa dadiŋi daManase; hakwinza Tapuwa, haŋinza yaManase, dadiŋi dawanyana kaEfweremi.

⁹Ŋinza yakunkumukili kukakaloŋa yowu Kana, ishinadi dakakaloŋa dakabeta kakuchidiilu; nyikaloyu yadiŋi yaEfweremi, mukachi kanyikala yaManase; ŋinza yaManase yadiŋi ishinadi dakakaloŋa dakabeta kakuchimunswa, kuyakumini kwokukaluŋalwiji;

¹⁰kukabeta kakuchidiilu kwadiŋi kwaEfweremi, kukabeta kakuchimunswa kwadiŋi kwaManase, nikaluŋalwiji yoyi ŋinza yindi; ashikili nikuAsheri kumbadi yakabeta kakuchimunswa, nikuIsakari kumusela.

¹¹NimuIsakari nimuAsheri Manase wadiŋi naBetisheyani ninyikala yawu, nibiyelamu ninyikala yawu, nieniDori ninyikala yawu, nieniEndori ninyikala yawu, nieniTanaki ninyikala yawu, nieniMegido ninyikala yawu, yowu nyikandu yisatu.

¹²Ilana anyana kaManase akaŋenyi kuyitemunamu akwanyikala yina, muloŋa aKenani elili nawu etu kwetu tukushakama mwituŋa di.

¹³Cheliluwu anyana kaIsarela anakwati dehi Ŋovu ayikalakesheli aKenani nyidimu, hiyayitemwinumu chikuptiku.

¹⁴Anyana kaYosefu amwilili Yoshuwa nawu, Wunanyinkelidi wuswana weseka dimu hohu dakusakula nachinjikijilu, kweseka dimu hohu, kutoŋa yami muza weneni, niYehova saŋa ankoolekeshelayi nihanu!

¹⁵Kuchinka Yoshuwa nindi, Neyi eyi wumuza weneni, yaŋa kweyi mwisaŋa, wakaditemeni oku kwituŋa dawaPerizi nida waRefwa;[1] neyi ituŋa daEfweremi damapidi dinakukeheli.

¹⁶Anyana kaYosefu nawu, Ituŋa damapidi hitukuwana mwokuku, niaKenani ejima ashakana muchinekineki akweti makálu ayikugu ninana adi muBetisheyani nanyikala yawu, ninana adi muchinekineki, chaYezereyeli.

¹⁷Yoshuwa wahosheli namutaŋa waYosefu, wowu aEfweremi naManase, nindi, Eyi wumuza weneni, wukweti niŋovu yayivulu; eyi wukutambula iseka dakusakula nachinjikijilu dimu hohu wanyi,

¹⁸ilaŋa ituŋa damapidi dakela deyeyi, muloŋa hela hiisaŋa, wakaditema kweyi, nikudakumina dakela deyeyi, muloŋa aKenani wakayitemunamu, hela neyi akweti makálu ayikugu, hela akweti Ŋovu.