Read MUKANDA WANZAMBI Joshua 18 Bible Online

Joshua 18 - MUKANDA WANZAMBI bible

Joshua 18

¹Chipompelu chejima chawanyana kaIsarela chapompeli kuShilo, kwenoku alemeni tabanaka yákubulakena. Ituŋa dayifwomokeleli zo-o.

²Anyana kaIsarela mwasheli nyichidi yitanu nayiyedi yachidiŋi kanda ayibalwili wuswana wawuku.

³Yoshuwa wayilili anyana kaIsarela nindi, Ituŋa dayinkayi dehi Yehova Nzambi yawankakulula jenu, indi mwakanyi mwamba kaleka kukatala nákubula kwijila mu nakuditambula?

⁴Tondenu hamuchidi amayala asatu, hamuchidi amayala asatu; ami nakayitemesha, akanyamuki, akendoli mwituŋa nakudisoneka mwomwahita wuswana wawu; akenzi cheŋi kudami.

⁵Akadibaluli maseka atanu nayedi. AYuda akashakami muŋinza yawu kukabeta kakuchidiilu, nimutaŋa waYosefu wakashakami muŋinza yawu kukabeta kakuchimunswa.

⁶Ituŋa mwakadisoneki maseka atanu nayedi mwakaleti kudami, ami nakayisakwila nachinjikijilu kunu kumesu aYehova Nzambi yetu.

⁷Muloŋa aLevi hiyakweti iseka mukachi kenuku, muloŋa wuswana wawu wowu wupristu waYehova. NiaGadi niaRubeni nimuchidi waManase wachibalu atambula dehi wuswana wawu ishinadi daYodana damusela, wayinkeliyi kambuŋa Yehova Mosi.

⁸Ana amayala anyamukili, ayili; Yoshuwa wayikanini ayili nakusoneka ituŋa, nindi, Yenuŋa mwakendoli mwituŋa, mwakadisoneki, mwakenzi cheŋi kudami, nakayisakwili nachinjikijilu kunu kuShilo kumesu aYehova.

⁹Ana mayala ayili, ahitili mwituŋa, adisonekeli mumukanda hamukala, hamukala, maseka atanu nayedi, enjili cheŋi kudi Yoshuwa kwadiŋiyi kuShilo kuchilombu.

¹⁰Yoshuwa wayisakwilili nachinjikijilu kuShilo kumesu aYehova; kwenoku Yoshuwa yoyibalwila anyana kaIsarela ituŋa mwomwadambwililuwu.

¹¹Chinjikijilu chamuchidi wawanyana kaBenjamini chamwekeni mwahita yisaka yawu; ŋinza yayisakwililuwu yayili hakachi kawanyana kaYuda nawanyana kaYosefu.

¹²Ŋinza yawu yamutamba wakabeta kakuchimunswa yafumini kuYodana; ŋinza yakandukilili kumbadi yaYeriku yakabeta kakuchimunswa, yakandukili nakuhanuka mwituŋa damapidi kumujika; kuyakumini kwisaŋa yaBetiaveni.

¹³Ŋinza yafumini kwenoku yihita nikuLuzi, kwokumbadi yaLuzi yakabeta kakuchidiilu, Luzi diyi Beteli; ŋinza yakunkumukili nikuAtaroti Adara, kumpidi yekala kumutamba wakabeta kakuchidiilu waBetihoroni wamunkulu;

¹⁴ŋinza ayipimini hiyikunyeŋumuka kumbadi yamujika kukabeta kakuchidiilu kufumisha kumpidi yatala mesu kuBetihoroni kukabeta kakuchidiilu; kuyakumini kwokuKiriyati Bayali, diyi Kiriyati Yeyarimi, mukala wawanyana kaYuda. Kweniku diku kumutamba wawu wamujika.

¹⁵Mutamba wawu wakabeta kakuchidiilu wafumini kunsa yaKiriyati Yeyarimi, ŋinza hiyikuya kumujika, hiyikwidika nikukaseloki kameji akuNefwetowa;

¹⁶ŋinza yakunkumukili kwakumina mpidi yemana kuchinekineki chamwana kaHinomi, chekala kumuhoŋi wawaRefwa mbadi yakabeta kakuchimunswa, yakunkumukili nikuchinekineki chaHinomi kumbadi yawaYebusi kukabeta kakuchidiilu, yikunkumuka nikuEnirogeli;

¹⁷ayipimini kumbadi yakabeta kakuchimunswa, hiyikwidika kuEnshemeshi, yiidika nikuGeliloti, womba mesu kumukandu wakuAdumimi; hiyikukunkumuka nikwilola daBohana mwana kaRubeni;

¹⁸yihita nimutamba wuna watala mesu kuchana kumbadi yakabeta kakuchimunswa, yikunkumuka nikuchana;

¹⁹Ŋinza yahitili nakushika kumbadi yaBetihoŋala kukabeta kakuchimunswa; kuyakumini ŋinza kwokumwendu wejiya damuŋwa wakukabeta kakuchimunswa, kunsa yaYodana yakabeta kakuchidiilu; yeniyi diyi ŋinza yakabeta kakuchidiilu.

²⁰Yodana diyi wadiŋi ŋinza yawu yamutamba wakumusela. Weniwu diwu wuswana wawanyana kaBenjamini, mwesekela ŋinza jawu kwi-ndo, mwahita yisaka yawu.

²¹Dichi nyikala yamuchidi wawanyana kaBenjamini mwahita yisaka yawu yadiŋi iwu Yeriku, iwu Betihoŋala, iwu Emekikezizi,

²²iwu Betaraba, iwu Zemarayimi, iwu Beteli;

²³iwu Avwimi, iwu Para, iwu Ofwara;

²⁴iwu Chefwara Amoni, iwu Ofwini, iwu Geba; nyikala yamaneni ikumi nayiyedi, ninyikala yayu yanyanya;

²⁵iwu Gibeyona, iwu Rama, iwu Beyeroti;

²⁶iwu Mizipa, iwu Chefwira, iwu Moza;

²⁷iwu Rekemi, iwu Iripeyeli, iwu Tarala;

²⁸iwu Zela, iwu Elefwi, niaYebusi, diwu Yerusalema, iwu Gibeyati, iwu Kiriyati; nyikala yamaneni ikumi nayiwana ninyikala yayu yanyanya. Weniwu diwu wuswana wawanyana kaBenjamini mwahita yisaka yawu.