Read MUKANDA WANZAMBI Joshua 21 Bible Online

Joshua 21 - MUKANDA WANZAMBI bible

Joshua 21

¹Henahana awakulumpi jawatata jawaLevi enjili kwakwihi nakaApristu Eleyazari, namwana kaNuni Yoshuwa, nawawakulumpi jawatata janyichidi yawanyana kaIsarela;

²ahosheli nawu kuShilo mwituŋa daKenani, nawu, Yehova watulejeli kukanwa kaMosi, nindi akatwinki nyikala yakushakama, nimpata jayu jakudiishila yimuna yetu.

³Anyana kaIsarela muwuswana wawu anonenumu, ayinkeli aLevi nyikala yoyeniyi nimpata jayu mwomwayilejeliyi Yehova.

⁴Chinjikijilu chayimwekeneni yisaka yawaKohati; anyana kakapristu Aroni awaLevi, atambwili nachinjikijilu chakusakula nachu, nikumuchidi waYuda, nikumuchidi waSimeyona, nikumuchidi waBenjamini, nyikala ikumi nayisatu.

⁵Anyana kaKohati asheli atambwili nachinjikijilu chakusakula nachu nyikala ikumi, nikuyisaka yakumuchidi waEfweremi, nikumuchidi waDani, nikumuchidi waManase wachibalu.

⁶Anyana kaGereshoni atambwili nachinjikijilu chakusakula nachu nyikala ikumi nayisatu, nikuyisaka yakumuchidi waIsakari, nikumuchidi waAsheri, nikumuchidi waNafwatali, nikumuchidi waManase wachibalu wamuBashani.

⁷Anyana kaMerari, mwahita yisaka yawu, atambwili nyikala ikumi nayiyedi nikumuchidi waRubeni nikumuchidi waGadi, nikumuchidi waZebuluni.

⁸Anyana kaIsarela ayinkeli aLevi nachinjikijilu chakusakula nachu nyikala yoyeniyi nimpata jayu, mwomwayilejeliyi Yehova kukanwa kaMosi.

⁹Ayinkeli nikumuchidi wawanyana kaYuda, nikumuchidi wawanyana kaSimeyona, nyikala yoyeniyi yanatenuwu hejina hejina;

¹⁰yadiŋi yawanyana kaAroni, yayisaka yawaKohati, yawanyana kaLevi; muloŋa chinjikijilu chawu chakusakula nachu chochadiŋi chatachi.

¹¹Ayinkeli Kiriyati Araba, yenowu Araba yowu wadiŋi tata yawaAnaki, diyi Heberoni, mwituŋa daYuda damapidi, nimpata yawu kwi-ndo.

¹²Kwinza mpata yakumukala, ninyikala yawu yanyanya amwinkeli mwana kaYefune Kalebi ayiheti yiikali yindi.

¹³Anyana kakapristu Aroni ayinkeli Heberoni nimpata yawu, wowu mukala wakupulukila mbanji, niLibina nimpata yawu;

¹⁴niYatiri nimpata yawu, niEshetemowa nimpata yawu;

¹⁵niHoloni nimpata yawu, niDebiri nimpata yawu;

¹⁶niAyini nimpata yawu, niYutahi nimpata yawu, niBetishemeshi nimpata yawu; nyikala yitanu nayiwana yakunyichidi iyi yiyedi.

¹⁷Kumuchidi waBenjamini, niGibeyoni nimpata yawu, niGeba nimpata yawu,

¹⁸niAnatoti nimpata yawu, niAlimoni nimpata yawu; nyikala yiwana.

¹⁹Nyikala yejima yawatupristu anyana kaAroni, yadiŋi nyikala yamaneni ikumi nayisatu nimpata jayu.

²⁰Yisaka yawanyana kaKohati, aLevi, wowu anyana kaKohati asheli, nyikala yawu yachinjikijilu chawu chakusakula nachu ayitambwilili kumuchidi waEfweremi.

²¹Ayinkeli niShekemi nimpata yawu mwituŋa daEfweremi damapidi, mukala wakupulukila mbanji, niGezeri nimpata yawu;

²²niKibizayimi nimpata yawu, niBetihoroni nimpata yawu; nyikala yiwana.

²³Kumuchidi waDani niEliteki nimpata yawu, niGibetoni nimpata yawu;

²⁴niAyŋaloni nimpata yawu; niGati Rimoni nimpata yawu, nyikala yiwana.

²⁵Kumuchidi waManase wachibalu, niTanaki nimpata yawu, niGati Rimoni nimpata nyawu, yikala yiyedi.

²⁶Nyikala yamaneni yejima yawanyana kaKohati yadiŋi ikumi nimpata jayu.

²⁷Anyana kaGereshoni, ayisaka yawaLevi, ayinkeli kumuchidi waManase wachibalu, niGolani muBashani nimpata yawu, diwu mukala wakupulukila mbanji; niBeyeshetera nimpata yawu; nyikala yiyedi.

²⁸Kumuchidi waIsakari, niKishiyoni nimpata yawu, niDaberata nimpata yawu;

²⁹niYaramuti nimpata yawu, niEnŋamini nimpata yawu; nyikala yiwana.

³⁰Kumuchidi waAsheri, niMishali nimpata yawu, niAbidoni nimpata yawu;

³¹niHelikata nimpata yawu, niRehobi nimpata yawu; nyikala yiwana.

³²Kumuchidi waNafwatali, niKedeshi muŊaliliya nimpata yawu, wowu mukala wakupulukila mbanji, niHamotidori nimpata yawu, niKaratana nimpata yawu; nyikala yisatu.

³³Nyikala yawaGereshoni yejima mwahita yisaka yawu yadiŋi nyikala yamaneni ikumi nayisatu nimpata jayu.

³⁴Yisaka yawanyana kaMerari, wowu aLevi asheli, ayinkeli kumuchidi waZebuluni, niYokineyami nimpata yawu, niKarata nimpata yawu,

³⁵niDimina nimpata yawu, niNahalali nimpata yawu; nyikala yiwana.

³⁶Kumuchidi waRubeni, niBezeri nimpata yawu, niYahazi nimpata yawu,

³⁷niKedimoti nimpata yawu, niMefwayata nimpata yawu; nyikala yiwana.

³⁸Kumuchidi waGadi, niRamoti muGileyadi nimpata yawu, wowu mukala wakupulukila mbanji, niMahanayimi nimpata yawu;

³⁹niHeshiboni nimpata yawu, niYazeri nimpata yawu; kubomba nyikala yejima nyikala yiwana.

⁴⁰Nyikala iyi yejima yoyadiŋi nyikala yawanyana kaMerari mwahita yisaka yawu, yoyisaka yawaLevi yasheli; chinjikijilu chawu chakusakula chadiŋi chanyikala yamaneni ikumi nayiyedi.

⁴¹Nyikala yejima yawaLevi mukachi kawanyana kaIsarela, yashikili munyikala makumi awana nanyikala yitanu nayisatu nimpata jayu.

⁴²Nyikala iyi yejima yadiŋi nampata jayu, iwu nayawu, iwu nayawu; dichi yadiŋi nyikala iyi yejima.

⁴³Nochu Yehova wayinkeli aIsarela ituŋa dejima dasanyikililiyi ankakulula jawu nindi nakayinkadu; diikali nidawu, ashakaminumu.

⁴⁴Yehova wayimwenesheleli kwejima kwi-ndo, kwazo-o, mwomwayisanyikililiyi ankakulula jawu; ayilumbu jawu ejima kwosi niwumu wamweni kudikaŋa nawuku. Yehova wayinkeli ayilumbu jawu ejima.

⁴⁵Hikwakagenyi hoku chuma chachiwahi nichimu chahosheliyi Yehova namutaŋa walsarelaku; amweni yejima.