Read MUKANDA WANZAMBI Joshua 22 Bible Online

Joshua 22 - MUKANDA WANZAMBI bible

Joshua 22

¹Henahana Yoshuwa watambikili niaRubeni, niaGadi, nimuchidi waManase wachibalu,

²wayilili nindi, Enu munahembi mwejima mwayilejeliyi kambuŋa Yehova Mosi, munatiyi nimwizu dami mwejima munayilejeli;

³mafuku anavuli dehi anashiki nikwifuku dalelu ana kwenu himunayilekeli kanka wawuku, munahembi lushiiku lwaYehova Nzambi yenu.

⁴Ichi dinu Yehova Nzambi yenu nayimweneshi ana kwenu mwomuna mwahosheliyi nawu; dichi dinu funtenu kwenu mudiyili kwenu kumatenti enu, kwituŋa denu dimunaheti, dayinkeliyi kambuŋa Yehova Mosi mwishinadi daYodana.

⁵Chiŋa mwakashaŋa muchima nankashi wakwila nikuleja ninshimbi jayilejeliyi kambuŋa Yehova Mosi, mwakamukeŋi Yehova Nzambi yenu, mwakendi munjila jindi jejima, mwakahembi kuleja kwindi, mwakamulamati mbe, mwakamukalakeli namuchima wenu wejima, nawumi wenu wejima.

⁶Yoshuwa wayikiswilili nkisu, wayilili nindi, Yenuŋa kwenu. Ayili kwawu kumatenti awu.

⁷Chibalu chamuchidi waManase chimu, Mosi wayinkeli wuswana wawu muBashani, hakwila chibalu chikwawu Yoshuwa wayinkeli wuswana wawu mukachi kawana kwawu mwishinadi daYodana kumujika. Dichi chayililiyi Yoshuwa, nindi yenu kwenu kumatenti enu, wayikiswilili nkisu,

⁸wayilili nindi, Funtenu kwenu kumatenti enu namaheta amavulu, nayimuna yayivulu, nasiliva, niwuru, niwunegu, niyikugu, nimahina amavulu nankashi; yuma yimunapupi kudi ayilumbu jenu kunjita mwakapaŋiluku ana kwenu.

⁹Nianyana kaRubeni, nianyana kaGadi, nimuchidi waManase wachibalu afuntili cheŋi, afumini kwadiguwu anyana kaIsarela kuShilo, wekala mwituŋa daKenani, ayi kwituŋa daGileyadi, kwituŋa dawu dakudihetela, daheteluwu mwomwayilejeliyi Yehova kukanwa kaMosi.

¹⁰Chashikiluwu kumpata yakundama kuYodana, yamwituŋa daKenani, anyana kaRubeni, nianyana kaGadi, nimuchidi waManase wachibalu, atuŋili kameŋa kwakwihi naYodana, kukatala kameŋa kana keneni kwaamu.

¹¹Anyana kaIsarela atiyili nawu, Anyana kaRubeni, nianyana kaGadi, nimuchidi waManase wachibalu anatuŋi dehi kameŋa kuna kuwidikilu wetuŋa daKenani, mumpata yakundama kuYodana, ishinadi dambala dawanyana kaIsarela.

¹²Chachitiyiluwu anyana kaIsarela, chipompelu chejima chadipompesheli kuShilo nawu tuyi twakadasi nawu njita.

¹³Anyana kaIsarela amutemesheli Fwinehasi mwana kakapristu Eleyazari kudi anyana kaRubeni, nikudi anyana kaGadi, nikumuchidi waManase wachibalu, mwituŋa daGileyadi;

¹⁴atemesheli hamu nayena atulamba ikumi, hevumu kalamba, hevumu kalamba, mwahita nyichidi yawaIsarela yejima; wejima wawu adiŋi iwu mukulumpi wevumu, iwu mukulumpi wevumu, hadiŋi makombakaji awaIsarela.

¹⁵Ashikili kwituŋa daGileyadi kudi anyana kaRubeni, nikudi anyana kaGadi, nikumuchidi waManase wachibalu, ahosheli nawena,

¹⁶nawu, Tiyenu chinahoshi chipompelu chaYehova chejima, nawu, Indi muloŋa munamukoŋi Nzambi yaIsarela himuloŋanyi mwaka mufuntumu lelu kubula kumulondela Yehova, mwaka namutuŋi kameŋa kenu, kulonda mudikaŋi lelu naYehova?

¹⁷Indi kuluwa kutwaluwili kuPeyori, kwenoku kuluwa nilelu tuchidi kanda tuditookeshi mwokuku, kutoŋa o chipúpu chenjili muchipompelu chaYehova, kunakehi dehi,

¹⁸mwaka mufuntumu kubula kumulondela lelu Yehova? Chimukwila lelu himudikaŋi naYehova, kumadiki keŋa azuwi nachipompelu chaIsarela chejima.

¹⁹Ilaŋa neyi ituŋa dimunaheti hidajilaku, komana zambukenu kwenu mwinzi mwituŋa danahetiyi Yehova, mwashakama tabanaka yaYehova, muheteli hamu nanetu. Bayi mudikaŋa naYehova, hela nanetu, nakutuŋa kameŋa kenu kakubombela kukameŋa kaYehova Nzambi yetuku.

²⁰Indi mwana kaZera Akani haputili muloŋa wachuma chajilaku? Nindombu hiyaholokeleli chipompelu chaIsarela chejimaku? Yenowu iyala haluwiliyi ochu wajilumukilumu kanka windi wanyi.

²¹Anyana kaRubeni, nianyana kaGadi, nimuchidi waManase wachibalu ayakwili, ayilili awakulumpi jamakombakaji awaIsarela,

²²nawu, Yehova Nzambi yawanzambi, Yehova Nzambi yawanzambi, diyi weluka, niaIsarela niwena akeluka neyi tuneli chakudikaŋa, indi kwiji neyi chakuputa muloŋa naYehova nakutuŋa kameŋa ketu kakufuntamu nachu kubula kumulondela Yehova, komana neyi ochu bayi namutuhandisha leluku;

²³hela neyi tunalondi kulambwila nyilambu yakushita, hela nyilambu yawuŋa, hela neyi tunalondi kuketwilahu yimuna yanyilambu yakuwunda, yomweni Yehova ataluku;

²⁴bayi chitunakoŋichi tunalondi kubabalaku? Hitwakwata maanaku? Kumwaka anyanenu akamba kayila anyanetu nawu, Yehova Nzambi yaIsarela wenu?

²⁵Akamba kahosha nawu, Muloŋa Yehova nashi dehi Yodana ekali ŋinza mukachi ketu nanenu, enu anyana kaRubeni, ninenu anyana kaGadi; akenda kahosha nawu, Enu himukweti iseka kudi Yehovaku; dichi anyanenu akalekesha anyanetu kumwakama Yehova.

²⁶Dihu hanafumi kwila netu, Tutuŋi kameŋa ketu, hikanyilambu yakushita, hela kayimuna yakumuketwila Nzambuku,

²⁷ilaŋa kakeli chinsahu mukachi ketu nanenu, nimukachi kawanyanetu amba kahiŋamu, kulonda twakamukogeli Yehova mudimu windi kumesu indi, nanyilambu yetu yakushita, nayimuna yetu yakumuketwila Nzambi, ninyilambu yetu yakuwunda; anyanenu akenda kahosha anyanetu kumwaka nawu, Enu himukweti iseka kudi Yehovaku.

²⁸Dichi twelili netu, Chamba katuhoshawu etu, hela anyanetu mwenomu, etu netu twamba kayila netu, Talenu mwatuŋililuwu ankakulula jetu kameŋa kaYehova, hikanyilambu yakushita, hela kayimuna yakuketulaku; kawunsahu wamukachi ketu nanenu.

²⁹Etu tudikaŋi naYehova? Indi tufuntumu lelu kubula kumulondela Yehova? Mwaka tutuŋi kameŋa hela kanyilambu yakushita, hela kanyilambu yawuŋa, hela kayimuna yakuketulaku, kulonda tubombeli kukameŋa kaYehova Nzambi yetu kekala kumesu atabanaka yindi? Chinjila!

³⁰Kapristu Fwinehasi niatulamba amuchipompelu, wowu awakulumpi amakombakaji awaIsarela, adiŋiyi nawu, chatiyiluwu mazu ahosheluwu anyana kaRubeni, nianyana kaGadi, nianyana kaManase, atiyili kuwaha nankashi.

³¹Fwinehasi mwana kakapristu Eleyazari, wayilili anyana kaRubeni, nianyana kaGadi, nianyana kaManase, nindi, Lelu tuneluki netu komana Yehova wekala mukachi ketu nanochu chimunabuli kuputa muloŋa iwu kumesu aYehova; munayamwini anyana kaIsarela kuchikasa chaYehova.

³²Fwinehasi mwana kakapristu Eleyazari, niatulamba afuntili kwayiluwu kudi anyana kaRubeni nikudi anyana kaGadi, mwomwituŋa daGileyadi, ayili cheŋi kwituŋa daKenani kudi anyana kaIsarela, ayifuntishilili izu dayilejeluwu.

³³Anyana kaIsarela atiyilumu kuwaha, anyana kaIsarela amukiswilili Nzambi nkisu, hiyahosheli cheŋi nawu tuyenu twakadasi nawu njita kulonda twakakisaŋani ituŋa dashakamawu anyana kaRubeni nianyana kaGaduku.

³⁴Anyana kaRubeni nianyana kaGadi atumbili kameŋa oku nawu Chinsahu, muloŋa nawu, kaneli mukachi ketu hichinsahu chakwila nawu Yehova diyi Nzambi.