Read MUKANDA WANZAMBI Joshua 23 Bible Online

Joshua 23 - MUKANDA WANZAMBI bible

Joshua 23

¹Chimunahiti nyaka yayivulu, chanayimweneshiyi Yehova aIsarela kudi ayilumbu jawu kwi-ndo, niYoshuwa nakuli dehi, nyaka yindi yinamuvulili dehi;

²Yoshuwa hakutambika aIsarela ejima, niakulumpi jawu, nianyanta jawu, niansompeshi jawu, niatulala twawu, hakuyila nindi, Ami nakula dehi, nyaka yami yanvulila dehi;

³munamoni yuma yejima yanayiliyi Yehova Nzambi yenu nyuza iyi yejima hanyijimba yenu; muloŋa Yehova Nzambi yenu diyi nayilwili.

⁴Talenu, nayambwilili nachinjikijilu chakusakula nachu nyuza oyu yinashali, kulonda yili wuswana wakuswana nyichidi yenu, kufumisha kuYodana, nanyuza yejima yinajilumuni ami, kushika nikukaluŋalwiji keneni kwayaŋa itagwa.

⁵Yehova Nzambi yenu diyi wakayishinjikilawu kumukuyenu, diyi wakayitemwinawu kumesu enu, mwakaheta ituŋa dawu mwomuna mwayiliosheliyi Yehova Nzambi yenu.

⁶Dichi umikenu nankashi, muhembi mwili yejima yinasonekewi mumukanda wanshimbi jaMosi, kulonda mubuli kutegulukamu nakuya hela kuchikasa chachidiilu hela kuchikasa chachimunswa;

⁷kulonda mubuli kudibomba nanyuza iyi yinashali kudenu; bayi mwakatena hela ijina dawakishi awuku, hela kuyisanyika, hela kuyipesha, hela kuyifukaminaku;

⁸chiŋa mumulamata Yehova Nzambi yenu neyi chimuneli kushika nikwitagwa dalelu.

⁹Muloŋa Yehova nayitemwini kumesu enu nyuza yamaneni yikweti Ŋovu; hakwila enu nilelu antu ejima saŋa ayikagenyawu, hosi niwumu natweshi kudikaŋa nenuku.

¹⁰Mwinenu wumu wakahaŋa ikombakaji dawantu; muloŋa Yehova Nzambi yenu diyi wayilwilaŋa mwomuna mwayiliosheliyi.

¹¹Dichi babalenu nankashi kulonda mwakakeŋi Yehova Nzambi yenu.

¹²Mona neyi mukufuntamu hela hantesha, nakulamata nyuza oyu yinashaluku, yoyu yinashali kudenu, nakusumbwaŋana nawu, nakwijila mudi wena, niwena nakwijila mudenu;

¹³ilukenu kwenu chalala nenu Yehova Nzambi yenu hakayitemwina cheŋi nyuzoyu kumesu enuku; yakela muhetu nimbulu yakufwa enu, yakela chikoti chakumbavu jenu, yakela nyiŋa yakumesu enu, nichimwakajilumuka ji-i mwituŋa di dadiwahi danayinkiyi Yehova Nzambi yenu.

¹⁴Talenu, lelu hinukuya mwayaŋa antu ejima ahanu heseki; enu muneluki nanyichima yenu yejima, nawumi wenu wejima, nenu hikunakaŋanyi chuma chachiwahi nichimu chayiteneniyi Yehova Nzambi yenuku, yejima munayimoni, kwosi nichuma chinakaŋanyuku.

¹⁵Ichi chimunamoni yuma yayiwahi yejima yayiteneneniyi Yehova Nzambi yenu, dichi chakayimweshawu kudi Yehova yuma yatama yejima, nichakayijilumunayi ji-i mwituŋa di dadiwahi danayinkiyi Yehova Nzambi yenu.

¹⁶Chimukumotoka chitiyaŋenu chayilejeliyi Yehova Nzambi yenu, nakuya nakupesha akishi nakuyifukamina, henohu kuzuwa kwaYehova kwakayivulumukila, ninenu mwakajilumuka mwituŋa di dadiwahi danayinkiyi swayi swayi hohu.