Read MUKANDA WANZAMBI Joshua 4 Bible Online

Joshua 4 - MUKANDA WANZAMBI bible

Joshua 4

¹Chelili muza wejima anamanishi dehi kuzambuka Yodana, Yehova hakumwila Yoshuwa,

²nindi, Ayi mudi antu atambuli amayala ikumi nayedi, hamuchidi iyala wumu, hamuchidi iyala wumu,

³wuyileji neyi, Nyamunenu malola ikumi nayedi hana hakachi kaYodana, hohenahana hemana nyendu yawatupristu mbe, muyisendi muyi nawu, muyishiyi kumakaminu, kumukukama wufuku owu.

⁴Yoshuwa hakutambika amayala ikumi nayedi akaniniyi dehi ahadi anyana kaIsarela, hamuchidi iyala wumu, hamuchidi iyala wumu;

⁵Yoshuwa hakuyila nindi, Zambukenu ŋahu dehi kukuya chimbaŋu chaYehova Nzambi yenu, muyi hakachi kaYodana, munyamuni wejima wenu malola, iyala nadindi, iyala nadindi, mushi hamafwiji, mwomwachindilaŋawu nyichidi yawanyana kaIsarela;

⁶kulonda chumichi chakeli chinjikijilu chenu, kulonda chamba kehulaŋawu anyanenu hanyaka yakenzaku, nawu, Malola awa mwayifuukula nenu anka?

⁷enu mwakayakulaŋa nenu, Muloŋa meji aYodana aketukili kwemeni chimbaŋu chachitiyaŋenu chaYehova; chichazambukili Yodana, meji aYodana aketukili. Malola awa akela chuma chakwanukisha nachu anyana kaIsarela haya nyaka.

⁸Anyana kaIsarela elili mwayilejeliyi Yoshuwa, anyamwini malola ikumi nayedi mukachi kaYodana, mwahosheliyi Yehova naYoshuwa, mwomwachindilaŋawu nyichidi yawanyana kaIsarela; ayili nawu nikuna kwakaminuwu, ayishili kwenoku.

⁹Yoshuwa wemikili malola ikumi nayedi mukachi kaYodana, kwemeni nyendu yawatupristu asendeli chimbaŋu chachitiyanenu. Dikwaduwu niitagwa dalelu.

¹⁰Muloŋatupristu asendeli chimbaŋu emeni mukachi kaYodana nichichamanishiluwu yuma yejima yamulejeluwu Yoshuwa Itudi Yehova kuleja antu, mwejima mwamulejeluwu Yoshuwa kudi Mosi. Antu anyakeli, azambukili.

¹¹Nochu chelili antu ejima anamani dehi kuzambuka, chimbaŋu chaYehova hichikuzambuka, niatupristu, kumesu awantu.

¹²Nianyana kaRubeni, nianyana kaGadi, nimuchidi waManase wachibalu, azambuki leŋahu dehi kukuya anyana kaIsarela amanyeka dehi, mwomwayililiyi Mosi.

¹³Azambukili kumesu aYehova ayi kunjita adiŋi neyi makombakaji makumi awana amanyekela dehi njita. Ayili kuyana yaYeriku.

¹⁴Hetagwa dina Yehova wamutohesheli Yoshuwa kumesu awaIsarela ejima; amutiyili woma mafuku indi ejima neyi chamutiyiluwu Mosi.

¹⁵Yehova wamwilili Yoshuwa,

¹⁶nindi, Yileji atupristu asendaŋa chimbaŋu chawunsahu, neyi kandukenu muYodana.

¹⁷Dichi Yoshuwa wayilejeli atupristu, nindi, Kandukenu muYodana.

¹⁸Atupristu asendeli chimbaŋu chachitiyaŋenu chaYehova, chakandukiluwu mukachi kaYodana, chadatiluwu hamaseki amomu, meji aYodana hiyakufunta nikufunta mwomwawu mwadiguwu, hiyakumwaŋala nihachikumu chindi chejima, panda, neyi mwomwindi mwamukulu.

¹⁹Antu akandukili muYodana ifuku dekumi dakakweji kakusambila, atuŋili chilombu muGiligali haŋinza yaYeriku yakumusela.

²⁰Wenana malola ikumi nayedi anyamwinuwu muYodana, Yoshuwa wayimikili muGiligali.

²¹Wahosheli nawanyana kaIsarela, nindi, Hanyaka yakenzaku anyanenu chamba kayihulawu enu atata jawu, nawu, Awa malola anka?

²²enu mwakayileja anyanenu, nenu, AIsarela azambukili yeniwu Yodana hamaseki amomu chau.

²³Muloŋa Yehova Nzambi yenu wayumishilili meji aYodana kumukuyenu, nichimwazambukili, neyi chochu cheliliyi Yehova Nzambi yenu naKaluŋalwiji Kachinana, katúumishililiyi kutukuyetu, nichitwazambukili etu;

²⁴kulonda antu ejima aheseki akeluki nawu chikasa chaYehova komana chasweja Ŋovu; kulonda akatiyi Yehova Nzambi yenu woma wahaya nyaka.