Read MUKANDA WANZAMBI Joshua 5 Bible Online

Joshua 5 - MUKANDA WANZAMBI bible

Joshua 5

¹Cheliluwu anyanta awaAmori ejima adiŋi kwishinadi daYodanaku mujika, nianyanta awaKenani ejima, adiŋi kwakwihi nakaluŋalwiji, chatiyiluwu nawu Yehova nomishi meji aYodana kwakuyawu anyana kaIsarela nichitwazambukili, nyichima yawu yanoweli mumavumu, hiyadiŋi nawa cheŋi naŋovuku, nansaŋu yawanyana kaIsarela.

²Henahana Yehova wamwilili Yoshuwa, nindi, Ilaku mpoku jatwa, wuyalamishi cheŋi anyana kaIsarela kamuchiyedi.

³Yoshuwa welili mpoku jatwa wayalamishili anyana kaIsarela kumpidi yanyivumbu.

⁴Tiyenu nsaŋu yayalamishililiyi Yoshuwa; antu amayala ejima afumini muEjipitu, wowu akwanjita, afwilili mwisaŋa munjila, hafuminuwu muEjipitu.

⁵Antu ejima afuminumu adiŋi alama dehi, hakwila antu ejima avwalikilili mwisaŋa munjila hafuminaŋawu muEjipitu hiyayalamishiluku.

⁶Muloŋanyana kaIsarela endeli mwisaŋa nyaka makumi awana, nichiwanogeli muza wejima wawakwanjita afumini muEjipitu to-o nakufwa, muloŋa abulili kutiyilila mwizu daYehova. Diwu asanyikililiyi Yehova, nindi kwonti kwindi wena kumona ituŋa dasanyikililiyi Yehova ankakulula jawu nindi nukuyinkadu, ituŋa datuloŋa twamayeli nawuchi.

⁷Anyanawu ahiŋishiliyi mudi wena, diwu alamishiliyi Yoshuwa. Muloŋadiŋi akadi kwalama, muloŋa munjila hiyayalamishiluku.

⁸Chakumishiluwu kwalamisha muza wejima, ashakamini awa namwawu, awa namwawu muchilombu, nichakusukiluwu.

⁹Yehova wamwilili Yoshuwa, nindi, Lelu dinu nayikolololi nsonyi yamuEjipitu. Dichi henahana atumbiluhu ijina nawu haGiligali nikulelu.

¹⁰Anyana kaIsarela atuŋili chilombu muGiligali. Adiili paseka ifukulo idakakweji dekumi nakawana hamelela muyana yaYeriku.

¹¹Chadiiluwu paseka, chikunachi hiyakudya yakudya yaŋidila yamwituŋa, nimankendi akadi iluŋi, nikabaka kakwocha, ifuku dawu dimu.

¹²Chadiiluwu yakudya yaŋidila yamwituŋa, chikunachi manina aketuka nikuketuka, nianyana kaIsarela hiyamweni nawa cheŋi maninaku, ilaŋa mwaka wuna adiili yakudya yamwituŋa daKenani.

¹³Chelili, chadiŋiyi Yoshuwa kwakwihi naYeriku, wafumbwili mesu indi nakutala, kutala iyaliwu nemaniwu kwanatalishiyi mesu, mpoku yindi yakabali yakuhola dehi yidi kuchikasa chindi. Yoshuwa wayili kudi yena, wamwilili nindi, Eyi wuwetwetu, tahindi yenu akwankunyi netu?

¹⁴Yena nindi, Nehi. Ami dichi chinenjili muloŋa yami mukulumpi wanjita yaYehova. Yoshuwa wadinatili chamesu heseki, wadifukwili, wamwilili nindi, Mwanta wami keŋa ahoshidi kudami kambuŋindi?

¹⁵Mukulumpi wanjita yaYehova wamwilili Yoshuwa, nindi, Subulaku nkwabilu jidi kunyendu yeyi, muloŋa hiwunemani hajila. Yoshuwa welilumu.