Read MUKANDA WANZAMBI Joshua 6 Bible Online

Joshua 6 - MUKANDA WANZAMBI bible

Joshua 6

¹Henohu kuYeriku apataku dehi mbe muloŋa wawanyana kaIsarela. Kwosi wedikiluku, kwosi weŋililuku.

²Yehova wamwilili Yoshuwa, nindi, Tala, nahani kudeyi niYeriku, nimwanta wawu, niayilobu akwaŋovu adumu.

³Mwakanyegumuka mukala, enu akwanjita wejima wenu, naku-nyegumuka mukala ndo kamu. Dichi mwakela mafuku atanu nadimu.

⁴Atupristu atanu nayedi akatwamina kumbidi kukuya chimbaŋu, nakusenda nsegu jayizamba yanyikoku jitanu najiyedi. Ifuku damuchitanu nachiyedi mwakanyegumuka mukala katanu nakayedi, niatupristu akemba mpùŋa.

⁵Chakelawu nsegu yachizamba chamukoku, imbe-e, chimwakatiya mpùŋa hiyikuvuma, antu ejima akabidika kabobobu kakeni. Mpwembu yamukala yakakunduka kwala-a, antu ejima akakandukilamu, akemakana muntu nahindi muntu nahindi.

⁶Mwana kaNuni Yoshuwa, watambikili atupristu, wayilili nindi, Nyamunenu chimbaŋu chachitiyaŋenu, atupristu atanu nayedi akasendi kumbidi kukuya chimbaŋu, mpùŋa jitanu najiyedi jansegu jayizamba yanyikoku.

⁷Wayilili antu, nindi, Hitenu, munyegumuki mukala, amayala anamanyeki akahitaŋahu kumbidi kukuya chimbaŋu chaYehova.

⁸Chelili Yoshuwa nahoshi dehi nawantu, atupristu atanu nayedi asendeli kumesu aYehova mpùŋa jitanu najiyedi jansegu jayizamba yanyikoku, aya nikuya, hiyakwimba nimpùŋa, chimbaŋu chachitiyaŋenu chaYehova hichikulondela munyima.

⁹Amayala amanyeka atwaminini kumbidi kukuya atupristu embili mpùŋa, akwakukuma hanyima niwena alondeleli munyima yachimbaŋu, atupristu elili iku adi nakuya, iku adi nakwimba mpùŋa.

¹⁰Yoshuwa wayilejeli antu, nindi, Bayi mubidikaku, kwosi muntu wukwila nihiiku, hela mukanwa kenu bayi mufuma izu nidimuku, sampu ifuku dinakayileja nami bidikenu, dodu mwakabidika.

¹¹Nochu kumukala wanyeŋumwishiluku chimbaŋu chaYehova, chahitiluku kwi-ndo kamu. Afuntili muchilombu, akamini muchilombu.

¹²Yoshuwa wamenekeli budidi, atupristu anyamwini chimbaŋu chaYehova.

¹³Atupristu atanu nayedi atwaminini kumbidi kukuya chimbaŋu chaYehova nakusenda mpùŋa janseŋu jayizamba yanyikoku jitanu najiyedi, aketwili dakwenda hohu nakwimba mpùŋa. Amayala amanyeka atwaminini kumbidi kwakuyawu, akwakukuma hanyima alondeleli chimbaŋu chaYehova, atupristu elili iku adi nakuya, iku adi nakwimba mpùŋa.

¹⁴Ifuku damuchiyedi anyeŋumukili mukala kamu, afuntili muchilombu. Dichi cheliluwu mafuku atanu nadimu.

¹⁵Ifuku damuchitanu nachiyedi amenekeli kunkunku yakucha, anyeŋumukili mukala mwomwelilaŋawu, mapampa katanu nakayedi. Denodu itaŋwodu hohu bweŋi didanyeŋumukiluwu mukala mapampa katanu nakayedi.

¹⁶Kamuchitanu nachiyedi, chembiluwu atupristu mpùŋa, Yoshuwa wayilili nindi, Bidikenu; Yehova nayinki dehi mukala.

¹⁷Mukala akamujilikilawu Yehova, nimukala waweni niyuma yejima yidumu, wukuhanda yowu chivumbi Rahaba hohu, niyena niejima adiyi nawu mwitala, nanochu chaswekeliyi antemesha itwatemesheli.

¹⁸Hakwila enu, bayi mwakakwata kuchuma chanajilikuwuku, kuchina chimwakela munachiliki dehi, mwakakwata kuchuma chajila, himwakajilola chilombu chaIsarela, himwakachimwesha ihuŋu.

¹⁹Ilaŋa nisiliva yejima, niwuru wejima, niyuma yawuneŋu niyachikuŋu, yajila yaYehova; yikuhwila mwaswekelaŋawu yuma yalema yaYehova.

²⁰Nochu antu abidikili, niatupristu embili mpùŋa. Chatiyiluwu antu mpùŋa hiyikuvuma, antu abidikili kabobobu kakeni, nimpwembu yakundukili kwala-a, antu atwesheli kukandamamu nakwimakana zwa-a, muntu nahindi, muntu nahindi, mukala awutambula nikuwutambula.

²¹Ajilishili yuma yejima yadiŋi mumukala nampoku yakabali ji-i, niamayala, niambanda, niatwansi, niakulumpi, niaŋombi, nianyikoku, niayimbulu.

²²Yoshuwa wayilili ana amayala ayedi endesheli ituŋa, nindi, Yenu mwitala dachivumbi, mumwidishumu mumbanda, niyuma yindi yejima, mwomu mwamusanyikilili.

²³Ana anyikwenzi, ana akwakwendesha, eŋililumu, amwidishili Rahaba, nitata yindi, nimama yindi, niana kwindi, niyuma yindi yejima, edishili niantaŋa jindi ejima; ayishiyili kunsa yachilombu chaIsarela.

²⁴Mukala awocheli nakesi niyuma yadiŋumu yejima; ilaŋa nisiliva, niwuru, niyuma yawuneŋu niyachikuŋu, yenoyu hohu bweŋi diyashiluwu mwaswekelaŋawu yuma yalema mwitala daYehova.

²⁵Hakwila chivumbi Rahaba nintaŋa yatata yindi yejima, niyuma yindi yejima, Yoshuwa wayihandishili; wayili nakutuŋa nawaIsarela, nilelu saŋa atuŋilayi; nanochu chaswekeliyi antemesha atemesheliyi Yoshuwa ayi nakwendesha Yeriku.

²⁶Yoshuwa henaha washiŋeni, nindi, iyala wamba kanyamuka nakutuŋaweniwu mukala waYeriku, tu-u! Hakafwilahu wedi windi hakutuŋa chikuku chawu, hakafwilahu kabinda kindi hakwimika yenzelu yawu.

²⁷Nochu Yehova wadiŋi naYoshuwa, watiyakeni mpuhu mwituŋa dejima ti-li-li.