Read MUKANDA WANZAMBI Joshua 7 Bible Online

Joshua 7 - MUKANDA WANZAMBI bible

Joshua 7

¹Ilaŋa nyana kaIsarela aputili hachuma chakujilika; Akani, mwana kaKarami, Karami mwana kaZabidi, Zabidi mwana kaZera, wakumuchidi waYuda wanoneni chuma chajilikiluwu. Yehova waswejeli kuzuwa nawanyana kaIsarela.

²Yoshuwa watemesheli amayala kuYeriku ayi kuAyi, wekala kwakwihi naBetaveni, mbadi yaBeteli yamusela, wahosheli nawu, nindi, Yenu mwakendeshi ituŋa. Amayala ayili, endesheli Ayi.

³Afuntili kudi Yoshuwa, amwilili nawu, Antu ejima bayi akaya kwoku, kukumini dakuya amayala makombakaji ayedi hela makombakaji asatu akatapi Ayi, bayi wakayila antu ejima akabakana nakuya kwoku, mulopa adi antesha hohu.

⁴Nochu kwayili antu kuyichinda neyi kwiji makombakaji asatu awamayala. Wena atemukili akwawu amayala akuAyi.

⁵Amayala akuAyi atapili antu kuyichinda neyi kwiji makumi asatu nawantu atanu nawumu; ayikupishili kufumisha kuchisu chamukala nikuShebarimi, ayitapilili kuna kwakunkumuka; nyichima yawantu yanoweli, nimumanuŋu zo-o.

⁶Yoshuwa watabwili mahinindi, wadinatili chamesu heseki kumesu achimbaŋu chaYehova, nichikwelili melela, piyena niakulumpi aIsarela; asukwilili lunkupu hanyitu yawu.

⁷Yoshuwa welili nindi, Yayo! Eyi Mwanta Yehova, antu awa wayizambwishililidi Yodana, mwaka winzi wutuhani kudi aAmori kulonda atujilishi? Mutenowu neyi twakuminini dakushala kwishinadi daYodana!

⁸Eyi Mwanta, chanafutaleluwu Isarela ayilumbu jawu nyima jawu, nukuhosha mudihi?

⁹Mulopa niaKenani niantu ejima ashakama mwitupa akachitiya, akatu jikilila kwi-ndo, ijina detu akadijiyisha heseki. Indi eyi ijina deyi deneni wakadila pahi?

¹⁰Yehova wamwilili Yoshuwa nindi, Nyamukaku kweyi, wunadinatilidi chenichi chamesu heseki?

¹¹AIsarela anavulumuni; epa, anamotoki chitiyaŋenu chami chinayilejeli; epa, ananoni chuma chajila; nikwiya aneyi, nikutwamba anatwambi, anachishi mukachi kayuma yawu.

¹²Anyana kaIsarela dichi chanakapenyuwu kutapika nawayilumbu jawu, mulopa aneli dehi ashipewa. Dichi chakufutalelawu ayilumbu jawu nyima jawu. Hinukwikala cheŋi nenuku chipa mukisapana ochu chuma chajila, chifumi mukachi kenu.

¹³Nyamukaku, yijiliki antu. Hoshaku neyi, Dŋilikilenu itaŋwa dakumadiki, mulopa Yehova Nzambi yaIsarela nahoshi nindi, Eyi Isarela, mukachi kenu mudi chuma chajila; hiwunatweshi kutapika nawayilumbu jeyuku, sampu munafumishi dehi chuma chajila mukachi kenu.

¹⁴Dichi habudidi akayileti kwakwihi hanyichidi hanyichidi; wowu muchidi wakakwatayi Yehova wakenzi kwakwihi hachisaka hachisaka; chochisaka chakakwatayi Yehova chakenzi kwakwihi hevumu hevumu; dodivumu dakakwatayi Yehova dakenzi kwakwihi hamuntu hamuntu.

¹⁵Yenowu akakwatawu wukweti chuma chajila akamwochi mukesi, niyemweni niyuma yindi yejima, mulopa namotoki chitiyaŋenu chaYehova, nakoŋi chatama muIsarela.

¹⁶Nochu Yoshuwa wanyamukili budidi, waleteli aIsarela kwakwihi hanyichidi hanyichidi. Akwatili muchidi waYuda.

¹⁷Chisaka chaYuda wachileteli kwakwihi, akwatili chisaka chawaZera; chisaka chawaZera wachileteli kwakwihi hamuntu hamuntu, akwatili Zabidi.

¹⁸Amwivumu dindi wayileteli kwakwihi hamuntu hamuntu, akwatili Akani, mwana kaKarami, Karami mwana kaZabidi, Zabidi mwana kaZera, wakumuchidi waYuda.

¹⁹Yoshuwa wamwilili Akani, nindi, Eyi mwanami, nakulembeli, mulemeshi Yehova, Nzambi yaIsarela, itejaku kudi yena; nleji dinu chiwuneli; bayi wunjinda mwokuku.

²⁰Akani wamwakwili Yoshuwa nindi, Mwalala navulumuni Yehova, Nzambi yaIsarela. Tiya chineli;

²¹chinamweni mumaheta akunjita ihina dadiwahi dakuShinari, nŋishekeli jasiliva makulakaji ayedi, nichishima chawuru pezu yachu jishekeli makumi atanu, niyifwila nikuyifwila, niyinona nikuyinona; yakusweka hamaseki mukachi ketenti dami, siliva yidi kwishina.

²²Nochu Yoshuwa watemesheli antemesha, ayili lufuchi kwitenti, kutala iyi yanaswekiyi mwitenti dindi iyi, nisiliva yidi kwishina.

²³Ayifumishili mukachi ketenti, ayitweleleli niYoshuwa nianyana kaIsarela ejima, ayilumbikili kumesu aYehova.

²⁴Yoshuwa hamu nawaIsarela ejima anyamwini Akani mwana kaZera, nisiliva, niihina, nichishima chawuru, nianyanindi amayala nawambanda, niaŋombi jindi, niyimbulu yindi, ninyikoku yindi, niitenti dindi, niyuma yindi yejima, ayitweli kuchinekineki chaAkori.

²⁵Yoshuwa wahosheli nindi, Wunatumweshelidi yihupu? Yehova lelu wukukumwesheyi yihupu. AIsarela ejima amwasili malola, ayocheli mukesi chelili anayasi dehi malola.

²⁶Amulumbikili mulumba wamalola waweni, saŋa aduwu nilelu. Yehova chaswejeliyi kuzuwa wamweneni. Dichi kwenakuna atumbaku dehi ijina nawu, Kuchinekineki chaAkori, nilelu.