Read MUKANDA WANZAMBI Joshua 8 Bible Online

Joshua 8 - MUKANDA WANZAMBI bible

Joshua 8

¹Yehova wamwilili Yoshuwa, nindi, Bayi wutiyaŋa womaku, bayi wakama akwenuku; akwanjita ejima yaŋa nawu, nyamukaku, yaku kuAyi. Tala, nakwinki dehi nimwanta wakuAyi, niantu indi, nimukala windi, niituŋa dindi.

²Wakakoŋi mukala waAyi nimwanta wawu neyi chiwakoŋeli mukala waYeriku nimwanta wawu; hakwila yuma yidumu, niŋombi jawu, mwakaditambwila yenwenu aweni. Wakabelamisha antu kumukala kunyima yawu.

³Nochu Yoshuwa niakwanjita ejima anyamukili nakuya kuAyi. Yoshuwa watondeli amayala makombakaji makumi asatu, ayilobu akwaŋovu, wayitemesheli nawufuku.

⁴Wayilejeli nindi, Talenu, mwakabelamina mukala, kwokunyima yamukala kachi, bayi muya kwakulehi namukalaku, wejima wenu mushakama nakutalila hohu.

⁵Hakwila ninami niantu ejima inidi nawu twakakundama kumukala. Chakedikawu nakulwa nanetu neyi cheliluwu hakusambila, twakayitemuka.

⁶Wena akedika nakutuhaŋa nichitwakayikoka nakuyifumisha kumukala, muloŋa akela nawu, Anatutemuki neyi cheliluwu hatachi; nochu twakayitemuka.

⁷Enu mwakanyamuka kuna kumunayibelamini mwakatambula mukala, muloŋa Yehova Nzambi yenu wakayinkawu.

⁸Neyi munalukuki dehi mukala mwakawocha nakesi, mwakela mwomwaya izu daYehova. Talenu, nayileji dehi.

⁹Yoshuwa wayitemesheli, ayili kuna kwakubelaminawu, ashakamini mukachi kaBeteli naAyi, kumbadi yaAyi yamujika. Hakwila Yoshuwa wena wufuku owu wakamini hadi antu.

¹⁰Yoshuwa wanyamukili budidi, wapompesheli antu, niyena niakulumpi jawaIsarela atwaminini kumbidi kukuya antu, hiyakuya kuAyi.

¹¹Akwanjita ejima adiŋiyi nawu ayili, akundamininuku, ashikili kwakwihi namukala, atuŋili chilombu chawu kumbadi yaAyi yakabeta kakuchimunswa; hakachi kawena naAyi hadiŋi chinekineki.

¹²Watambwili amayala kuyichinda neyi kwiji makombakaji atanu, wayilejeli kubelamina hakachi kaBeteli naAyi, kumbadi yamukala yamujika.

¹³Nochu ayishili antu, awa nahawu, awa nahawu, wowu akwizaza dejima dadiŋi kumbadi yamukala yakabeta kakuchimunswa, niakwakubelamina kumbadi yamukala yamujika. Yoshuwa wena wufuku owu wayili hakachi kachinekineki.

¹⁴Chachimweniyi mwanta wakuAyi, anyakeli, anyamukili budidi, amayala amumukala edikili, niyena niantu indi ejima, adasi nawaIsarela, hakanaŋenuwu kunsa yachana, ilaŋa helukili nindi kunyima yamukala anamubelaminuku.

¹⁵NiYoshuwa niaIsarela ejima elili neyi adimbena kuyitemuka, atemukilili njila yakuya kwisaŋa.

¹⁶Antu ejima adiŋi mumukala aditambikili ayihaŋi; amuhaŋili Yoshuwa, ayikokeli kwakulehi namukala.

¹⁷NimuAyi nimuBeteli himwasheli hoku iyala niwumu wabulili kwidika nakulondela mwanayuwu aIsarelaku; ashiyili kuchisu champwembu kwachashi, ayihaŋa nikuyihaŋa aIsarela.

¹⁸Yehova wamwilili Yoshuwa, nindi, Ololaku iyoŋa didi muchikasa chevi wudiinyiki nakuditalisha kuAyi, muloŋa nukukwinkawu. Yoshuwa wolweli iyoŋa dadiŋi muchikasa chindi, wadiinyikih nakuditalisha kumukala.

¹⁹Abelaminini anyamukili lufuchi kwadiŋuwu, cholweliyi chikasa alotokeli, eŋilili mumukala, awulukukili, anyakeli nakwocha mukala nakisi.

²⁰Amayala akuAyi chataliluwu kunyima, amweni wishi wamukala hiwukufwinda fwi-i kwiwulu, hiyamweni niŋovu yakutemukila hela iku hela ikuku, hakwinza antu atemukilili mwisaŋa ayibalumukilili cheŋi nakulwa nawena ayitapilaŋa.

²¹AYoshuwa nawaIsarela ejima chiyamwenuwu akwakubelamina analukuki dehi mukala, chiyamwenuwu niwishi wamukala fwi-i, afuntili cheŋi, nakujaha amayala akuAyi.

²²Niakwawu afumini mumukala nakuditapa nawu, nochu adiŋi mukachi kawaIsarela, amakwawu iku, amakwawu iku, wena hakachi; ayitapili, hiyashiyili hoku niwumuku, kwosi washeluhu indi kwiji kutemukaku.

²³Nimwanta wakuAyi amukwatili wamumi, amuleteli kudi Yoshuwa.

²⁴Chaneluwu aIsarela anamanishi dehi kuyijaha eniAyi ejima adiŋi nimumaha nimwisaŋa mwayiliaŋililuwu, chafwiluwu ejima kumpoku yakabali nichichajililuwu to-o, aIsarela ejima hiyakufunta kuAyi, hiyakutapa mukala nampoku yakabali.

²⁵Ejima afwili denodu ifuku, niamayala niambanda, adiŋi makombakaji ikumi nayedi, wowu amayala akuAyi ejima.

²⁶Muloŋa Yoshuwa hafuntishili cheŋi chikasa chindi cholweliyi nachu iyoŋaku, nichajilishiliyi eniAyi ejima ji-i.

²⁷Ilaŋa gombi niyuma yamumukala apupili yawu aweni, mwomwaya izu daYehova dalejeliyi Yoshuwa.

²⁸Nochu Yoshuwa wocheli Ayi, wawilishili mulumba hohu wahaya nyaka, hiihembi nilelu.

²⁹Nimwanta wakuAyi wamukudikili kumutondu nichikwelili melela; chahumini itagwa Yoshuwa walejeli antu, akulula nimufu kumutondu, amúumbila nikuwiŋililu wakuchisu chamukala, alumbikaku nimulumba wamalola weneni, nilelu kwaduwu.

³⁰Nochu Yoshuwa wanamutuŋilili Yehova Nzambi yaIsarela kameŋa hampidi yaEbali,

³¹mwomwayilejeliyi kambuŋa Yehova Mosi anyana kaIsarela, neyi chanasonekuwu mumukanda wanshimbi jaMosi, kameŋa kamalola amukuma, akadi kusoŋa nachikugu, amulambwililuhu Yehova nyilambu yakushita, aketwili niyimuna yakuwunda.

³²Kwenoku hamalola owu wasonekeli nshimbi jaMosi jasonekeliyi, anyana kaIsarela amutalaŋa.

³³AIsarela ejima, niakulumpi jawu niatulala, niansompeshi jawu, emeni niishinadi niishinadi dachimbaŋu kumesu awatupristu, wowu aLevi, asendeli chimbaŋu chachitiyaŋenu chaYehova, nimwenyi, nimwenimbu, mukanka wumu wemeni kumpidi yaGerizimi, mukanka wukwawu kumpidi yaEbali, mwomwayilejeliyi kambuŋa Yehova Mosi, nindi akasambili kuyikiswila aIsarela.

³⁴Hakukuminina wataŋili mazu anshimbi ejima, nikukiswila nikushiŋa, mwejima mwasonekeluwu mumukanda wanshimbi.

³⁵Chipompelu chejima chaIsarela, niambanda, nianyana anyanya, niakumatuŋa acheŋi ashakamini mukachi kawu, Yoshuwa wayitaŋilili mwejima mwalejeliyi Mosi, hosi izu nidimu dasheluhu kubula kuyitaŋilaku.