Read MUKANDA WANZAMBI 2 Matesalinika 1 Bible Online

2 Matesalinika 1 - MUKANDA WANZAMBI bible

2 Matesalinika 1

¹Etu aPawulu naSilasi niTimotewu tudi nakuyisonekela mukanda, enu akwachipompelu chawaTesalonika chekala mudi Nzambi, Tata yetu, nimudi Mwanta Yesu Kristu.

²Luwi lwikali nanenu nikuwunda kwakufuma kudi Nzambi, yowu Tata, nikudi Mwanta Yesu Kristu.

³Enu ana kwetu, tunatiyi kuwaha kuyisakilila kudi Nzambi mafuku ejima; chinateli nankashi, muloŋa kukuhwelela kwenu hikukuya nakukula nankashi, nikukeŋaŋana kwenu hikukuya nakuvula.

⁴Dichi etu aweni twadisambaŋa hansaŋu yenwenu muyipompelu yaNzambi, nakutatakena kwenu, nikukuhwelela kwenu kumwakuhwelelaŋa mumakabishenu ejima, nimulukadi lumwamonaŋa.

⁵Diyi nsaŋu yakumwekesha nachu kusompesha kwaNzambi kwaloŋa, kulonda ayimonaŋa kutelela wanta waNzambi wumwamwenaŋa yihuŋu.

⁶Nzambi namoni nindi chaloŋa kuhiŋishila antu lukadi, nalukadi lwanayimweshuwu enu;

⁷ninenu mwamonaŋa lukadi kuyihiŋishila kunooka hamu nanetu, hakamwekanayi Mwanta Yesu hakafumayi kwiwulu mukesi kakubidima, hamu nawaŋelu jaŊovu jindi,

⁸nakuditenda hadi antu abula kwiluka Nzambi, nihadi antu abula kwovwahila nsaŋu yaMwanta wetu Yesu yayiwahi.

⁹Wena akayibabesha nakujilumuka kwahaya nyaka kwakufuma kumesu aMwanta, nikukulema kwaŋovu jindi,

¹⁰hakenzayi kulonda akamulemesheli kudi antu indi ajila, akamuhayamini mudi akwakwitiya ejima hefuku odu; nanochu chimwetiyili wunsahu wetu.

¹¹Dihu hanafumi etu kuyilombela mafuku ejima, netu Nzambi yetu ayimoni kutelela kutambika kwayitambikililuwu, awanishi naŋovu yuma yayiwahi yejima yimukukeŋa kwila, ninyidimu yakukuhwelela;

¹²kulonda akalemeshi ijina daMwanta wetu Yesu mudenu, ninenu mudi yena, mwaya luwi lwaNzambi yetu nilwaMwanta Yesu Kristu.