Read MUKANDA WANZAMBI 2 Matesalinika 2 Bible Online

2 Matesalinika 2 - MUKANDA WANZAMBI bible

2 Matesalinika 2

¹Enu ana kwetu, hakutena nsaŋu yakwinza kwaMwanta wetu Yesu Kristu, nikupompa kwetu kutwakapompa kudi yena chimu,

²tunalembi netu bayi munyakala kujinoka muyitoŋojoka yenuku, hela kwakama naspiritu, hela namazu hela namukanda wudi neyi wunafumi kudetu, mwakwila nawu ifuku daMwanta dashika dehi.

³Bayi ayidimba kudi muntuku; muloŋa kusenuka chiŋa kusambila kwinza, ninowu muntu wanshidi asambila kumumwekesha, yowu mwana kakunoŋa.

⁴Yena wakadikaŋa nakuditúumbakesha nawejima atenaŋawu nawu hiNzambi, hela yuma yalemeshaŋawu; dichi wakashakama mutembeli yaNzambi, nakuditena nindi yami Nzambi.

⁵Himunaanuki chinayilejelaŋa yumiyi hinadiŋi nenuku?

⁶Ichi dinu, mweluka dehi chalekeshaŋa, kulonda akamumwekeshi mumwaka windi.

⁷Nsaŋu yakuluwalala yakujinda yatachika dehi kukoŋa, iloŋa hadi mukwakulekesha nichamba kamufumishawu.

⁸Henohu dihu hakamwekeshawu yenowu mukwakuluwalala, akanoŋeshawu kudi Mwanta Yesu namuuya wakukanwa kindi, akelishawu wamukunkulwayi chakamwekanayi Mwanta Yesu hakenzayi.

⁹Chakenzayi owu mukwakuluwalala, wakenza mwakoŋeshaŋayi Satana, naŋovu jejima, nayinjikijilu, nayihayamisha yakutwamba,

¹⁰nikudimbana kwejima kwakuheŋa kwakudimba nachu antu akunoŋa; nanichi chanalekuwu kukeŋa nsaŋu yalala, kulonda ahandi.

¹¹Dichi Nzambi hakuyitemeshela kuluwaŋesha kwakweni, kulonda etiyi nsaŋu yakutwamba;

¹²kulonda akahishi nachu ejima abulili kwitiya nsaŋu yalala, atiyili kuwaha nakuheŋa.

¹³Enu ana kwetu akeŋawu kudi Mwanta, tunatiyi kuwaha kuyisakilila kudi Nzambi mafuku ejima, muloŋa ayitondeli kudi Nzambi hatachi, kulonda muhandi mukujila kwakuyijilika kudi Spiritu, nimukwitiya nsaŋu yalala,

¹⁴yayitambikiluwu nansaŋu yetu yayiwahi, kulonda mutambuli kulema kwaMwanta wetu Yesu Kristu.

¹⁵Dichi dinu, enu ana kwetu, imanenu mbe, kakelenu yaaku yayilejeluwu, hela yakuyileja nezu hela namukanda wakufuma kudetu.

¹⁶Yomweni Mwanta wetu Yesu Kristu, niNzambi, Tata yetu, watukeŋeli, watwinkeli kukundeja kwahaya nyaka, nikuchiŋeja kwakuwahi naluwi,

¹⁷ayikundeji munyichima yenu, ayikoleshi munyidimu yayiwahi nimumazu amawahi ejima.