Read MUKANDA WANZAMBI 2 Matesalinika 3 Bible Online

2 Matesalinika 3 - MUKANDA WANZAMBI bible

2 Matesalinika 3

¹Nkumininaku enu ana kwetu, tulombelenu kulonda nsaŋu yaMwanta yendi lufuchi, yilemi nawa neyi chiyinalemi kudenu,

²atupulwishikudi antu aluwa atama; muloŋa antu amakwawu hiyakweti kukuhwelelaku.

³Hakwila Mwanta washinshika, wakayikolesha, wakayihemba kudi watama.

⁴Nsaŋu yenu, tunakuhweleli Mwanta netu mwelapa mutwayilejaŋa, ninodu mukukeŋa kwila.

⁵Mwanta alomboli nyichima yenu mukukeŋa kwaNzambi nimukutatakena kwaKristu.

⁶Ichi dinu, enu ana kwetu, tukuyileja mwijina daMwanta wetu Yesu Kristu, netu ambukenu kudi ana kwenu ejima endaŋa chakuluwaŋesha, abulaŋa kwenda mwaya yaaku yimwatambwili kudetu.

⁷Enu aweni muncluki chimwadi kutwimbujola, muloŋa twashakamini mukachi kenu chakadi kuluwaŋesha.

⁸Hitwadiili yakudya yenu chamukunkuluku, ilaŋa twakabakeni nakukalakala mudimu wetu niwufuku nimwaana, kulonda tubuli kuyidiila yuma yenu.

⁹Chatela kudya yuma yenu, ilaŋa twadilekesheli, twalondeli enu mutaliluhu mutwimbujoli.

¹⁰Chitwadiŋi nenu twayilejeli netu, neyi muntu kwonti kwindi kukalakala, bayi adyaku.

¹¹Muloŋa tunatiyi nawu mukachi kenu mudi amakwawu endaŋa nakuluwaŋesha, hiyakalakalaŋa mudimuku, hiyatuvuba.

¹²Dichi dinu, tukuleja nakukonkomwena mudi Mwanta Yesu Kristu antu adi ochu, netu ekali awunda, akalakali mudimu kulonda amoni kudya kwawu awenawu.

¹³Enu ana kwetu, bayi muzeya nakwila yayiwahuku.

¹⁴Muntu wukubula kwovwahila mazu amumukanda wetu iwu, mushinshikenu, bayi mushakama ninduku, kulonda atiyi nsonyi.

¹⁵Bayi mumutoŋojoka nenu himukwankunyi nenuku, ilaŋa mukonkomwenenu nanochu chadiyi mana kwenu.

¹⁶Yomweni Mwanta wakuwunda ayiwundishi mafuku ejima mwejima. Mwanta ekali nanenu ejima.

¹⁷Ami Pawulu nasoneki kwimwishiku nachikasa chamami aweni, hichuma chakwiluka nachu nyikanda yami yejima; dimu munasonekaŋa.

¹⁸Luwi lwaMwanta wetu Yesu Kristu lwikali nanenu wejima wenu.